كتبت بوست عن ما ينبغي أن تكون عليه المرتبات
ف طبعا المكتوب في البوست أحسن بكتير من الواقع
ف دخل لي ييجي ١٠ معلقين ( لحد دلوقتي ) كل تعليقاتهم تدور حول إن الكلام دا مش موجود في الواقع . دا الواقع أقل من كده بكتير . هوا المرتب بيكفي ليوم ١٠ في الشهر . و الاسطوانات الحزينة دي.
طبعا خدوا بلوكات.
لكن . خليني أوضح لحضرتك إني مش باكتب عشان اوصف الواقع
هوا حضرتك مش عارف واقعك ؟!
محتاجني أوصفهولك ليه ؟!.
آه !!
إنتا عاوز تندب وانا اندب قصادك ونقضيها ندب وبتاع . بترتاح انتا في الندب
طيب فيه ناس كتير بتندب . حضرتك تقدر تتابعهم . هيعطوك شحنة ندب تكفيك لسنين قدام.
الحقيقة إن الناس محتاجة حد يشاور لهم على الصح اللي مش موجود . مش على الغلط الموجود
الغلط الموجود هما عايشينه.
تخيل واحد عربيته مغروزة
هل دا محتاجك تقول له عربيتك مغروزة
ولا محتاجك تشده ؟!.
واحد بيعاني من أعراض مرضية
هل دا محتاجك تقول له إنك بتعاني أكتر منه
ولا محتاجك توصف له دوا ؟!.
لأ فيه ناس فاكرة الموضوع سباق . تقول له إيدي بتوجعني . يقول لك دانا إيدي ورجلي وضهري بيوجعوني.
هوا سباق ؟!
إنتا بتتحداني يعني في التعب ؟!
يا أهل الخير . وصف الواقع لغو
إحنا محتاجين حد يوصف الحل . مش يوصف المشكلة !!