وانت بتتعلم ما تشغلش مخك كتير خارج إطار اللي بتتلقاه، اتعلم بس الأول وكل حاجة هتيجي بعدين، كنا في أولى ثانوي وكان فيه زميل كل ما المدرس يقول حاجة يرفع ايده ويعترض، كل شوية يرفع ايده ويعترض، ويعترض بجهل والمدرس يقول له ما انت لو كنت استنيت دقيقتين كنت فهمت السبب..
المدرس لما الموضوع زاد وقّف الدرس ومسح السبورة وكتب لنا خمس خطوات للتعلم:
– التلقي
– الفهم
– الربط والاسترجاع
– التحليل
– الإبداع
وقال له انت عايز تنط تلات اربع خطوات على أي أساس؟ انت لسه بتتلقى، وبعدين لما تذاكر هتفهم أحسن، مع الوقت ولما يتكون عندك كم جيد من المعرفة والعلم هيبقى مترابط وتسترجع منه، ووقتها قدرتك على التحليل تظهر، وممكن يتكون لديك رأي تجاه اللي اتعلمته، وممكن تبدع..
على مهلك وادّي كل مرحلة حقها، ان شاء الله هتوصل بس بالصبر..