جالي سؤال حلو جدا من أحد الشباب اللي فخور إني شغال معاهم دلوقتي بيقولي فيه إنه بيعرف يستخدم ال AI كويس جدا في معظم شغله و ده بيسرع الوقت جدا و بيخليه يعتمد كل يوم أكتر على تطبيقات الذكاء الاصطناعي … بالتالي:
( هل مع الوقت هنتعود على كده و بالتالي مهاراتنا في كتابة المحتوى و الديزاين و البحث و غيرها هتضمحل مع الوقت بشكل طبيعي؟ )
السؤال عجبني جدا و حبيت أجاوب عليه public علشان تعم الإفادة و أستفيد من تعليقاتكم برضه
خللونا نقسم مراحل تكون المعرفة ل 3 مراحل مشهورين جدا و هما:
Know What
Know How
Know Why
الأولى بنكون على مستوى سطحي من المعرفة … زي مثلا:
كلنا عارفين يعني إيه قهوة … مشروب معمول من البن و المياة و ساعات بنضيف الحليب ، و طرق التحضير بتكون بالكنكه اللي فيها مياة بتغلي مع البن للقهوة التركي أو بماكينة الضغط اللي بتعمل سبرسو و مشتقاته ..
اللي فات ده مجرد Know what
بعد كده ممكن نتعلم نعمل القهوة بنفسنا .. فبندخل لمستوى تفصيلي أكثر عمقا من اللي فات .. و بنتعلم مثلا:
نحط مقدار مياة قد إيه في الكنكه اللي من الحجم و النوع الفلاني مع مقدار قد إيه من البن اللي من النوع الفلاني على النار لمدة قد ايه و نقلب ازاي و نصبها بالوش الجميل ، أو نحط السبرسو في الماكينة ازاي و بمكية قد ايه و هكذا ..
كده بقينا عارفين Know How
المستوى اللي بعد كده و ده فيه العمق الأكبر .. لما نسأل دايما بـ (لماذا) و نعرف الإجابة و نفهمها كويس … فمثلا:
ليه كمية المياة دي ، و ليه كمية البن دي ، و لين الخامة بتاعت البن دي ، و ليه الخامة بتاعت الكنكة دي ، و ليه درجة حرارة النار دي ، و ليه كمية الحرارة دي ، و ليه ضغط الماكينه ده ، و ليه كمية الفوم دي ، و ليه السبرسو الأول أو الحليب الأول ، و ليه و ليه …
المرحلة الأخيرة دي و هي مرحلة ال Know Why
بتكون هي المرحلة الفلسفية … اللي بنقدر من بعدها ندخل في مرحلة التطوير …. بمعنى إن اللي متعلم Know How فقط عمره ما هيقدر يطور و يبتكر طريقة قهوة جديدة مثلا أو ينفذ أي إبداع في مجال القهوة غير لما يوصل لمرحلة ال Know Why!
و انا قاصد أجيب مثال القهوة علشان تكون حاجة عامة كلنا تقريبا عارفينها … و تعالوا نتكلم بقى عن الـ AI
مافيش حد هيقدر يستمر إنه يكسب فلوس بإضافة قيمة فقط عن طريق الـ Know What مطلقا في أي مجال خلاص بعد انتشار و توسع الذكاء الاصطناعي في كل حاجة في حياتنا و لسه اللي جاي أعظم …
و اللي واصل لمستوى ال Know How فقط هتفضل تضمحل فرصة في النمو و هيكون في منافسة شرسة و موقفه هيكون خطر جدا طول ماهو معتمد على مستوى العمق المعرفي اللي هو فيه ده مهما كان مجاله …. حاليا و لفترة مش كبيرة هيقدر يستغل ال AI كويس جدا في كل مراحل شغله طول ماهو فاهم Know How و شغله ممكن يكبر كمان ، و لكن في القريب العاجل حسب صناعته هيبدأ يحس بمنافسه مش في مصلحته طول ماهو مش قادر يدخل لمستوى عمق ال Know Why
أما اللي وصل لمرحلة ال Know Why فعلا في مجاله هيكون هو الأقوى على الإطلاق في استخدام و تطويع الذكاء الاصطناعي بكل مشتقاته أيا كان مجاله ، و هو اللي هيفضل مع الوقت يتعامل مع الـ AI كشريك عمل بيساعده في توفير موارده أو تطوير كفاءته ، و ده الشخص اللي صعب مع الوقت الـ AI يستبدله أو ينافسه حتى في المهام البسيطة اللي كلنا شايفين الـ AI مكتسح فيها و بيتوسع بمستوى نمو خيالي!!
