التصنيفات
مقالات الضيوف

أمهات دلوقتي بتشتكي أكثر من أمهات زمان

فحقيقي تحية لكل أم في العصر ده مش بتستسهل..
وبتحتهد تعمل كل شيء صح في زخم المعلومات والمحاذير والمشاوير والطلبات..

صحيح أمهات دلوقتي بتشتكي أكثر من أمهات زمان.. ببساطة لأننا عندنا وعي أكبر، بنهتم بحاجات أكتر..
التربية الإيجابية من غير ضرب أو صراخ أو أساليب عقاب مباشرة مُجهِدة أكتر.. لأن معظم اليوم بقى مناقشة وإقناع، مش قهر وقلب في ثانية…
الأكل الصحي في عصر السرعة والإغراءات محتاج مجهود ومحايلة أكتر..
المدارس إللي كانت بتقبل الأولاد بمجرد التقديم أو بالاسم، بقت بتبيع وتشتري فينا وعايزة طلبة دكتوراه في رياض أطفال،
يعني مجهود أكبر لتحضيرهم عشان بس يتقبلوا..
الشغل والزحمة وبُعد المسافات ما بين الأهالي، وبُعد البيوت يعني سُبل دعم أقل ومجهود أكبر..
انتشار التحرش الجنسي والاعتداءات على الأطفال، معناها عدم قدرة الأمهات على الاستعانة بمربيات ، يعني مجهود أكبر..
حالة التنافسية والانفتاح على تجارب الأمهات التانية، بتخلي كل أم حاسة بالتقصير، يا إما عايزة تعلم ابنها مهارات أسرع، أو عدد تمرينات أكتر، أو لغة تانية، أو عايزة تفسحه أكتر، أو تقضي معاه وقت بجودة أكتر..
كل ده مجهود أكبر..

بالإضافة لده، الأطفال في كل جيل أذكى من الحيل اللي قبله..
أطفال العصر ده أذكى مننا،
يعني درجة ملل أكبر من المتاح، بحث عن جديد طول الوقت..
مش أطفال زمان اللي هيلعبوا ٣ ساعات بلعبة واحدة ويكونوا مبسوطين..
تركيز الأمهات في توفير ألعاب ذكية وصحية لنفسية وعقل اطفالهم وابتكار طرق جديدة.. يعني مجهود أكبر..
زمن نأكل الأولاد ونسيبهم يلعبوا لوحدهم انتهى..

فحقيقي تحية لكل أم في العصر ده مش بتستسهل..
وبتحتهد تعمل كل شيء صح في زخم المعلومات والمحاذير والمشاوير والطلبات..

المصدر