هل ممكن تدفع مليون جنيه في كورس ؟!
شوف حضرتك
الكورس المفروض هينقلني من مستوى س لمستوى ص
ولنفترض عندنا ١٠ مستويات فقط
وليكن المجال مثلا هو مجال البيع
فهيكون أقل مستوى هو مستوى المبتدئين جدا . يعني يا دوب ناس لسه سامعين عن البيع مثلا . وما يعرفوش الفرق بين البيع والتسويق
ومطلوب منهم يعرفوا المباديء اللي بالكاد تؤهلهم يكونوا مندوبين مبيعات في شركات تقليدية . زي شركات بيع الأدوية مثلا . أو يشتغلوا بياعين في محلات ملابس مثلا
وأعلى مستوى هو مستوى الناس اللي بتبيع بيع فيه تفاوض مع مشترين محترفين
زي ما مثلا شركات الطائرات بتبيع الطائرات لشركات الطيران
أو شركة مقاولات عالمية بتبيع خدماتها لدولة عشان تنشأ لها خط سكة حديد مثلا أو ميناء أو مطار
وخلينا نتفق إن طاقة الإنسان واستيعابه يخلوه يقدر ينتقل فقط من مستوى ١ لمستوى ٢
أو من مستوى ٧ لمستوى ٨
يعني مستحيل حد ينتقل من العمل كمسوق لشقة مصيفية في جمصه مثلا لعائلة هتبات يوم واحد وهتدفع ٥٠٠ جنيه . فينتقل فجأة لبيع فندق في شرم الشيخ من شركة مالكة لأخرى هتدفع ٥٠٠ مليون جنيه
لازم هيمر بإنه بدل ما كان سمسار بيأجر شقة للناس ب ٥٠٠ جنيه
لإنه هيبيع الشقة دي لحد هيستقر في جمصه كساكن ب ٥٠٠ ألف جنيه
لإنه هيبيع عمارة في جمصة ب ٥ مليون جنيه
لإنه هيبيع فندق في اسكندرية ب ٥٠ مليون جنيه
فيبيع فندق في شرم الشيخ ب ٥٠٠ مليون جنيه
كل اللي فات دا فرش عشان ابيع لك المعلومتين الجايين دول
المعلومة الأولى /
الكورس ابو مليون جنيه دا . لو بيوعدك ينقلك من مستوى ١ لمستوى ١٠
يبقى فاكس
إنتا لو في مستوى ١ . شوف الكورس المصمم لنقل للناس من مستوى ١ لمستوى ٢.
لو لقيت حد بيوعدك ينقلك من مستوى ١ لمستوى ١٠ . يبقى نصاب.
ولو لقيت كورس بيوعدك ينقلك من مستوى ٥ لمستوى ٦ . يبقى مش مناسب ليك.
ما تدخلوش طفاسة . لإنك مش هتستفيد بيه حاجة . لإن اللغة فيه هتكون لغة الناس اللي من مستوى ٥ . فانتا مش هتفهم الكلام أصلا . فمش هينقلك من حتة لحتة تانية.
فلو سألت مقدم الكورس . ليه الكورس دا بمليون جنيه . فقال لك عشان هينقلك من مستوى ١ لمستوى ١٠ . إعرف إنه نصاب
ولو قال لك عادي إن مستواك يكون ١ . وتدخل كورس مصمم لناس مستواهم ٥ . يبقى غير أمين
النقطة التانية /
لو انتا في مستوى ٨ . وفيه كورس هينقلك من مستوى ٨ لمستوى ٩ . وقيمته نصف مليون جنيه . ادخل الكورس ده
ولو انتا في مستوى ٩ . وفيه كورس هينقلك من مستوى ٩ لمستوى ١٠ . والكورس دا بمليون جنيه . ادخله
فلو سألت مقدم الكورس اللي هينقلك من مستوى ٩ لمستوى ١٠ . ليه الكورس دا بمليون جنيه . ووضح لك فعلا إنه يقدر ينقلك لمستوى ١٠ . فما تستكترش الفلوس
ولو انتا في مستوى ٨ . وحد وعدك ينقلك لمستوى ١٠ . إعرف إن دا جاي من مستوى صفر أساسا
الناس في مستوى ٨ أعقل من إنهم يصدقوا حد بيوعدهم ينقلهم درجتين في نقلة واحدة
ما حصلتش معاهم في ال ٨ مراحل اللي عدوا بيها . ودي كانت مراحل سهلة أصلا . هتحصل معاهم في المراحل الصعبة ؟!!
أخيرا /
مسؤولية النصب في الكورسات هي مسؤولية مشتركة
مشتركة بين محاضر بيبيع الوهم
وبين متدرب طماع
النصاب قرين الطماع . النصاب ما يقدرش ينصب لوحده . لازم يشاركه في النصباية طماع
طماع كان عاوز ينتقل في مرة واحدة من مستوى ١ لمستوى ١٠ . أو حتى ٣