٣ استراتيجيات أساسية بتستخدم في صناعة المحتوي ولتغيير وعي البشر وفقاً لصانع المحتوي، وهنا بكلمك عن ناس محترفة ده شغلها.
أولا Common Sense
أتكلم عن بدهيات بالمشاعر تخص الفئة العامة من البشر واستقطها علي الموضوع اللي أنت تحبه حاجات زي ( الفقدان، الأمل ، اليأس … إلى آخره، كل واحد هيتعرض للمحتوي ده هيحس انك بتتكلم عنه شخصيا وهتلمس حاجة جواه وهيتفاعل معاك وهيبقي مجبر بشكل لا إرادي انه يكون تحت تاثير المحتوي مثال :
” اصعب لحظة ساعة الفطار لما تبقي فرحان انك هتفطر خلاص وتفتكر الناس اللي كانت جمبك ومبقوش موجودين، مفيش اصعب من انك تفقد حد غالي عليك بتتمني يشاركك كل لحظة حلوة .. استمتعوا بالناس اللي بتحبوهم يا جماعة وقدروا وجودهم ) مبروك أنت نكدت علي الناس بلا داعي وبلا منطق بس أنا اضمنلك لايكات كتير وتفاعل بالهبل.
ثانيا Common Logic
نفس البديهيات لكن بتخاطب العقل النمطي المتشبع بالجهل والاضمحلال الفكري، ودي جمل كتير اوي من مدرسة الأستاذ مصطفي شعبان بتاع محدش بينجرح اوي غير لما يحب اوي … ده اكتشاف مذهل بصراحة علي هذا المثال بقي ابدع أنت براحتك بقي الامثله كتير، من اول الجمل العظيمة دي مرورا بالقهوة وفيروز وعدي علي اساسات العلاقات الناجحة والمفروض نتجوز مين ونطلق مين والكلام المنطقي العظيم ده ، وطبعا محدش بيتعلم اوي غير لما بيقرأ كتير اوي.
ثالثا common life
وهنا عندك طريقين أما انك تتكلم عن واقع الحياة اللي الناس بتعشها ولازم تزود المعاناه أو انك تتكلم عن الحياة اللي المفروض الناس تعشها أو توصلها لكن لازم تأكد ان السبب انهم ميوصلوش هي الظروف والظلم والقهر ، لعبة الضحية مؤثر جدا في صناعة أي محتوي لان الناس بتحب تعيش دور البطل اللي مش قادرة تحققه في الواقع اديهم الفرصة دي.
صناعة المحتوي هي جزء من صناعة الوعي ودي صناعة كبيرة جدا وبيتحكم في عمالقة وكل وعي له وقته وكل وعي وله مكسب من وراها، عارف ان القهوة طلعت تريند في ٢٠١٤ ؟ عارف حجم تجارة ومبيعات القهوة بقت كام؟ عارف كام نشاط بيع قهوة فتح؟ عارف اننا مكتشفناش القهوة جديد ولا حاجة بس صناعنا وعي جديد طب عارف نمط الحياة الصحي ؟ Enjoy