هل الشغل ما بيقفش على حدّ ؟

هل الشغل ما بيقفش على حدّ ؟
السؤال ده ليه سؤالين قبل ما نجاوب عليه, وهما

إيه الشغل ؟
ومين الحدّ ؟

أوّلا /
إيه الشغل ؟
الشغل اللي لسّه في مرحلة التأسيس – بيقف على حدّ عادي جدّا
لكن – الشغل اللي عدّى مرحلة التأسيس – ووصل لمرحلة المؤسّسيّة – ما بيقفش على حدّ

في غزوة أحد – وبعد الموقف الصعب اللي وصل له المسلمين – وقف أبو سفيان ( وكان لسّه في فريق المشركين ) وسأل –
أفي القوم محمّد ؟
يعني – هل محمّد ( عليه الصلاة والسلام ) قُتل ؟
أفي القوم ابن أبي قحافة – سيّدنا أبو بكر يعني
أفي القوم عمر ؟
في الوقت ده – الإسلام – لو كان فقد الرسول صلّى الله عليه وسلّم – وأبو بكر – وعمر – رضي الله عنهما – كانت الدعوة انتهت

والرسول صلّى الله عليه وسلّم قال كده – دا مش كلامي
الرسول صلّى الله عليه وسلّم يوم بدر قال ( اللهمّ إنّك إن تهلك هذه العصابة ( يعني الجماعة من الناس ) – فلا تعبد في الأرض أبدا )
ف – فيه مرحلة من مراحل المشروع – يقف على حدّ أيوه

لكن, تأمّل يوم وفاة الرسول صلّى الله عليه وسلّم
لم يضع الدين

لكنّه لو كان مات عليه الصلاة والسلام يوم بدر أو أحد – كان ضاع الدين
ف فيه مرحلة قبلها بنقول – الشغل ده يقف على حدّ – وبعد الخطّ ده – نقول ما عادش يقف على حدّ

السؤال التاني /
مين الحدّ ؟
لو كان الحدّ ده بيؤدّي دور في المشروع لا يؤدّيه غيره – والدور ده حيويّ – أيوه الشغل يقف عليه

والمؤسّسيّة من دورها إنّها ما تخلّيش الحالة دي موجودة – يعني – ما يبقاش فيه حدّ في الشركة – لو غاب – الدنيا تقف

فورد ( مؤسّس شركة فورد الأمريكيّة للسيّارات ) – دعا مدراء الأقسام في مصنعه في يوم للميناء – المدراء وصلوا الميناء – قام واخدهم في سفينة وطلع بيهم رحلة أسبوع في البحر
رجعوا من الرحلة – القسم اللي لقاه اتهزّ – رفد مديره !!

المدير الناجح دوره هوّا إنّه يخلّي القسم يقدر يشتغل من غيره
أنا عاوز مدير – مش موظّف متعدّد المهام !!

فيه مدير بيحوّل نفسه لموظّف متعدّد المهام – يعني عنده موظّفين – بسّ هوّا بيعمل شغلهم كلّهم !!

دا لو غاب – القسم يقف
ف من واجبك كصاحب شركة إنّك ما تسمحش بده يحصل

وطبعا أوّل حدّ المفروض تطبّق عليه الكلام ده هوّا نفسك
أيّ استشارة لشركة بلاقي صاحب الشركة بيكلّمني عن ( المرحلة التانية ) في حياة الشركة

قبل ما نتكلّم ونحرق جاز يعني – بقول له – تقدر تغيب عن شركتك كام يوم في الأسبوع

لو قال لي عدد أقلّ من 5 أيّام – يبقى خلّينا في المرحلة الأولى – مش هنهري في المرحلة التانية دلوقتي

بسأل صاحب شركة مرّة – تقدر تغيب عن شركتك 5 أيّام في الأسبوع
قال لي أيوه
قلت له ومين بيمشّي الشركة, قال لي إبني
ههههههههههه قلت له لأ – ما كده هيّا هيّا

لمّا تبقى تقدر إنتا وإبنك تغيبوا عن الشركة – واللي يشغّل الشركة همّا الموظّفين فقط – نبقى نفكّر في المرحلة التانية

لكن – دلوقتي – دورنا إنّنا نفكّر في ازّاي نحقّق موضوع إنّكوا تحوّلوا الشركة لشركة تقدر تشتغل من غيركم

ف – لو هتسأل – هل الشغل بيقف على حدّ ولّا لأ
إسال الأوّل سؤالين

1 – الشركة فين – قبل ولّا بعد مرحلة المؤسّسيّة ؟
2 – مين الحدّ – قبل ولّا بعد إنّه بيقوم بدور فريد في الشركة ؟
تعقيب !

والنصيحة كمان للموظّف بالمناسبة !

ما تبقاش شركتك عدّت مرحلة المؤسّسيّة – أو انتا بتعمل دور غير فريد – وتتعوج ع الشركة

هيقبلوا استقالتك ومش هيتشعبطوا فيك زيّ ما كنت فاكر

المصدر