تعالوا نرجع للثورات السابقة في العالم في كل المجالات و هتفهموا كلامي أكتر
لما كان عندنا أرض زراعية بمساحة كبيرة و محتاجين نحرث الأرض قبل اختراع الجرار مثلا … كان بيشتغل في الأرض أكتر من 10 مزارعين بالفاس و الأدوات البسيطة على مدار أيام علشان ينجزوا المهمة كويس …
بعد اختراع الجرار بقينا فقط محتاجين سواق الجرار مع مزارع واحد مشرف هو اللي بيوجه الجرار و السواق …
مين بقى المزارع الوحيد ده من ال 10 اللي قعدوا في بيوتهم اللي فضل محافظ على شغله و كمان مرتبه بقى أعلى و الأحلى إن مجهوده البدني بقى أقل ؟
بالظبط … هو ده المزارع اللي فاهم أكتر من الجميع …
فاهم ايه بقى ؟؟
برافو … فاهم الـ Know Why بتاعت الزراعة في الأرض دي للمحصول ده كويس جدا … فاهم ليه بنشتغل في التوقيت الفلاني ، و ليه بنبدأ من النقطة الفلانية ، و ليه بنمشي في المسار الفلاني ، و نعمل كام حرثه ، و لأي مستوى عمق ، و في أي توقيت من المراحل اللي بعد أو قبل كده .. صح ؟
هنلاقي في المثال ده ناس كتير للأسف قعدت في البيت … ولكن هو ده الأصلح للشغل لإن ده اللي هيوفر الوقت و المجهود و الفلوس علشان ناخد محصول أفضل بسعر أفضل … و هنلاقي شغلانه جديدة تماما ظهرت و هي السواق بتاع الجرار … و هنلاقي مزارع خبير شغله بقى أفضل و مكانه محفوظ دايما !
الناس اللي متخيله إن الـ AI هيموت وظايف كتير تفكيرهم مش غلط ولكن هو هيموت كل الوظائف اللي على مستوى عمق معرفي معين ، و هيخلق وظائف جديدة تماما و هتبقى أساسية و الكل بيدور عليها ، و مش هيقدر يموت الوظائف اللي محتاجه عمق معرفي لمستوى ال
Know Why
فلو بتستخدم ال AI في شغلك و انت بالفعل فاهم أكتر منه هو ليه بيعمل كده … فانت في السليم جدا … بالعكس انت كده برافو عليك و استمر استخدم الـ AI و استمر برضه اتعلم أكتر في فلسفة الشغل بتاعك
أما اللي مستواه المعرفي محدود و بيستخدم ال AI فقط لإنجاز مهام قص و لزق … فلازم يلحق يطور مستواه المعرفي أو يدخل في أنواع الوظائف الجديدة اللي هيخلقها ال AI مع الوقت
و النصيحة اللي بقولها لأي حد بيتعلم في مجاله و لسه سنه صغير … دور على المدير الشاطر … الشاطر أوي أوي … المدير اللي فاهم فلسفة الشئ … و لما بيعلمك حاجة مش بيعلمك تعملها ازاي … لأ … بيعملك هو احنا بنعملها كده ليه ؟ و تلاقي نفسك مع الوقت بتكتسب ال Know Why بتاع شغلانتك مش مجرد صنايعي ، لا انت بقيت فيلسوف صنعتك