السبب المباشر والسبب العارض, دي مغالطة منطقية بيقع فيها ناس كتير لو ما كانوش مرتبين دماغهم
والناس واقعة فيها دلوقتي فعلا بسبب موضوع قطع الكهرباء . فريق بيقول الكهرباء بتقطع بسبب الإهمال . وفريق بيقول الكهرباء بتقطع بسبب ارتفاع الحرارة
يعني إيه سبب مباشر وسبب عارض ؟!
خلينا ناخد مثال
حنفية مفتوحة على حوض مقفول
الحوض اتملى ووقع ميه على الأرض
فنسأل سؤال . ليه الميه وقعت على الأرض ؟!
هل لإن الحنفية مفتوحة ؟!
ولا لإن الحوض مقفول ؟!
قبل ما نجاوب على السؤال ده لازم نسأل سؤال تاني
ألا وهو
إيه الطبيعي في الحالة دي أصلا
هل الحوض دا معمول عشان يتملى بالميه . بنشطف فيه صحون مثلا فمحتاجينه مليان على طول
ولا الحوض معمول عشان بنغسل فيه . فمحتاجينه يكون سالك
لو الحوض معمول عشان يتملى بالميه
وفضلت الحنفية شغالة عليه لحد ما الميه وقعت على الأرض
يبقى سبب وقوع المياه على الأرض هو استمرار فتح الحنفية
ولو الحوض معمول عشان الغسيل . والمفروض يكون سالك . والمياه وقعت على الأرض . يبقى السبب إن الحوض كان مقفول
مثال ثاني /
طفل بيلعب . وأب عصبي . فالأب زعق في الطفل عشان يبطل لعب
يا ترى سبب الزعيق ده هوا . شقاوة الطفل . ولا عصبية الأب ؟!
قبل ما نجاوب على السؤال ده لازم نسأل سؤال تاني
ألا وهو . هوا الطبيعي إن الطفل يلعب ولا لأ ؟!
لو كان مش الطبيعي إن الطفل يلعب
يعني مثلا الطفل دا كبير وعاقل. واحنا عند ضيوف مثلا . ومفهمينه يلتزم الأدب عند الضيوف . لكن الطفل ما عرفش يمسك نفسه وبدأ يتشاقى ويعمل إزعاج عند الضيوف ويسبب إحراج لأبوه
هنا نقول إن السبب في الزعيق هو شقاوة الطفل
لكن لو دا طفل صغير . واحنا في البيت . والطفل بيلعب . فالأب زعق له . يبقى هنا سبب الزعيق هو عصبية الأب
لإن لعب الطفل هنا هو العادي
العادي إن دا طفل . وفي بيته . فبيلعب . مش هيحضر دكتوراه يعني
المثال الثالث /
الحرارة ارتفعت . فالكهربا قطعت
هل السبب إن الشبكة مهملة وغير مجهزة لنقل الكهرباء خلال درجات الحرارة العالية ؟!
ولا السبب إن الحرارة ارتفعت ؟!
قبل ما نجاوب على السؤال ده . لازم نسأل سؤال تاني
ألا وهو
هوا الطبيعي إن الحرارة ترتفع ؟!
ولا الطبيعي إن الشبكة تكون مهملة ؟!
لو الطبيعي إن الحرارة ترتفع . يعني احنا في دولة مسجل فيها وصول درجات الحرارة قبل كده لمعدلات كذا . وليكن ٤٥ درجة مثلا
وأثناء التصميم حطينا معامل أمان ٥ درجات زيادة مثلا . يعني تصميم الشبكة المفروض يكون على درجات حرارة ٥٠ درجة مثلا
وتيجي الشبكة تقع عند ٤٣ أو ٤٤ . يبقى سبب قطع الكهرباء هو الإهمال في الشبكة
لكن لو مش الطبيعي إن درجات الحرارة توصل ل ٤٣ أو ٤٤ . وليكن احنا في أوروبا مثلا . وجات الحرارة ارتفعت فجأة لسبب عارض . فالشبكة وقعت . هنا نقول إن السبب هو ارتفاع درجات الحرارة
الأمثلة في هذا السياق كثيرة جدا طبعا
وهتقابلك في حياتك وشغلك
فاتعلم قبل ما تدخل في مهاترات في إجابة سؤال ( #إيه_السبب )
إنك تتريث . وترجع خطوة للخلف . وتجاوب سؤال ( #إيه_الطبيعي )