٦ نقاط مهمين …
أولًا: اتفق اهل الاقتصاد علي ان يختلفوا، ده بسبب ان المدارس في الاقتصاد متعددة المصادر وبناء تحليل دقيق محتاج معلومات واضحة واتجاه تفسيري شخصي يعني انت شخص تمتلك ثقافة توسعيه أو انكماشية او شخص محافظ بتميل للاشتراكية ولا الراسمالية الحرة او المقننة ولا النسب المختلفة ما بين الاقتصاد المختلط … الخ فبالتالي مفيش حاجة اسمها تحليل صح او غلط ولكن في تحليل توجه وده مفيش شخص غير متخصص يقدر يقوم بيه.
ثانيًا: الاقتصاد علم اجتماعي له مدلول رياضي مش العكس، يعني احنا لما بنقرأ المؤشرات بنفهم الانعكاس الاجتماعي وبالتالي الاحتكام للارقام فقط امر مضلل لانه مش شرط يعكس الواقع الاجتماعي الفعلي مثال: معدلات النمو في مصر، المؤشر ده لا يعبر عن اي وضع اجتماعي للمصريين وحاجات تانية كتير .
ثالثًا: الاقتصاديين لا يؤمنون بكلام زي التفائل او التشائم او اي مشاعر ممكن تحرك الشخص العادي احنا بنتعامل كل يوم مع ارقام فلو انا عندي مشاعر تجاه الارقام كان زمان الواحد مات بجلطة علي الأقل، وده اهم جانب في الموضوع احنا لما بننقل اي تحليل اقتصادي مبيبقاش عندنا تفاعل نفسي معاه لكن بالنسبه للمواطن العادي بيتفاعل نفسيًا بيحزن ويفرح ويكتئب ويخاف … الخ وده طبعًا كارثة لان الارقام متغيرة بشكل مستمر وهي لعبة .
رابعًا: حجم البوستات الغير متخصصة كثيرة جدًا وبتبقي هدفها تفاعل الناس بمشاعرهم وجذب الانتباه لكن الواقع حاجة تانية في كل الاحوال في ناس بتكسب عادي وناس بتخسر عادي وده امر طبيعي في السوق ده حتي القاعدة الكلاسيكية بتقول التجارة مكسب وخسارة مش جديد يعني لكن التوجية هو اللي جديد، الكتابة بطريقة توجه الناس لاتجاه محدد او مشاعر محددة هو ده الكارثة وللاسف صوت الجهل اعلي من صوت العلم والواقع في المجتمع المصري.
خامسًا: صدقني كل العلوم الإدارية والاقتصادية والتسويقية علوم مفتوحة المصدر يعني كل يوم ممكن يبقي في فكرة جديدة وطريقة جديدة وتعريف جديد ومفهوم جديد ففكرة انك تحكم علي طريقة انها غلط ده جهل وفكرة الحكم علي معلومة مخالفة للكتاب فده جهل برضوا، فمش صح مطلق او غلط مطلق في العلوم دي ولكن في طريقة غلط او في طريقة اصح بس كده.
سادسًا: وده الاهم انا من ٢٠١٦ بتسال نفس الاسئلة هي هي بالظبط وده معناه ان الناس مش عايزة تتعلم الناس عايزة حد يديها حلول وده طبعًا مش متاح لكل الناس لان كل واحد له ظروفه والطريقة المناسبة له، مفيش ضمان لفكر اقتصادي غير انك تتعلم وتطبق قبل الازمة، لاننا بنشتغل طول الوقت لتجنب الازمات مش بتستني لما الازمة تحصل وتقول هنعمل ايه ؟؟