يعني إيه ميزة تفضيليّة

الصورة دي هي ملخّص جلسة استشاريّة مع أحد المصانع

المصنع كان شغّال في نشاط ما – وتوقّف من فترة – وحاليا بيفكّروا في إعادة تشغيله

–

المصنع تمليك – سعره تقريبا 8 مليون

المصنع في إحدى القرى بمحافظة الشرقيّة

والمصنع كان مطلوب للإيجار بمعدّاته بقيمة 30 ألف جنيه شهريّا

( النقاط دي ليها صلة بالموضوع )

–

والكلام في البوست هنا تقريبا تقدر تاخده وتطبّقه على مصنعك المتوقّف من فترة – بغضّ النظر عن النشاط – وعن القيم

ممكن حضرتك تستخدم نفس المنهجيّة مع تغيير الأرقام – المهمّ المنهجيّة

–

أوّلا /

قبل ما نتكلّم في أيّ بدائل لإعادة تشغيل المصنع – فاحنا عندنا طلب لاستئجار المصنع ب 30 أف جنيه في الشهر – إيه رأيك في الطلب ده ؟

طيّب – بفرض إنّنا شغّلنا المصنع ورديّة واحدة – متوقّع المصنع يكسب كام ؟

حسبنا بشكل جزافيّ – طلع يكسب 30 ألف جنيه في الشهر

–

طيّب – يبقى اللي طلبه للإيجار ده إمّا هياخده يشغّله ورديّة واحدة – ويبقى كده شغّال لحسابنا فقط

–

أو !

هياخده يشغّله 3 ورديّات – فيكسب منّه 90 ألف في الشهر – يطلّع لنا منهم الإيجار – ويبقى كسب الباقي

( وغالبا هوّا هيعمل كده – لإنّه في الأساس عنده مصنع تاني – ومحتاج دا للتوسّع – فواضح إنّه عنده ضغط شغل ومحتاج مصنع يفرم فيه )

–

طيّب

هل إحنا لو شغّلنا المصنع بنفسنا هنقدر نوصّله للشغل 3 ورديّات ؟

غالبا لأّ

أو لأ في أوّل سنة

–

طيّب – هل بديل تأجير المصنع للغير مطروح ؟

مطروح طبعا – ومقبول – ومش عيب

خصوصا إنّك مش حاسب لنفسك مرتّب كمدير مصنع

–

يعني المفروض تحسب لنفسك مرتّب وليكن مثلا 20 ألف جنيه

يبقى انا لو شغّلت المصنع وكسبت منّه 30 ألف جنيه في الشهر – فانا عمليّا كسبت 30 ألف فعلا – لكن منهم 20 على سبيل المرتّب

–

بينما ممكن تأجّر المصنع للغير – وتكسب نفس ال 30 ألف وانتا مرتاح

–

أو – ممكن تطلع تشتغل مدير في مكان تاني بال 20 ألف – لكن بضغط أعصاب أقلّ

ويبقى عندك 50 ألف دخل شهريّ – 30 من المصنع – و 20 من راتبك

دا غير إنّ مزاجك حلو – ومتخلّص من ضغط إدارة مصنعك الشخصيّ

–

كلّ دا مش عيب – ولا ينتقص من شخصيّتك في شيء

الحلّ الرشيد مش لازم يكون عنتريّ – وانا عاوز 5 يكتّفوني والكلام ده

–

طيّب – هل سعر الإيجار 30 ألف جنيه في الشهر سعر عادل ؟

لأ

–

طيّب وإيه السعر العادل ؟

طالما المصنع فيه معدّات – فاحنا بنحسب استرداد المصنع ( المبنى ) على 7 أو 8 سنوات لنفسنا

ولو هنأجّره للغير – هنحسبه على 9 أو 10 سنوات – لإنّ دا ربح غير مخاطر – غنيمة باردة بالإيجار

يعني هنحسب على حوالي 100 شهر

يعني المفروض إيجار المصنع ( فاضي ) يكون 1 % من قيمته

يعني 80 ألف جنيه في الشهر

–

بينما بنعمل استرداد المعدّات على سنتين أو تلاتة لنفسنا

وللغير على 4 أو 5 سنوات ( لإنّها غنيمة باردة – ربح غير مخاطر )

يعني حوالي 50 شهر

يعني حوالي 2 % من قيمة المعدّات شهريّا

–

فلو عندك معدّات بمليون جنيه في المصنع – فالمفروض إيجارها الشهريّ يكون 20 ألف جنيه

–

يعني المفروض المصنع دا سعر إيجاره العادل 100 ألف جنيه في الشهر

–

معقول ؟!

