– واحد صاحبي قعد يدعي يا رب أنا عايز شقة واتجوز وعربية ومش عايز حاجة تانية، بيقولي ربنا فتح عليا لحد ما جت الـ 3 حاجات دي وبعدها كأن حنفية واتقفلت !!
– واحدة قعدت سنين مش بتخلف راحت عند الكعبة وقالت يارب أنا عايزه أي عيل حتى لو مشوه .. حملت فعلا ولما ولدت طلع الطفل مشوه فعلًا وداخت بيه على المستشفيات
وانت بتدعي بلاش تتقشف !!
يعني مثلا انك تقول يارب ارزقني بعربية ولو حتى بباب واحد او انك تقول يارب ارزقني بأي شغل وخلاص ..
سيدنا يوسف قال : {قَالَ رَبِّ السِّجْنُ أَحَبُّ إِلَيَّ مِمَّا يَدْعُونَنِي إِلَيْهِ}.
يقول ابن كثير رحمه الله.. يوسف عليه السلام دعا الله أن يسجن فاستجاب له الله وسجن .. ولو أنه قال ربي العافية والنجاة أحب إلي لعوفي ونجا
وانس المنطق وانت بتدعي !!
يعني ادعي ربنا بكل اللي نفسك فيه وماتشغلش بالك ازاي الدعوة دي هتتحقق !!
سيدنا زكريا دعى ربنا انه يرزقه بالولد مع ان سنه كان كبير وزوجته مش بتخلف بس ربنا ﷻ قال: “هُوَ عَلَيَّ هَيِّن” ..
سيدنا إبراهيم ساب اهله “بِوَادٍ غَيْر ذِي زَرْع” بس لما جه يدعي قال {وَارْزُقْهُمْ مِنْ الثَّمَرَات}
وانت بتدعي خليك طماع .. اسأل كتير وادعي باكتر من اللي نفسك فيه .. ده انت بتسأل رب كريم!! 
النبي(ﷺ) بيقول {إذا تمنى أحدكم فليستكثر، فإنما يسأل ربه } ..
سيدنا موسى طلب من ربنا ﷻ 7 حاجات مرة واحدة وكان الرد ساعتها: {قَالَ قَدْ أُوتِيتَ سُؤْلَكَ يَا مُوسَىٰ}.
ادعي بكل حاجه مهما كانت صغيره .. ورد في الأثر: أن موسى عليه السلام قال: يا رب ! إنه ليعرض لي الحاجة من الدنيا فأستحي أن أسألك .. قال الله ﷻ: سلني حتى ملح عجينك وعلف حمارك.
ولو عايز تعرف يعني ايه حسن الظن بالله !! شوف دعوة سيدنا سليمان يُفتن ويستغفر وفي نفس الدعوة يسأل ربنا مُلكاً لا ينبغي لأحد من بعده
قال تعالى: {وَلَقَدْ فَتَنَّا سُلَيْمَانَ وَأَلْقَيْنَا عَلَى كُرْسِيِّهِ جَسَدًا ثُمَّ أَنَابَ قَالَ رَبِّ اغْفِرْ لِي وَهَبْ لِي مُلْكًا لّا يَنبَغِي لِأَحَدٍ مِّنْ بَعْدِي إِنَّكَ أَنتَ الْوَهَّابُ}
سيدنا عمر بيقول (أنا لا أحمل هم الإجابة ولكن أحمل هم الدعاء)
وخليك متأكد وانت بتدعي أن الله هو القريب، المجيب، الرزاق، الوهاب.