الكثير من الناس بيحكوا عن قدّ إيه همّا #عافروا ورا مشروعهم ده لحدّ ما نجح وبقى بالشكل اللي انتا شايفه دلوقتي ده
ف – هل المعافرة دي شيء جيّد ولّا سيّء ؟!
إجابة السؤال ده تعتمد على ( حقيقة الشيء اللي انتا مسمّيه معافرة )
ف كما تقول القاعدة ( الحكم على الشيء فرع عن تصوّره )
يعني – ممكن يكون فيه تصرّفين مختلفين – الاتنين أصحابهم بيسمّوهم معافرة
فيه واحد خد الموضوع بالصدر كده – بالدراع – وقعد يلوّش – ويطبّش – تضرب معاه من هنا – يروح لها من هنا – تبوظ معاه كده – يعملها كده
ده بيسمّي رحلة حياته ( معافرة )
وفيه واحد كان دارس قبل ما يتحرّك – ولمّا اتحرّك ظهرت له صعوبات – كان متوقّعها – وحاطط لها خطط احتياطيّة
ف اشتغل على تنفيذ الخطط دي – خدت منّه وقت اومجهود – لحدّ ما وصل للنتيجة بفضل الله سبحانه وتعالى
الاتنين هيوصفوا رحلتهم بإنّها ( معافرة )
ف أعتقد حضرتك كده عرفت المعافرة حلوة ولّا وحشة