بمناسبة موضوع قفل بعض فروع شركة بـ لبن – ناس كتير علّقت إنّ الدولة حطّت مناخيرها في الموضوع وعاوزين يشاركوهم ف الرزّ بلبن – يا إمّا نقفل لكوا المحلّات
وطبعا الفكرة دي بتلاقي رواج جدّا – لسببين
السبب الأوّل – إنّها بتحسّسك لمّا بتقولها إنّك واد عميك – عندك رؤية مبعديةّ – وقاري ومتسقّف ومستوعب الأشياء
السبب التاني – إنّها مبرّر جيّد جدّا لكلّ فاشل إنّه بدل ما يقول أنا فاشل – يقول لأ – أنا ناجح – بسّ الدولة هيّا اللي مستقصداني
الدولة هتستقصدك انتا يا فسل – هتطمع فيك على إيه – على مالك ولّا جمالك ولّا قرعتك
يعني تقصد تقول الدولة أجدع ناس وما بتتدخّلش في البيزنس ؟!
لأ
تبقى الدولة بتتدخّل اهو
لأ بردو
دي طريقة كلام سطحيّة – واحنا ما اتعوّدناش هنا على السطحيّة
تعالى أشرح لحضرتك الحالات اللي حضرتك هتتقاطع فيها مع الدولة في المصالح في البيزنس
#الحالة_الأولى /
#الصناعات_الاستراتيجيّة
هل حضرتك عندك مصنع حديد وصلب
مصنع أسمنت
شركة إنتاج سينيمائيّ
مصنع سيّارات
شركة مقاولات من اللي بتبني مدن
لأ
أمّال واجع دماغنا ليه – أقعد في حتّة
#الحالة_الثانية /
#المشاركة_في_الفساد
ممكن حضرتك تكون عندك شركة مقاولات – بسّ عاوز تاخد مقاولات من الحكومة بالإسناد المباشر
عندك شركة مفروشات – وعاوز تبيع ملايات سرير للمستشفيات – ودي مصلحة لوز اللوز – بسّ عاوز تبيع الأوّل لهيئة الشراء الموحّد
عندك مصنع أثاث معدنيّ – وعاوز تبيع تخت لهيئة الأبنية التعليميّة
ف – بتروح تجيب حدّ – موظّف كبير سابق في الدولة – وتدخّله معاك شريك – عشان يسهّل لك الدخول في اليغمة دي
في الحالة دي – لمّا تيجي تتمرقع وتقول الدولة بتقاسمني في رزقي – يبقى تروح تتمرقع على حدّ تاني
إنتا شريك في الفساد – عضو في عصابة يعني – ما تجيش تقول لي شريكي في العصابة ما قسمش معايا السرقة بالعدل
عدل مين يا كتكوت – دا انتا عاوز الحرق انتا وشريكك
ف – بردو – اللي زيّ ده – يركن على جنب
نيجي بقى للحالة التالتة – وهي الأهمّ في البوست ده
#الحالة_الثالثة /
#فيها_يا_اخفيها
الحالة السابقة – كنت انتا بتروح تجيب مسؤول من الدولة يشاركك – بتروح بنفسك
الحالة دي – بييجي المسؤول السابق في الدولة – أو الحالي – وعاوز يفرض عليك الشراكة
طيّب هتدفع كام ؟
كام إيه يا مون بيه – أنا هجيب لك شغل
ما انا بجيب شغل لوحدي
ما تفتّح دماغك معايا يا ضياء بيه
وبعدين تلاقي بدأت الرخامة تظهر – ومع كلّ عفريت يطلع لك في الشركة الصبح – تلاقي مكالمة من عماد بيه بالليل
إيه – فكّرت في موضوع الشراكة ولّا لسّه يا ضياء بيه
يعني تلاقي الحيّ جايب لك مخالفات إنّك ما عندكش طفّايات
عندي طفّايات اهي
لأ دي فاضية
لأ مليانة
مليانة – بسّ مش ممليّة في جهة رسميّة
ممليّة في جهة رسميّة – والختم اهو
الختم مش واضح
إلى آخره من رخامة الميري اللي اللي عمله ما عرفش يعيش بيه
طيّب الحلّ في الحالة دي إيه ؟!