دانا لو شغّلته بكامل طاقته هيجيب 90 ألف ربح فقط !!

–

ما هي دي غلطة حضرتك – ليه تحطّ معدّات بمليون جنيه – جوّا مبنى ب 8 مليون جنيه ؟!

دي نظريّة الفرخة والقفص – الفرخة ب 50 قرش – والقفص فاضي ب 15 جنيه !!!

–

حضرتك حطّ معدّاتك في مكان إيجار طالما سعرها رخيص

لإنّ اللي بيحقّق الربح في النهاية هو المعدّات

–

عندك مصنع بمليون جنيه معدّات – و 8 مليون جنيه مبنى

الربح هيطلع من المليون – ويتقسم على ال 9 مليون !!

فتطلع خسران طبعا

–

طيّب كده كلام حضرتك معناه إنّنا مهما نعمل عمرنا ما هنحقّق ربح يوصل حتّى للسعر العادل لإيجار المصنع

إصبر بسّ – إحنا لسّه ما خلّصناش كلام

–

طيّب

دا بديل الإيجار

–

نروح بقى للبدايل التانية ( بخلاف الإيجار )

البدايل التانية هيّا حاجة من 3

–

أوّلا / إنّ حضرتك تصيّن المعدّات – وتعيد تشغيل المصنع بنفسك

–

ثانيا / إنّ حضرتك تغيّر نشاط المصنع لنشاط تاني يجيب ربح أكبر بنفس رأس المال

–

ثالثا / إنّ حضرتك تبيع المصنع بمعدّاته – وتاخد راس مالك الجديد تبدأ بيه بماكينات فقط في مكان إيجار لمدّة 5 سنين – وبعد كده تبقى تفكّر في تملّك مصنع تاني

–

خلّينا ندرس البدايل التلاتة :-

–

البديل الأوّل /

حضرتك هتصيّن المصنع وتعيد تشغيله

–

أوّلا – حضرتك هتصيّن المكن بكام ؟؟

–

المكن بمليون جنيه مستعمل – لو هتصرف عليه نصف مليون جنيه صيانة مثلا – فوفّر الصيانة – وبيع معدّاتك الحالية بمليون – على النصف اللي كنت راصده للصيانة – بقى معاك مليون ونصف

زقّها شويّة من جيبك وهات مكن جديد ب 2 أو 3 مليون

–

أو – ممكن صيانة المكن كلّها تكون شويّة تزييت وتشحيم وهتتلمّ بأبسط الأشياء على رأي بوحة الصبّاح – يبقى خلاص إنسى البند ده وصيّن المكن الحالي واشتغل بيه

–

صيّنا المكن – وهنبدأ نشتغل

هنكسب كام ؟

–

قلنا لو فحتنا نفسنا شغل – هنكسب 90 ألف في الشهر

يعني حوالي مليون جنيه ربح في السنة

–

طيّب – هل دا حلو ؟

لأ

–

هوّا انتا جاي تقول لأ ؟

إنتا تعرف عباس الضوّ ؟

هههههههههه

–

المفروض المصنع لو تمليك وفيه ماكينات – يعمل استرداد في من 4 ل 5 سنين – لينا احنا

–

يعني المصنع أبو 9 مليون بماكيناته – المفروض يكسب في السنة حوالي 2 مليون جنيه

حضرتك محقّق مليون جنيه فقط – يبقى المشروع غير مجدي

ولا هتعرف تزوّد طاقتك عن كده – إحنا حاسبين لك على 3 ورديّات

–

ودا يودّينا للبديل التاني /

بيع معدّات المصنع الحالي – واشتري معدّات لنشاط جديد

–

وهنا نيجي لكرش البوست – أكتر حتّة فيها تفاصيل

–

حضرتك موجود في قرية – فبعيد عنّك أنشطة كتير ممكن تستهدفها لو كنت في مدينة صناعيّة

لكن – في المقابل – فيه ميزات تفضيليّة موجودة في بعض المشاريع – دي اللي تقدر تعمل من الفسيخ شربات – وتقدر تطلّع ربح كبير – من معدّات براس مال صغيّر

