التصنيفات
المدونة

التاتش المصرى

المشكلة مش فى التاتش المصرى…المشكلة فى التاتش المصرى ولكن بالطريقة المصرية…يعنى ايه؟

فكرة التجويد والاضافة من عندك بشكل عام كويسة ..لكن لو ركزت فى طريقة تنفيذها “فى مصر” هتلاحظ حاجة غريبة
احنا بقدرة قادر “اغلب الناس مش كلهم” مش بنحط التاتش بتاعنا غير فى الحاجات الكويسة او المفيدة
يعنى مثلا هتلاقى حد بيقولك خد الكورس ده افضل من الكورس التانى ..او روح المكان ده افضل من المكان التانى؟
طيب هل حضرتك روحت او جربت “التانى” اللى بتتكلم عنه؟
لا ..انا جربت الاول بس ودا افضل …
حضرت عرفت منين انه الافضل.
؟؟؟؟؟؟!!!!!!!!!!!!!!!!!!!!

نفس الكلام ده بيتكرر على اغلب الحاجات اللى المفروض متحطش “التاتش” بتاعك فيها ….زى فكرة نقل العلم ..ناس كتير بتنقل معلومات كثيرة غلط …او بصورة مش واضحة..او بتنقلها بشكل مخالف لمبداها على اعتبار ان الناس مش هاتفهم او كفاية عليهم كده او هما كانوا يطولوا اصلا…او ان حد يجى بعد ما تشتغل على فكرة او مشروع او اى حاجة لفترة “وميكونش قال اى كلمة قبل كده ..ويجى بعد ما بدأ الموضوع بتاعك يظهر يقولك ..لا انت المفروض متعملش كده والمفروض تعمل كده
حضرتك بتقول كده ..انت جربت الموضوع ده او ليك خبرة قبل كده فيه
لا
؟؟؟؟؟؟؟؟؟؟!!
ملحوظة: انا اتاكدت من الموضوع ده اكتر من مرة فى مجالى كـ Social Media

اومال التاتش المصرى بالطريقة المصرية بيتعمل امتى؟

دا هيبان قوى فى حاجات كتير ملهاش لازمة..مثلا:
– نشاط طلابى او فريق يطلب ناس متطوعين يقولك عايزنهم “فشلة” ..تلاقى الفيروش انتشر وكل الناس والاماكن تكتب انها بتدور على ناس فشلة وانك لو فاشل هناخدك معانا لانك “تنين” وهايبقى ليك مستقبل “تخين” وسط كل التنانين الموجودين على “كوكو” الارض….هل الناس دى فاهمة ليه المكان الاولانى ده طلب ناس فاشلين ..او ايه المواصفات التانية اللى هايبصوا عليها
؟؟؟؟؟!!!!!!!!

– كل ما حد مينجحش فى حاجة “تقصيرا منه” تلاقيه بيقولك عادى ..ما بيل جيتس وستيف جوبز مكملوش دراسة …
طيب ما هو حضرتك تعرف بيل جيتس عمل “نظام” الـ DOS امتى ..ولا ستيف جوبز ابتدى شركة من وهو عنده اد ايه
؟؟؟؟؟!!!!!!!!

– شخص مثلا شاكك ان فى حد متابعه جدا..فلما تحصله حاجة وحشة يكتب “ياريت اللى مركز معايا يخف شوية ..على الرغم من انه شاكك بس كتب الموضوع ..عادى يعنى… فجأة تلاقى المرض انتشر و اى حد يحصله حاجة وحشة يكتب نفس الجملة ..الاخ اللى بيتابعنى ياريت تخف شوية علشان انا حصلى كذا وكذا
والاخت اللى تراقبنى يا ريت ترحمينى شوية علشان انا حصلى كذا وكذا وكذا
ودا طبعا على اعتبار ان الشخض دا هو محور الكون ..وان الشخص اللى بيحسده ده بيسهو عنهم وقت ما يحصلهم حاجات حلوة وبيفتكرهم بس قبل ما يحصلهم حاجة وحشة على طول ؟؟؟؟؟!!!!!!!!

ياريت يا جماعة لو كل واحد يحط التاتش بتاعه على جنب شوية علشان الموضوع ده بقى زيادة قوى.