هوّا حضرتك الراعي لمّا بيخاف على الغنم من الديب – بيعمل إيه ؟!
بيجيب كلب يحرس الغنم ضدّ الديب
كنت مرّة في استشارة لشركة – وعرفت في بداية الاستشارة إنّ الشركة شغّالة في حجم أعمال كبير- وبيكون ظاهر قدّام الدولة
ف قلت له ( إنتا تعيّن عندك موظّف حكوميّ سابق – هيكون إسمه #علاقات_عامّة – ويكون يعني كان رائد – مقدّم – حاجة في الرينج ده )
قال لي ( أنا معيّن عميد في العلاقات العامّة )
فيه مثل بيقول ( اللي يشتغل قصّاب – يأني الكلاب )
قصّاب يعني جزّار – ويأني يعني يقتني
ف الجزّار محتاج كلاب حوالين الجزارة تنضّف المكان من بواقي اللحمة
ف حضرتك ك صاحب شركة – والشركة بتكبر
كنت بتحطّ فلوسك في درج المكتب – جبت خزنة
كنت بتنقل الفلوس في شنطتك – بقيت تنقلها من خلال شركة نقل أموال
حضرتك بتصرف على الكلام ده
حطّيت سيستم كاميرات
إشتريت سيستم محاسبات
كلّ دا حضرتك بتصرف عليه
وتبقى #مدير_خايب لو ما تفاعلتش مع كبر شركتك بشكل تدريجيّ – إنّك في كلّ مرحلة بتوفّر لها وسائل التأمين المناسبة للمرحلة
من وسائل التأمين بالمناسبة – التشتيت
يعني – تخلّي بدل ما ليك نشاط ب 100 مليون
تخلّيهم نشاطين – كلّ نشاط ب 50
أو 5 أنشطة – كلّ نشاط ب 20
ف تبقى في كلّ نشاط من الخمسة أقلّ من إنّ عين الذئاب تشوفك
ويفضّل تعمل الأنشطة دي في محافظات مختلفة
وكلّ برغوت على قدّ دمّه بقى
لو بقوا 1000 مليون – خلّيهم 5 أنشطة في 5 دول – كلّ دولة ب 200 مليون
بقوا مليارات – دخّل شركاء أجانب – إلخّ
كتبت بوست سابق عن الموضوع ده والناس استهزئت بيّا – لحدّ ما حصل موضوع شركة جهينة
وجم بعدها بنات فريد خميس عملوا شركة في انجلترا اشتروا بيها أسهمهم في شركة مصر – ف الناس قالت هيييييه
مع إنّي كنت شارحها قبلها ييجي بسنة !!
حضرتك مش مطلوب منّك تكون شاطر فنّيّا فقط
ولكن – مع كبر حجم أعمالك – بتكون مطلوب منّك تكون شاطر سياسيّا كمان
عشان كده الناس بتستغرب لمّا تلاقيني باحكي في التاريخ مثلا – ما كلّه بيخدم البيزنس
ستظلّ فقيرا ما لم تتعلّم البيزنس
وستظلّ غبيّا ما لم تتعلّم السياسة
وكلّنا شفنا نموذج الشخص الذكيّ جدّا – اللي راح يسحب فلوسه كلّها بالدولار مرّة واحدة – ف الذئاب خطفتها منّه – الذكاء وحده من غير فهم السياسة لا يكفي
أمّن نفسك
إعتبر إنّك في حرب – مش بيزنس
حضرتك لو وصلت لحجم معيّن – من غير ما تأمّن شركتك بكلاب مقابل الذئاب – ف حضرتك اللي مقصّر
وما تلومش الذئاب بعد كده لمّا تدخل تخطف منّك غنمة ولّا غنمتين
ف – هل أصحاب شركة بلبن نغّة يعني – ومش عاملين حساب إنّ حدّ ييجي عاوز يخطف منهم غنمة
آه نغّة
يبقى يستاهلوا
بسّ دا فساد – دا ظلم
ماشي
ماشي إيه
ماشي – ماشي طيّب – هروح املّص لك ودانهم عشان يبطّلوا فساد
ولّا بتوع بلبن مش نغّة – بسّ عكّوا بزيادة لدرجة إنّه لا بقى العقيد نافع ولا العميد شافع – يبقى اللي يشيل قربة مخرومة تخرّ على راسه
أمّن شغلك – يا إمّا ما ترجعش تعيّط
اللي قدّ الكحل تتكحّل – واللي تحبّ الدحّ – ما تقولش أحّ
ومن منظور علميّ – دا تبع تحليل إسمه PESTEL
بيدخل فيها الأمور السياسيّة والقانونيّة إلخّ
لو انتا مش حالة من التلاتة اللي فوق – وبتقول أصل البلد مستنصداني – ف شوف حدّ تاني تتمرقع عليه
بيقابلني كتير حالة اللي يقول لي – الحكومة مستقصداني في التراخيص
مستقصداك ازّاي يعني ؟!