–

ودا السؤال اللي بيجيلي كلّ ساعة تقريبا – مش كلّ يوم

السؤال بتاع – تنصحني بمشروع إيه

–

ودايما بقول الأكلاشيه الثابت بتاع ( نحن لا نرشّح أفكار مشاريع للعملاء ) – ( شوف سلسلة أفكار المشاريع الصناعيّة على اليوتيوب )

–

لكن دي استشارة بقى – ومدفوع فيها فلوس – هههههههههه

فخلّينا نشرح فيها أنواع المشاريع المربحة – مش ( أسمائها ) – لكن هنتكلّم عن ( أنواعها )

–

المشاريع اللي بالصفة دي – إنّها بتطلّع ربح كبير من راس مال صغيّر – لازم تكون معتمدة على ميزة تفضيليّة

–

يعني إيه ميزة تفضيليّة

يعني ميزة غير عادلة

–

يعني فيه ناس مثلا اتولدت قويّة بدنيّا – فيكسب من الأعمال البدنيّة ربح كبير بمجهود صغيّر بالنسبة له

فيه بنت اتولدت جميلة – فتقدر تتجوّز جوازة مستريّحة بدون مجهود منها في اكتساب مهارات علميّة

–

فكذلك المشاريع – فيه مشاريع عندها ميزات تفضيليّة – ميزات غير عادلة

فلنذهب إلى زاتونة البوست – ما هي المزايا التفضيليّة للمشاريع ؟!

–

الميزة الأولى /

الموقع بالنسبة للخامات

–

يعني

حضرتك ممكن تكون موجود في وسط قرى بتزرع لفت مثلا – فلو عملت مصنع مخلّل – تكسب أحسن من 10 مصانع مخلّلات في المدينة الصناعيّة – لإنّك هتشتري الخام بسهولة – وبسعر أرخص من الغير – ومش هتصرف عيه نقل

–

فوجودك في قرية هنا أصبح ميزة – بدلا من كونه قد كان عيبا

–

الميزة الثانية /

الموقع بالنسبة للعملاء

–

حضرتك ممكن تكون موجود في مكان فيه مزارع دواجن كتير – فلو عملت مصنع أعلاف – تكسب من ناحية وجودك جنب العملاء

وهنا لتاني مرّة الموقع بقى ميزة مش عيب !!

–

يعني ممكن عميلك بتاع مزارع الدواجن دا بيجيب طنّ العلف من أبو كبير شرقيّة ب 23 ألف جنيه

هوّا أساسا متكلّف على مصنعه 22 ألف – وبيتصرف عليه 500 جنيه نقل من أبو كبير لمنيا القمح – ومصنع أبو كبير بيكسب فيه 500 جنيه فقط

–

بينما هيتكلّف عليك انتا 22 ألف بردو – لكنّه هتبيعه ب 22900

يعني أرخص من المنافس – فالمزارع اللي حواليك هتاخد منّك انتا

–

بينما انتا في الحقيقة بتكسب منهم اكتر من المنافس اللي سابوه وراحوا لك !!

دي سببها الميزة التفضيليّة غير العادلة ل ( موقعك بالنسبة للعملاء )

–

الميزة الثالثة /

الموقع بالنسبة للعمّال

لتالت مرّة الموقع بقى ميزة !!!

–

ممكن حضرتك تكون موجود في مكان بيتوافر فيه عمالة ماهرة في المجال بتاعك – وبيروحوا يتغدّوا في بيوتهم الضهر – وبيروحوا يناموا في بيوتهم بالليل

فانتا قادر تجيب العمالة دي برواتب أقلّ – لإنّهم بيوفّروا مواصلات الانتقال للمدينة الصناعيّة

وقادر توفّر تكلفة الوجبة

وقادر توفّر تكلفة السكن

فكلّ دي أرباح غير منظورة بتدخل جيبك من مجرّد استغلال ميزة الموقع بالنسبة للعمّال

–

يعني ممكن تكون بتبيع بنفس سعر البيع – لكن بتكسب من ( تقليل سعر التكلفة ) – وما حدّش واخد باله من ربحك جايّ منين !!

