واحنا صغيرين لما كنا بنضايق… ممكن ناخد جنب… نستخبى تحت اللحاف.. ننسى نفسنا في كتاب بالأيام لغاية ما نفك ونبقى كويسين…
لما كبرنا.. وقررنا نشارك حياتنا مع ناس غيرنا.. ازواجنا .. ولادنا.. اكتشفنا.. ان مشاعرنا مش عبئنا لوحدنا.. دي اصبحت عبء على شريك الحياة.. على الولاد.. بيأثر في كل منحنيات حياتهم… واصبح مطلوب مننا اننا نفك بسرعة عشان نلحق نبتسم في وش الولاد لما يرجعوا من مدارسهم.. اننا منستسلمش لمشاعرنا ونفضل نجرجر في آلامنا واحنا بنعيش كل لحظة ومطلوب مننا فيها نداري جرحنا..
وكل ما بنكبر… كل ما اعبائنا النفسية تكتر… تيجي تفضفض مع شريك حياتك.. يصعب عليك… ما هو شايل شيلة تقيلة.. مش اودامك غير انك على الاقل تخفف نفسك عنه… كفاية اللي هو فيه… تيجي تلجأ لأصحابك كل واحد عنده حكاية نفسه يحكيها.. محدش عنده مساحة نفسية يشيل اعباء غيره..
وتفضل الحكاية بتكبر… واعبائك النفسية بتكبر… تبدأ تمرض من قلة الاحتواء… ومن كتر الكبت… لغاية ما تلاقي نفسك بتتغير… بقيت انسان حساس اقل حاجة بتزعلك..او انسان عدواني اقل تصرف بيعصبك… او انسان مبتحسش لا بالحلوة ولا بالمُرّة!!
لازم نفهم اننا كدة بندمر نفسنا بنفسنا… لازم تمد ايدك وتتواصل وتطلب دعم من اللي يقدر يقدمهولك… متسيبش نفسك لغاية متوصل للحظة… انك مش عارف تعيش… والسبب مفيش!!
لانها اسباب كتير اتعقدت واصبح الوصول لجذرها من اصعب ما يكون… وكبتها جواك خلاك دفاعي عن نفسك من غير ما تحس .. وبشكل سلبي بيضر كل اللي حواليك.. وبيضر نفسك قبلهم…
لازم يبقى ليك مصدر دعم تفضفض فيه اعبائك النفسية… وتغير المعاني وتوصل للتصالح… اوعى تقلل من اهمية الدعم في حياتك… بلاش نوصل نفسنا للحظة النهاية… فاما نفضل سلبيين ونخسر اهم ناس في حياتنا… او عدوانيين فندمرهم!!
مد ايدك… واطلب المساعدة… اكيد هتلاقي في دايرتك اللي يقدر يساعدك… اطلب ومتترددش..
https://www.facebook.com/CoachReham/posts/10153925970400918