خلّينا نعيد ونكرّر ونؤكّد على بعض المفاهيم
أوّلا : الفلاح هو تحقيق الهدف #الجيّد
معيار الجودة إيه ؟ مش موضوعنا
لكن ببساطة
الدين
ثمّ العرف والأصول والأخلاق
ثمّ القواعد والمنطق والقوانين
لكن – زيّ ما قلت لك – مش موضوعنا
ثانيا: النجاح هو #تحقيق الهدف
مش مهمّ هنا جيّد ولّا مش جيّد – ولكن المهمّ هو التحقيق
ثالثا: هل الفلوس مهمّة ؟!
الفلوس مهمّة في الفلوس
يعني، لو بتسألني عن معيار النجاح في الفلوس
هقول لك – هو الفلوس
حضرتك عامل مشروع بتبيع بزّازات مثلا
إزّاي أحكم على المشروع ده إذا كان ناجح أو مش ناجح
هاحكم عليه بالفلوس
بسّ انا بفيد المجتمع
يبقى من الأوّل حدّد هدفك معايا
هل انتا عامل المشروع عشان تفيد المجتمع
حلو جدّا
يبقى هقيّمك بمقدار #تحقيق الهدف اللي انتا كنت حاطّه لنفسك
يعني ممكن بردو تطلع مش بتفيد المجتمع ولا حاجة – مش كلّ مشروع خيريّ هو مشروع ناجح – حتّى المشروع الخيريّ بيتقاس بمقدار تحقيقه لأهدافه اللي هوّا حاططها لنفسه أصلا
لكن – ما تبقاش عامل المشروع عشان الفلوس – ولمّا تفشل في الفلوس – تقول لي أقيّمك على مسطرة نفع المجتمع
ف لو عاوز تقول ( الفلوس مش أهمّ حاجة ) – مش هاعترض عليك – ولكن هسألك ( إحنا بنتكلّم في مساحة إيه أصلا ؟ )
لو بنتكلّم في مساحة الفلوس – ف أهمّ حاجة في مساحة الفلوس هيّا الفلوس حضرتك
لو بنتكلّم في مساحة جودة الحياة مثلا
ف هنا هنقسم المقارنة لمساحات – بنسب
تعالى نحطّ مساحة للصحّة
مساحة للأسرة
مساحة للثقافة
مساحة للترفيه
مساحة للفلوس
ونحكم على كلّ مساحة إحنا محقّقين فيها كام
ونجمع وناخد متوسّط – يطلع لنا رقم
في الحسبة دي ممكن فعلا يطلع واحد بيكسب أكتر من التاني
لكن التاني مجموعه أحسن من الأوّل
زيّ ما ممكن تجيب أكتر منّي في الفيزياء مثلا – لكن أنا أجيب مجموع #كلّيّ أكبر منك – هنا عادي
لكن – مش هيبقى من حقّي وقتها أقول إنّي أشطر منّك في الفيزياء !!
للأسف الناس بتبقى من الأساس مش محدّدة كلامها – وبعدين تقوم ضاربة كلمة كده ف الهوا وعاوزة تعمّمها ك حكمة !!
وفي المقابل بردو اللي بيقول أهمّ حاجة الفلوس بيبقى مش محدّد هيّا أهمّ حاجة في الإيه
وخلّيني أقول لك إنّه كمان فيه مساحة تفصيليّة ما اتكلّمتش عنها هنا
ألا وهي
إنّي قلت لك حدّد #إنتا هدفك لنفسك – ونقيّمك على أساسه
بينما أحيانا يكون النجاح بيقاس على الهدف القياسيّ في المجال بتاعك
يعني، لو طالب حدّد لنفسه إنّه عاوز يجيب 30 % في الفيزياء
وبالفعل جاب 30 %
دا يبقى ناجح ولّا فاشل ؟!
أنا بقول لك – حدّد انتا هدف لنفسك – وانا موافق – بسّ نتحاسب على الهدف ده آخر السنة
والهدف نفسه ليه معايير لتقييم هل هو هدف صحيح أو لأ
المعايير دي بتختصر في حروف SMART
يعني، يكون هدف محدّد – قابل للقياس – ممكن التحقيق – مرتبط بالمجال – ومحدّد بفترة زمنيّة
لكن أنا بقول لك – ما ترتبطش بالخمس حاجات دول
قول لي بسّ انتا كان هدفك إيه – ووصلت لإيه – أقول لك انتا ناجح او لأ
لكن بلاش حدّ يقول ( الفلوس أهمّ حاجة )
أو حدّ تاني يردّ عليه ويقول له ( الفلوس مش أهمّ حاجة )
كده في المطلق
ومعتبرينّا هناخدها منّه باعتبارها حكمة بالغة !!
هل النجاح بيتحسب بالفلوس ؟
شوف حضرتك – فيه إجابتين – واحدة ساذجة – وواحدة راقية
الإجابة الساذجة هي: النجاح في الفلوس – بيتحسب بالفلوس
يعني حضرتك عامل بيزنس عشان تكسب فلوس
يبقى النجاح فيه بيتحسب إزّاي ؟
بيتحسب بالفلوس حضرتك – أمّال هيتحسب بالفليكسات يعني ولّا إيه
طب انا رحت اشتغل في السعوديّة واتنصب عليّا وعملت عمرة ورجعت
طب مفهوم الأرزاق
طب انتا عارف الفرق بين التوكّل والتواكل
طب هوّا حتميّة السعد تؤدّي لرجعيّة الهدف ولّا لفوزيّة المبتدأ
طب سمعت د مصطفى محمود بيقول …
يا فندم
النجاح في الفلوس – بيتحسب بالفلوس، فالموضوع مش مجال للمرقعة
ما تعملش زيّ العيّل الفاشل اللي تقول له جايب كام في الدراسات – يقول لك اخويا جايب 50 من 50 في الماث
ماث، الله يرحم جدّك
أنا بسألك انتا – عن الدراسات – لا بسألك عن الماث – ولا بسألك عن اخوك
بسألك عن البيزنس بتاعك – بتاع الفلوس
يبقى تردّ عليّا بالفلوس
دي الإجابة الساذجة
الإجابة الراقية بقى هي إنّه ( فيه فرق بين النجاح – والفلاح )
النجاح هو تحقيق الهدف
والفلاح هو تحقيق الهدف الجيّد
يعني، هل إسرائيل نجحت في احتلال سيناء سنة 1967 ولّا لأ ؟
نجحت طبعا
وده نجاح ؟
أيوه نجاح، أمّال أقول لك فشلت !!
أمّال احنا عملنا فيلم الرصاصة لا تزال في جيبي ليه
النجاح هو تحقيق الهدف، ما حدّش في مفهوم النجاح بيتكلّم عن كون الهدف في حدّ ذاته جيّد ولّا سيّء
بينما الفلاح هو تحقيق الهدف الجيّد،
عشان كده في الآدان بنقول حيّ على ( الفلاح )
فلو حضرتك بتتكلّم عن الفلوس – وعاوز تتناقش بالمفهوم الراقي – بتاع قهاوي وسط البلد – وتسيبك من الكلام الساذج بتاع الدهماء اللي فوق اللي بيقعدوا على قهاوي امبابة
يبقى النجاح في مجال الفلوس هوّا إيه حضرتك ؟
يبقى بردو إنّك تكسب فلوس
بردو ؟!
أمّال انتا فاكر إيه حضرتك