–

الميزة الرابعة /

رأس المال الكبير

–

ممكن مزارع الدواجن اللي حواليك مش قادرة تشتري العلف مباشرة من المصنع – لإنّ مش كلّ صاحب مرزعة دواجن قادر يروح يشتري 100 طنّ علف مرّة واحدة بأكتر من 2 مليون جنيه

–

فحضرتك تتدخّل هنا وتعمل مخزن توزيع لصالح المصنع الكبير

تشتري منّه طنّ العلف ب 22800 – لإنّك هتشتري كمّيّات كبيرة

تشتري 100 طنّ مثلا ب 2 مليون و 280 ألف

وتبيعه قطّاعيّ – الطنّ ب 23500

وتكرّر الحكاية دي 10 مرّات في الدورة

–

فصاحب مزرعة الدواجن هيكون قدّامه إنّه يروح يجيب 100 طنّ من المصنع مرّة واحدة – لكنّه مش معاه ال 2 مليون و 800 ألف

أو يشتري منّك انتا 10 طنّ كلّ أسبوع ب 235 ألف على مدار 10 أسابيع

–

فييجي يشتري منّك الطنّ ب 23500 عادي

وتبقى انتا كسبت 700 جنيه – في الطنّ اللي المصنع كسب فيه 300 جنيه بعد النقل

–

يعني التاجر بيكسب أكتر من المصنع ؟

لأ

أسطورة في اللأ – ههههههههه

–

التاجر كلّ أسبوع بيبيع 100 طنّ بيكسب فيهم 70 ألف جنيه

المصنع بيبيع كلّ أسبوع ألف طنّ – لكلّ تاجر 100 طنّ

كسب في الألف طنّ 300 ألف جنيه

يبقى ازّاي ال 70 أكبر من ال 300

–

ملحوظة على الهامش – أعرف مصنع أعلاف في مصر بيكسب 5 مليون جنيه في اليوم

اقرأها تاني – هههههههههه

–

الشكل التاني من أشكال الاستفادة بميزة رأس المال الكبير غير العادلة

هي البيع بالآجل – أو بالتقسيط

حضرتك هتشتري الطنّ كاش ب 22800

هتبيعه بالتجزئة ب 23500

أو هتبيعه تقسيط ب 24500

أو هتبيعه آجل وتحصّل ثمنه على آخر دورة الفراخ ب 25000

وكلّ دا حلال – دا بيع وشراء ما فيش فيه ربا

–

فكلّ أنواع الأرباح دي نشأت من ميزة غير عادلة عندك – ألا وهي ميزة ( توافر رأس المال الكبير )

يعني ( فلوس بتجيب فلوس )

–

يعني الحاجّ فلان صاحب مخزن الأعلاف مش بيكسب من ( تجارة الأعلاف )

ولكنّه بيكسب من ( إمتلاك رأس مال كبير )

–

ودا مصدر وجيه جدّا ومحترم جدّا ومعتبر جدّا للربح والكسب بالمناسبة

إنتا لو شايف دا ( ظلم ) والعياذ بالله – راجع إيمانك

قال تعالى

أَهُمْ يَقْسِمُونَ رَحْمَتَ رَبِّكَ ۚ نَحْنُ قَسَمْنَا بَيْنَهُم مَّعِيشَتَهُمْ فِي الْحَيَاةِ الدُّنْيَا ۚ وَرَفَعْنَا بَعْضَهُمْ فَوْقَ بَعْضٍ دَرَجَاتٍ لِّيَتَّخِذَ بَعْضُهُم بَعْضًا سُخْرِيًّا ۗ وَرَحْمَتُ رَبِّكَ خَيْرٌ مِّمَّا يَجْمَعُونَ

–

الميزة الخامسة /

احتكار المعلومات التسويقيّة والفنّيّة /

حضرتك ممكن تكسب ربح كبير – من مشروع براس مال صغير – في حالة احتكارك لمعلومات تسويقيّة أو فنّيّة

–

وهنا هاضرب مثالين :-

–

المثال الأوّل /

احتكار المعلومات التسويقيّة /

–

رحت زيارة لمصنع بيبيع مستلزمات فنادق للفنادق

المنتجات بتاعته يقدر يصنّعها أيّ مصنع منظّفات أو مستحضرات تجميل

لكن هوّا قادر يبيع المنتجات دي ويكسب منها لإنّ ( عائلته على صلة بالفنادق من عشرات السنين ) – وعارفين مدراء المشتريات في الفنادق – وعارفين متطلّبات الفنادق على اختلاف درجاتها

–

فهنا صاحب المصنع دا بيكسب مش من ( تصنيع مستلزمات الفنادق )

