إحساس الأسف اللي بيصيب الواحد مع كل نازله عليها تسليط إعلامي ضد القطاع الطبي من رد فعل الدكاتره عليها بقي مثير للشفقه اكتر من التعاطف
المحاولات الهزيله ما بين رغبه إصلاح كوني مفاجئ لنظره المجتمع ليك اللي كل مره بتفاجئك ان محدش بيحترمك غير والدك ووالدتك ، و الشارع عندك عشان بيكشف ببلاش، وال 3 جناير الي تحت ايدك
وما بين كربلاء ولطميات الأطباء اللي قوامها ان انا بسهر وبذاكر وبتعب واتمرمط نبشطيات وشغل وديرتي و مصاريف عشان ييجي واحد يتعمد يسفه من رغبتك المشروعه انك تفضل إنسان سوي قادر يؤدي الخدمه الطبيه بنفس المستوى اللي ميضرش مريض وانت واقف على رجلك علمياً ونفسياً ومادياًواجتماعياً
ف الحالتين محدش شايفك يا حبيبي ومحدش مهتم بتنظيرك ده ولا هيحط أستحقاقيتك مبرر لاحترامك ورغباتك الإصلاحية
انت نفسك مش هتشكر المهندس عشان واقف ف الشمس ف وسط الموقع والرمل
مش هتشكر الظابط عشان بيطلع مأموريه ف الصحرا ولا بيضرب عليه نار
مش هتشكر سواق النقل التقيل حتي عشان بيوصل طلبيه خضار من محافظه ل محافظه
كلها متطلبات مهنه.. و ضريبه بتدفعها قصاد كاريير انت اخترته وعارف أخره من اول يوم حطيت رجلك فيه، ف تقبل ان ده المستنقع اللي لازم تعديه من غير لايف جاكت عشان تعبر اي ناحيه فيها الحد الأدنى من ال 3 طلبات الي عمرهم ما اجتمعوا عليك :
_تعليم كويس
_بيئه شغل آمنه
_مقابل عادل يخليك مش شايل شنطتك بتجري بين المستشفيات عشان تعرف تكفى مصاريفك وبيتك ودراستك
ولحد ما ده يحصل _ ومش قريب _طول مانت لسه لو عملت سيرش علي بالطو هيجيلك مسلسل بالطو او صوره على ربيع وهو لابسه وبيقول انت مجنون”_ فانت مطلوب منك تشتغل على نفسك بكل جديه +لامبالاه .. معادلاتك دراستك تعليمك تحصيلك شهادتك.. وتنسحب من الحياه دي ف صمت والله من غير اثاره جدل ومن غير ما تبرر و تحزق قدام واحد لو تعب هيروح إنجلترا ياخد حقنه من دكتور مصري برضه بعد انتظار 10 ساعات ف الطوارئ من غير ماينطق
ومطلوب منك تشتغل على شخصيتك وعافيتك عشان هي ماشيه بالدراع مهما اتعملك خمسين جمعيه عموميه ومؤتمر صحفي منزوع الدسم والكرامه .. النضاره و الاسكراب مبيأكلوش عيش
شخصيتك وعلاقاتك وشطارتك هي الي بتخلص بها دراساتك العليا
وهي الي بتخليك ترد على المرافق باحترام او بقله ادب متبادله، عشان كل البلاغات بتتحفظ وتنتهي بالتصالح واغنيه يا قلبي وحياتي يا سكر نباتي
وهي اللي بتمشيك مع النايب الإداري والمدير الطبي، و الجوده و الاعتماد، وموظف الحي، وعضو مجلس الشعب، وعيد الحب ومحبي الماشتا، والتصوير المفاجئ لتفتيش ال ID
ومطلوب منك تعرف ان المريض ده هو حلقه ضعيفه زيه زيك لا هو مطلوب منه يتحمل ضغطك وتدني مرتبك وجدولك وقله نومك.. ولا انت مطلوب منك تتحمل نطاعه و طلبات بره النطاق العلاجي ف حدود المتاح
ف خلي تعبك وسعيك لله، عشان متبقاش ضيعت الثواب و الصحه ف نفس الوقت وتموت فطيس
كونسبت الأجر على قدر المشقه ده valid ف العبادات، مش في الحياه عموما
انما تقعد بقي تعمل عداوه بين الطبيب والإعلام
و عداوه بين الطبيب والمريض
وبين نقابه الأطباء و نقابه الشحاتين
و بين أجر العالم وأجر الفنان
وكل ما تتخانق اكتر المصري اليوم يقارن بين دخل الدكتور حسام ابو العطا ودخل صبحي كابر، ف انت كده بتحرق جاز مع حكومه رفعت الدعم عن أسعار المحروقات.. فانت أولي بالتفويله دي لصحتك
واخيرا بخصوص رغبه أستاذ أحمد المسلماني ف عمل مسلسل عن حياه أستاذنا البروف مجدي يعقوب ربنا يديله الصحه، ف جدير بالذكر انه اتخرج من جامعه القاهره سنه 57 و كان ف بريطانيا سنه 61
ف مش عارف السيناريو هيبدأ من اول حلقه الاستاذ عمرو أديب ويعمل فلاش باك ولا هنبدأ المورال منين