تخيّل عاوزينني أركّب طفّايات
ما تركّب أمّ طفّايات – عاوزنا نعمل لك إيه يعني ؟!
الحكومة مستقصداني وكلّ يوم يجيبوا لي لجنة من الصحّة – تخيّل قال إيه عاوزينني ألبس جوانتي في إيدي وانا باعجن – قال إيه وأحطّ غطاء رأس على شعري عشان ما يقعش في الأكل
تخيّل الموظّف لقاني بامسح بربوري بإيدي وانا باعجن – قام عمل لي محضر
قطع الأرزاق دا يرضي مين بسّ يا اخواتي – دانا مزلوم زولم
أنا رحت مصنع جبنة لقيت فيه قطط وعصافير حضرتك
وطبعا صاحب المصنع ده لمّا تجي له لجنة هيقول لهم انا عندي 25 ألف موظّف – هتقطعوا عيشهم يعني ؟!
ويطلع ع النتّ يقول لك الحكومة عاملة مؤامرة عشان تشاركني في مصلحة الجبنة !!
والناس هتتعاطف معاه – مع إنّه بيسمّهم – هنتعاطف معاه – بسّ مش هنجيب خالص سيرة العكّ اللي هوّا بيعكّه
ف – كقاعدة عامّة – ما تتعاطفش بسرعة
لو عرفت الكواليس الحقيقيّة – هتلوم الحكومة أصلا إنّها ليه سايبة 90 % من الناس ما بتقفلّلهمش شغلهم
انا رحت استشارة لمصنع مستحضرات تجميل في أكتوبر – خدت مواصلاتي ومشيت من اللي شفته – ما خدتش تمن الاستشارة
تخيّلت بنت من بناتي لو حطّت حاجة من منتجات الشركة دي على وشّها – هل دا يرضيني
الشركة التانية كانت متوقّفة بالمناسبة – عشان ما تقولّليش ليه ما بلّغتش عنهم
والشركة الأولى – بتاعة الجبنة – الزيارة كانت بغرض بيع المصنع أصلا – لإنّ صاحب المصنع مش قادر يعمل مع العمّال أكتر من كده
المصنع في عزبة – والعمّال أهل العزبة دي – وصاحب المصنع مش قادر يعمل معاهم أكتر من كده
ف هيبيع المصنع وينقل لمدينة صناعيّة عشان يقدر يعمل نظام نضيف من البداية
لكن – أرجع واقول لك – ما تتعاطفش بسرعة مع أيّ واحد يدّعي المظلوميّة
دي عالم بتتمرقع – ويطلعوا يقولولا لك أصل الحكومة عاوزانا نشخلل عشان نعدّي
وللأسف زيّ ما قلت في بداية البوست – الإدّعاء ده بيلاقي رواج عند الناس – لسبب إنّك بتبان ناصح – ولسبب إنّ الفاشل بيلاقي شمّاعة يعلّق عليها تقصيره
وممكن يعملها بالمجاملة بالمناسبة – ههههههههههه
يعني أنا مش طرف في الموضوع – لكن – هقول إنّ الحكومة مستقصدة بلبن
عشان لمّا فشلي أنا يظهر – أقول إنّ الحكومة مستقصداني – زيّ ما كانت مستقصدة بلبن