ولكن من ( معرفته بالفنادق ) أصلا

–

وبالمناسبة /

التوصية الرئيسيّة في الاستشارة دي كانت ( افتح قنوات بيع مع فنادق أكتر – بسّ )

–

ما تخترعش – ولا تصنّع منتجات جديدة – ولا تشتري ماكينات جديدة – ولا تنقل لمصنع جديد – الحلّ مش هنا

إنتا بتكسب أساسا مش من مستلزمات الفنادق – إنتا بتكسب من ( معرفتك بالفنادق ) – فزوّد دي – يزيد ربحك – إن شاء الله

–

المثال الثاني /

احتكار المعلوات الفنّيّة /

–

رحت زيارة لمصنع تاني بيصنّع إحدى مستلزمات الثلّاجات

هوّا عارف بيصنّعها ازّاي – وخاماتها إيه – وإيه العمليّات التصنيعيّة اللي بتتعمل عليها

لو أنا قلت لك على نفس المنتج بتاعه – حضرتك مش هتكسب منّه – لإنّك ببساطة ( مش هتعرف تصنّعه )

–

تقول النكتة إنّ حدّ اشترى سمكة من بيّاع – والبيّاع كتب له وصفة طبخ السمكة دي في ورقة

الراجل مسك السمكة في إيد – والورقة في إيد

جه كلب خطف السمكة

فصاحب السمكة قال له ( مش هتعرف تطبخها – الورقة معايا )

–

فصاحب المصنع ده مش بيكسب من بيع المنتج ده – ولكن بيكسب من ( معرفته بطريقة تصنيع المنتج ده )

–

عشان كده لمّا طلب منّي تصنيع اسطمبة دقيقة جدّا للمنتج ده – مشيت معاه في الاتّجاه ده

بينما صاحب المصنع الأوّلاني – ما مشيتش معاه في تحديث المنتج فنّيّا

–

لإنّ كلمة السرّ في الصناعة التانية هي ( طريقة التصنيع الصعبة )

فلو عندك الاسطمبة المعقّدة دي – هتفضل سابق أيّ منافس حابب يدخل مجالك

هوّا أساسا مش هيعرف يصنّع منتجك بدرجة صعوبته الحاليّة – هيعرف يصنّعه بعد ما تزوّد عليه الصعوبة

–

شغّالين حاليا على تصنيع منتج ما – خامته صعبة – واسطمبته صعبة – وماكيناته صعبة !!!

المنتج ده من يوم ما عملت المكتب – جاتلي 3 حالات تقريبا عاوزة تبيع اسطمباته !!

–

يعني المشروع فشل معاهم ؟!

طيّب ليه قبلت الدراسة دي – هتورّط العميل دا فيها عشان تاخد فلوس الدراسة ؟!

ياخي حسبي الله ونعم الوكيل

–

لأ طبعا – أنا قبلت المنتج ده لإنّي عارف إزّاي هساعد صاحب المصنع ده إنّه يصنّع المنتج مظبوط إن شاء الله – أمّال انا شغّال إيه ؟! ههههههه

–

بل إنّه هيتحوّل العيب بتاع المنتج دا لميزة !!

إنّه كلّ شويّة ناس هتجيب اسطمبة المنتج دا – ويفشلوا في تصنيعه – فنشتري منهم الاسطمبات بربع تمنها – ونشكرهم على حسن تعاونهم معنا

–

فهنا صاحب المصنع ده مش هيكسب من ( بيع المنتج ) – ولكن من ( معرفة الطريقة الصحيحة لتصنيع المنتج ) – دا اللي اسمه ( احتكار المعلومة الفنّيّة )

–

ملحوظة رفيّعة /

العبد لله يرزقه الله سبحانه وتعالى من البند خامسا ده – ولا خامات ولا ماكينات ولا ميكانيكا فاضية – هههههههه

والحمد لله مش باحتكر المعلومات الفنّيّة ( كلّها ) – هههههههه

–

فدي الميزات التفضيليّة اللي ممكن تخلّيك تطلّع ربح كبير – من نشاط براس مال صغيّر

–

يعني ما قلتلناش على أسماء المشاريع يعني

ما قلت لك مش هقول لك على ( أسماء ) المشاريع – هقول لك على ( أنواع ) المشاريع – إنتا اجتهد بقى في الأسماء

لكن صاحب المصنع كان دافع فلوس في الاستشارة – فقلت له على أسماء كتير طبعا – عشان في الآخر ما يوصلش لحاجة محدّدة – ههههههههههه

–

التجهيل هنا بيكون بكثرة ذكر الأسماء – فيرجع العميل يحتار تاني ويضطرّ يختار مشروع مناسب لإمكانيّاته

–

وده بيكون تجهيل مقصود !

