بما ان شعاري دائما واللي هتلاقيه اول حاجه مكتوبه في البروفايل بعد اسمي مباشرة هو انت مش محتاج فكره مشروع او شغلانه تنجح انت محتاج تنجح وتطور طريقة تفكيرك فخليني اقولك الكلمتين دول واعتبرهم كبسوله فكريه
نبدأ بسؤال بسيط وهو …
ازاي تحافظ على صحتك الجسدية؟
عن طريق التغذيه السليمه بشكل اساسي
يعني متبقاش طول حياتك بترمرم اي اكل
وتنتظر بعد كده ان صحتك تبقى في احسن حال
ازاي بقى تحافظ على صحتك العقلية والفكريه؟
نفس الكلام بالظبط عن طريق التغذيه السليمه بشكل اساسي وبلاش ترمرم وتغذي عقلك بأي حاجه من اي حد
وخليني هنا اكلمك عن نقطه محدده وهي البعد عن الرمرمه في طريق شغلك ومستقبلك المهني وتعالى نتكلم عن السؤال المتداول والشائع على لسان اغلب الناس لما يحب حد يتجنب الرمرمه في البيزنس مثلا
هل ينفع اسمع من شخص بيكلمني عن البيزنس – على سبيل المثال – وهو نفسه مش صاحب بيزنس قائم بالفعل؟
خليني اقولك ان اللي بيتكلم ويدي نصائح
في اغلب المجالات هما ثلاث انواع من الناس
النوع الاول هو صاحب علم لانه دارس عن طريق الكتب يعني بينقل لحضرتك ما ورد في الكتب واللي هي اساسا نتاج تجارب حقيقيه لعدد كبير جدا من الناس وعلشان كده بقت قواعد واسس وبالتالي تم تفنيدها في كتب وانا هنا بقصد كتب عالميه ومشهوره وناس كتيره مشهوره على مستوى العالم نصحونا بقراءتها وفيه منها اللي بيدرس في جامعات عالميه والنوع ده من الناس طبعا تسمع منه جدا وانت مطمئن
النوع التاني هو صاحب الخبرة العمليه وحسب المثال بتاعنا هو اللي عنده اكتر من تجربة في البيزنس وفيه منهم اللي درس وفيه منهم اللي اشتغل بالفطره ووصل عن طريق التجربة والخطأ والنوع ده طبعا تسمع منه لانه بينقلك تجربته الفعليه ولكن مع الاخذ في الاعتبار انها تجربته الشخصية
النوع الثالث واللي انا بسميه “الفتاي” وهو شخص بينقل وجهة نظره الشخصية وممكن يكون قرأ بشكل جزئي صفحتين من هنا على صفحتين من هناك وسمع كلمتين من هنا على كلمتين من هناك وقاعد بيقول رأيه وده اخطر نوع من الناس واللي بحذرك من انك تسمع منه لانك ساعتها هتكون بترمرم لانهم لا اصحاب علم ولا هما اصحاب تجربة وللاسف دول كتير ومنتشرين جدا
طيب لو انا في بداية حياتي وعايز ابدأ اغذي دماغي وابنيها صح في اي مجال ابدأ بالنوع الاول ولا التاني؟
من غير نقاش النوع الاول طبعا لانه بينقل علم من كتب فيها تجارب مئات او آلاف الأشخاص وعدد كبير من اصحاب الخبره اتفقوا على الكتب دي فالنوع ده يعتبر التأسيس الصحيح لدماغك واللي هيخليك تقدر تفهم وتستوعب وتقييم النوع التاني بشكل صحيح لان زي ما قولنا النوع التاني بينقل تجربته الشخصيه
والنوع التاني ده مهم جدا علشان تجربته العمليه الحاليه وحط تحت الحاليه دي الف خط لان فيه كتب اتكتبت في دول تانيه او في زمن تاني ومع تغير الحياه والقوانين والحالة الاقتصادية تتغير الظروف ويجب على الشخص الناجح انه يكون مرن ويتكيف معاها وبالتالي انت محتاج الشخص التاني علشان هتفهم منه التطورات والتحديثات في التنفيذ مش في القواعد والاسس المتفق عليها
نقطه مهمه جدا
وخصوصا في التوقيت ده
هل اسمع قصص فشل الناس؟
لان بيقولوا اتعلم من فشل الغير؟
طبعا قصص الفشل هي اكبر معلم
ولكن عند مين؟ عند اللي نجح بعدها
يعني مينفعش واحد فشل في كل المشاريع اللي عملها وتروح تسمع منه اي حاجه لان ممكن جدا يكون العيب منه وبالتالي هو مش مؤهل انه ينقلك اسباب فشل مشروع لانه ببساطه لو عارفها كان نجح في اللي بعده لان مش معقول بعد كام تجربة فشل وبعد ما فهم اغلب اسباب فشل المشاريع قرر يخرج من الملعب وميعملش مشروع يعوض فيه اللي فاته وده ممكن تضيفه للنوع الثالث اللي شرحته فوق
في مره كنت بتناقش مع حد وبقوله رأيي في النقطه دي ولقيته بيقولي بس فيه ناس فشلت في كل المشاريع اللي عملتها والنهارده ناجحين على السوشيال ميديا وبيتكلموا في البيزنس وبيعملوا كورسات كمان
قولتله ده احسن واحد تروح تسمع منه ازاي تنجح على السوشيال ميديا من الصفر مش ازاي تنجح في البيزنس والمشاريع !!
واخيرا …
لما تاخد كفايتك من النوع الاول والثاني وتاخد بنفسك خبره عمليه ممكن ساعتها تسمع من الفتايين لان مش كل كلامهم غلط وممكن تاخد منهم فكره تطور نفسك وشغلك منها
ايه ده؟ هو مش انت قولت ابعد عنهم؟
ايوه ده في الاول وانت اخضر وممكن اي هري تصدقه وتبني عليه ويطلع في الاخر فنكوش وتكون ضيعت وقت ومجهود وفلوس وراء سراب اما بعد ما بقى عندك علم وخبره وتجربه بقى عندك مناعه ضد الهري وبتحسه من على بعد اميال وساعتها ممكن تحلل في يومين الف فتيه مختلفه وتطلع منهم باللي ممكن تجربه واللي ممكن بعد كده يفيدك
وصلت؟
كبسوله فكريه