من الأمور المهمة جدا لمن يقرأ في النصوص الشرعية
أن يكون مدركا لمدلولات الألفاظ في زمنها
وألا يسقط مدلولات ألفاظ زمننا على الزمن الذي قيلت فيه هذه الألفاظ
في الصورة
أي حد هيقرأ المكتوب
هيفهم إن الشافعية والحنابلة أجازوا الربا في غير أصناف الذهب والفضة والبر والشعير والتمر والملح
هيقول لك . النص واضح اهو . أجازوا الربا
في حين إن النص ده معناه . أجازوا الزيادة في الثمن
فالربا أصلا معناه الزيادة
عشان كده بنقول على الأرض المرتفعة ربوة
وبنقول على البنت الممتلئة مربربة
فالنص هنا مستخدم كلمة الربا باستخدام زمنها بمعنى الزيادة
ومفهوم إنك تقدر تزود سعر البيع في غير الأصناف الربوية
لكن الذهب والفضة ما ينفعش تزود سعر بيعهم عن الوزن
يعني هتبيع لي ١٠ جرام ذهب قطعة واحدة
هتاخد ١٠ قطع ذهب . كل قطعة جرام واحد
دا لا يجوز فيه الزيادة . لإنه من الأصناف الربوية الستة
كل دا تحت ما يسمى ربا الفضل . أو ربا البيع
لكن . ربا القرض . أو ربا النسيئة . فهو حرام على كل وجوهه
يعني
ما ينفعش أقرضك دلوقتي ١٠ أحمال برسيم . واستردهم ١١ حمل
تقول لي ما هو البرسيم مش من الأصناف الربوية
أقول لك أيوه . ينفع أبيع لك ١٠ أحمال من البرسيم الجيد . ب ١١ حمل من البرسيم الأقل جودة . دا بيع
لكن
لو هأقرضك
يبقى دخلت في ربا النسيئة
تقول لي
اقرأ النص تاني . هتلاقيه بيحلل ربا النسيئة
أرجع تاني وأقول لحضرتك
حضرتك بتفهم الألفاظ بفهم غير زمنها
الراجل هنا ما قالش بجواز ربا النسيئة
الراجل قال بجواز النسيئة
والنسيئة هنا معناها . تأخير قبض ثمن البيع
مش معناها ربا النسبية
يعني يجوز أبيع لك ١٠ أحمال برسيم النهارده
ب ١١ حمل من نوع أقل جودة
وتسلمهم لي بعد أسبوع
أهي تسلم هم لي بعد أسبوع دي هيا النسيئة اللي بيحللها النص ده
لكن في الذهب والفضة وباقي الأصناف الستة فلازم تسلمني دلوقتي حالا
موضوع فهم الألفاظ بمفهوم زمننا ده مشكلة كبيرة
عندك مثلا في قصة سيدنا يوسف
وجاءت سيارة
سيارة هنا يعني إيه ؟!
هل تفهمها بفهم النهارده . فتقول إنه جاءت عربية يعني ؟!
لا طبعا
جاءت سيارة يعني ناس تسير
وبعدين في نفس القصة تقرأ
وشروه بثمن بخس
فتفهم إنهم اشتروه
بينما هما باعوه
شروه يعني باعوه
أو تفهم قول الحق سبحانه وتعالى
ادخلوا في السلم كافة
يعني ادخلوا جميعكم في السلام
في حين إن معناها
التزموا بقواعد الإسلام جميعها . مش تاخد حكم وتسيب حكم
السلم هنا يعني الإسلام
كذلك يجب فهم الألفاظ بمدلول مكانها
يعني لفظ لبن في مصر غير في السعودية
في السعودية اللبن هو اللبن الرايب
واللبن العادي اسمه حليب
لفظ بطاطا في مصر غير في باقي الدول
في مصر البطاطا هي البطاطا الحلوة
لكن خارج مصر البطاطا هي البطاطس بتاعتنا
أخيرا
من واجب اللي هيكلم الناس . خصوصا لو بفتوى . إنه يراعي الأمور دي
ولو لم يراعيها متعمدا . يبقى مدلس