أنا ممكن أقول له على اسم مشروع بعينه – فأكون ظلمته –

لإنّ دا ممكن ما يكونش أفضل مشروع ليه – وتكون الأفضليّة في مشروع تاني هيوصل له بالبحث

–

أنا قلت له نتكلّم بعد شهر – تكون مسحت فيه المنطقة حواليك بحثا عن مشروع تتوافر فيه صفة من الخمسة دول

–

مش هلاقي

قلت له – قول لي بعد شهر إنّك ما لقيتش

–

ما انا هلفّ ومش هلاقي

ممتاز جدّا – لفّ شهر – وما تلاقيش – بسّ لفّ شهر

–

بسّ الأهمّ – إنّك وانتا رايح تلفّ – تلفّ وانتا فاتح عينك – مش وانتا مغمّضها !!!

–

مش تطلع من البيت وانتا يغلب عليك ظنّ إنّه مش هتلاقي !!

خلاص – عينك هتتقفل – وهتبقى الفرصة قدّامك – ومش هتشوفها !!

إنّك لن تصافح قبضة مغلقة

–

لفّ شهر – وانتا فاتح عينك – ولو ما وصلتلهاش – ربّنا سبحانه وتعالى هيرشدك ليها – أو هيرشدها ليك

هتلاقيها بتتكعبل في طريقك بدون ترتيب – أو بمعنى أصحّ – بقدر الله سبحانه وتعالى

–

قال رسول الله صلّى الله عليه وسلّم

لو أنكم تتوكلون على الله حقَّ توكُّله ؛ لرزقكم كما يرزق الطيرَ : تغدوا خماصًا وتروح بطانًا

–

البديل الثالث /

بيع المصنع الحالي ب 9 مليون

إشتري مكن ب 6 مليون

وخلّي معاك سيولة تشغيل 3 مليون

واستأجر مصنع في العاشر من رمضان

–

المصنع اللي فيه مكن ب 6 مليون – المفروض يعمل استرداد في 3 سنين

يعني كلّ سنة صافي ربح 2 مليون

–

في تالت سنة اشتري أرض ب 6 مليون

وفي السنتين الرابعة والخامسة إبني مصنع ب 4 مليون

–

في السنة السادسة انقل معدّاتك للمصنع الجديد – وكمّل شغل ومزاجك حلو

وطلّع من الربح وزوّد معدّات

فيزيد ربحك من 2 ل 3 ل 4 ل 5 مليون في السنة

طولة البال تهدّ جبال

–

يعني أسيب المصنع التمليك بتاعي – وأروح أأجّر ؟!!

–

لو حضرتك ما كانش عندك مصنع قبل كده – كنت قلت لك ( لأ )

أنا حبّيت كلمة لأ دي قويّ

هههههههه

–

لكن !!

باعتبارك كان عندك مصنع قبل كده – وعارف يعني إيه شراء خامات وبيع منتجات وتشغيل عمالة – فدي مش مجازفة

دي مخاطرة محسوبة – والربح بييجي من هنا بفضل الله سبحانه وتعالى

–

الرزق على قدّ الريسك ( كلمة ريسك أساسا بالانجليزيّ هي محرّفة من كلمة رزق بالعربيّ في إحدى الروايات )

–

زيّ ما زيرو محرّفة من صفر – وكاميرا محرّفة من قمرة – وكابل محرّفة من كابل – وألجيبرا محرّفة من الجبر

–

وحرف إكس ( رمز المجهول ) – محرّف من حرف الشين ( اختصار كلمة شيء )

حيث كانت تستخدم هذه الكلمة للدلالة على الشيء المجهول – وكانت تكتب اختصارا ( ش )

–

خدوا حرف الشين كتبوه كاي – لإنّ دا كان أقرب حرف في النطق للشين بالنسبة للأندلسيّين

ولمّا حرف الكاي اتنقل للانجليزيّ – فبقى أشبه حرف بيه هو الإكس

–

إحنا إيه اللي جابنا هنا ؟!

