من 32 سنه بالظبط النهارده. رواد الفضاء الامريكان فى المركبه تشالينجر ماتوا بعد انفجار المكوك بيهم.
كانت لحظه مؤلمه وحزينه وكشاب صغير كان عندى نموذج صغير للمكوك ده والدى الله يرحمه اشتراه لى مع كتاب ملون من معرض اسكندريه الصناعى زمان. مش ممكن انسى اسامى الرواد دول خصوصا كريستا ماكالوف.
==
بعد تحقيق دقيق تم اكتشاف سبب انفجار المكوك وكان O ring
او “جوان” مصمم بطريقه خاطئه بعض البيروقرطيين الغير متخصصين فضلوه بسبب افضليه السعر وتجاهلهم تقارير للمهندسين اللى قاللوا ان الجوان ممكن يسبب كارثه.
بعدها بسنين كتير ربنا كرمنى و اصبحت احد اعضاء هندسه التصميم للاقمار الصناعية و مش ممكن انسى انه فى بداية حياتى المهنية و بعد كام اول اجتماع ماكنتش بفتح بقى وكنت بكتفى بالمشهاده وتدوين ملاحظتى لنفسى فى صمت.
لحد ما رئيسى المباشر عنفنى وقاللى انت هنا علشان تشارك معانا. قلتله انا ببعت التقارير بعد الاجتماع علشان مش عاوز ادوس على طرف حد وانا لسه مبتدئ. فشاور لى على صوره الرواد دول وراه وقاللى بتأثر واضح لو كان المهندس المسؤل عن الجوان ده اتكلم فى الاجتماع وداس فى الكل كان زمان دول عايشين دلوقتى.
من ساعتها وانا ماحدش بيعرف يلمنى فى الاجتماعات ديه 
تجاهل المشكله هو افضل طريقه لتحويلها من “مشكله” لكارثه.
https://www.facebook.com/photo.php?fbid=832474710431544&set=a.141325199546502