لا ما تقلقش – أنا لقيتك نعست في آخر البوست قلت أفوّقك – هههههههه

–

قلت لك الرزق على قدّ الريسك

لكن مش أيّ حدّ يخاطر – وإلّا يبقى ب ( يجازف ) – مش بيخاطر

–

اللي يخاطر هوّا واحد زيّك – كان عنده مصنع قبل كده – وعارف هوّا بيعمل إيه

فلمّا تبيع مصنعك دلوقتي ( اللي في قرية ) – وتنقل لمدينة صناعيّة ( بماكينات أحدث ) في مصنع إيجار

هتعرف تطلّع من دا ربح مضاعف إن شاء الله – لإنّ بقى معاك مكن أحسن وسيولة تشغيل أكبر

–

الربح هنا هيبقى نتاج تعاون 3 حاجات

1 – راس المال ( اللي هتحصل عليه من البيع )

2 – مع الخبرة الفنّيّة والتسويقيّة

3 – الخلطة دي ينقصها حاجة واحدة – ( الرجولة )

إنّك لو درست وحسبت وعرفت إنّ دا هوّا الصحّ – يبقى اعمل الصحّ

–

أخيرا /

لو شايف الكلام غريب – مش مهمّ – المهمّ يكون صحّ

–

الحقيقة إنّ معظم الكلام الصحّ ( مجهول ) للأسف – عشان كده بيعتبر ( غريب )

–

والحقيقة إنّ معظم الناس تجهل المعلومات الصحيحة – بأمارة الفشل اللي بنشوفه طول الوقت

ولّا انتا متخيّل إنّ الناس عندها المعلومات الصحيحة – وبعد كده يغلب عليهم الفشل بدون سبب ؟!

–

الفشل غالب بسبب ( تفشّي المعلومات الخاطئة ) – لكن الناس بتدوّر عن أسباب الفشل في كلّ حتّة – إلّا في أنفسهم

–

ولمّا بيدوّروا في أنفسهم – بيدوّروا في كلّ حتّة

كسل – زهق – ملل – حسد – حظّ

لكنّهم ما بيروحوش ناحية ( الجهل ) – ما بيتّهموش نفسهم بالجهل

–

الناس ما رضيتش برزقها – ورضيوا بعقلهم !!!

فمكمّلين في ( الجهل ) – ومستغربين من ( الفشل ) !!!

مع إنّهم وجهين لعملة واحدة

–

الشائع عند الناس هو الجهل والمعلومات الخاطئة للأسف

حتّى أصحاب المصانع – اللي تقابلهم تخاف منهم دول – بيدخلوا مكاتبهم من هنا – وهاتك يا هبد للصبح

وبعدين يخسروا !! فيستغربوا !!!

ما تعرفش دا سوء حظّ – ولّا غباء من الآخرين !!

–

يعني مثلا – الغلطة الأساسيّة اللي تسبّبت في وقوف المصنع ده – هي ( الاعتماد على عميل واحد )

مع إنّي كاتب من زمان جدّا #نصيحة_من_خبير بتقول ( لو جالك عميل عاوز ياخد أكتر من 20 % من إنتاج مصنعك – إرفض – حتّى لو مش لاقي عملاء تانيين )

–

إرفض

غلط تبيع لأقلّ من 5 عملاء – ويا ريت يكونوا 10 عملاء – ويا ريت لو يكونوا أكتر

عشان لمّا واحد منهم يقع – إنتا ما تتأثّرش

فتخيّل لمّا تكون بتبيع لعميل واحد !!

–

يا جماعة الأخطاء تكراريّة – ما فيش إبداع في الأخطاء

إحنا بنكرّر الأخطاء بالكربون !!

–

لمّا حكيت لصاحب المصنع اللي كنت معاه في الاستشارة النهارده عن الحاجات اللي المفروض كان ياخد باله منها – قال لي ( إنتا كنت معانا ؟! )

قلت له يعني إيه ؟

قال لي إحنا كنّا بنعمل كده بالظبط

–

وحوالينا 3 أو 4 مصانع دلوقتي – دول فتحوا بعدنا كمنافسين لينا لمّا لقوا السبّوبة ماشية – ودلوقتي بيعملوا نفس أخطائنا بالظبط

قلت له ما تقلقش – بكره يقفلوا بردو

هههههههه

–

فاكر لمّا قلت لك ال 30 ألف ربح – شيل منهم 20 ألف راتب – دا الناس ما بتحسبوش

المصانع المنافسة دي هيفضلوا يركنوا 30 ألف ربح في الشهر

يعني 360 ألف ربح في السنة

–

بعد 5 سنين هيجمّعوا مليون و 800 ألف صافي ربح

هيكتشفوا إنّ المكن ما عادش نافع – فهيبيعوه خردة ب 200 ألف

يحطّوهم على المليون و 800

يبقوا 2 مليون

يروحوا يشتروا بيه مكن جديد !!

–

يعني اشتغلوا ال 5 سنين للوطن بسّ – مش لله كمان سبحانه وتعالى – الله سبحانه وتعالى لا يحبّ إضاعة المال

–

وكلّ دا كان ليه ؟

عشان انتا كنت ناسي بند الراتب

همّا ناسيينه – وناسيين كمان بند ( إهلاك الماكينات )

–

الفشل منتشر- لإنّ المنتشر هو المعلومات الخاطئة – مش بسبب سوء الحظّ !!

ما تتصوّرش إنّ المعلومات الصحيحة منتشرة – المنتشر هو المعلومات الخطأ

–

ما هو بأمارة إيه يعني ؟!

بأمارة إيه معلوماتكم صحّ – ولمّا بتطّبقوها تقوم ضاربة في وشّكم ؟!!

فتسيبوا المعلومة الغلط غلط زيّ ما هيّا – وتدوّروا في أماكن تانية ؟!

–

دا مرجعه طبعا للكبر اللي بيمنع الإنسان عن اتّهام نفسه بالجهل

الإنسان يتّهم نفسه بأيّ حاجة – إلّا الجهل

وبعدين الجهل يمنعك عن الاعتراف بالجهل – فتكمّل في الجهل – جهل مركّب يا مان – closed loop

–

الخطوة الأولى للعلاج هي الانتباه للموضوع ده – وترك الكبر والاعتداد بالمعلومات المتوارثة كإنّها صحيحة لإنّها فقط متوارثة – والاعتراف بالجهل – وتعلّم المعلومات الصحيحة

–

النكتة بقى إنّ واحد يكون عنده 3 تصرّفات غلط سبّبوا فشل المشروع

فبعد ما يفشل – ويعترف بجهله – يكتشف معلومة من ال 3 الغلط – فيقول لك أنا خلاص عرفت الغلطة كانت فين !

فيقوم مجرّب تاني !!

وطبق الأصل العلقة اللي فاتت – لإنّ لسّه فيه تصرّفين غلط شغّالين معاه في تعجيز المشروع وهوّا مش حاسس بيهم !!

–

ما هو خالك حسن اللي قال لك على معلوماتك دي – مات مرفّص من الجوع – بتاخد كلامه حكمة بامارة إيه ؟!

وعمّالين بسّ يقولوا كلام كتب وكلام نظريّ – كان كلامهم العمليّ نفعهم !!!

–

الجهل منتشر – وللأسف معظم اللي بيدخل الصناعة بيدخلها من باب التطوّر من الناحية الفنّيّة

–

يعني كان شخص فنّيّ بيفهم في تصنيع منتج ما – فقام مجمّع قرشين – وباع دهب الوليّة – وقام عامل مصنع للمنتج ده

فهوّا تحوّل من فنّيّ في المجال – لصاحب مصنع في المجال – من غير ما يمرّ على مرحلة ( تعلّم البيزنس ) !!!

ومتخيّل إنّ مهارته الفنّيّة – هتشغّل له البيزنس

–

حاجة كده زيّ ما تكون فاكر مهارتك في سواقة التاكسي – هتخلّيك تعرف تتكلّم انجليزيّ مع السيّاح – how come

–

يا فندم – مهما تكون شاطر فنّيّا – فلازم تتعلّم بيزنس قبل ما تعمل مصنع

–

ودا اللي بنحاول نعمله على الصفحة هنا – وعلى القناة على اليوتيوب – ألا وهو نشر العلم وإزالة الجهل

شوف سلسلة ( مفاهيم مهمّة في البيزنس ) – وما تطلبش الرابط

لعلّها تكون مساهمة في النجاح للجميع

وبالتوفيق للجميع لكلّ خير

والسلام عليكم ورحمة الله وبركاته

المصدر