من أهم المفاهيم في البيزنس . مفهوم الكاش كاو
الترجمة الحرفية هيا ( بقرة بتحلب فلوس )
والترجمة العملية هيا . النوع من المشاريع اللي ( لا يتطلب مجهود كبير . ولا يوجد فيه تطوير كبير . ولا يوجد فيه تفاصيل كتير . ولا يوجد فيه نمو كبير . ويوجد فيه ربح ثابت )
طاب ما حلو ده . أنا عاوز من دا يا رب ابوك يروح يحج
لكن استنى كده . بتقول ربح ثابت بدون مجهود ولا تفاصيل . ما كان كل الناس عملت المشاريع دي
لأ طبعا
لأسباب
أولها
إن الناس أصلا #ما_تعرفش إنه فيه مفهوم اسمه كده
الناس لا تتعلم البيزنس حضرتك . كله بالحب
ومن النكت اللي باسمعها وباضحك عليها بيني وبين نفسي إن ( المعلومات موجودة في كل حتة . المهم التطبيق )
ويقوم ممصمص شفايفه . قال يعني الواد حكيم وكدهوت
معلومات إيه اللي موجودة في كل حتة دي حضرتك . أهي دي شخصيا أصلا معلومة غلط
الناس بتدخل البيزنس . وتطلع منه . بالتجربة كده
ويموتوا . وييجي اللي بعدهم . ولفي بينا يا دونيا
لكن . العلم . بيختصر ليك أعمار مئات وآلاف ممن سبقوك في البيزنس
المعلومات اللي ممكن تعمل زي من سبقوك وتدخل البيزنس وتطلع منه من غير ما تنتبه ليها . ف تخسر زيهم
ف . السبب الرئيسي لإن الناس لا تنتبه لمشاريع الكاش كاو . إنهم أساسا ( ما يعرفوش ) إنه فيه حاجة اسمها كده
زي ما فيه آلاف الناس عندهم عربيات . وما يعرفوش إن الباب الخلفي فيه زرار بيخليه يتفتح من برا فقط وما يتفتحش من جوا
عشان ما فيش طفل يفتح الباب وينزل لوحده . لازم حد كبير يفتح له من برا
آلاف الناس ما يعرفوش إن مسند الراس في العربية متصمم إنك تخلعه وتكسر بيه القزاز في حالة إنك وقعت بالعربية في نهر والقزاز مقفول
لإنك وقتها مش هتعرف تفتح الباب بسبب ضغط المياه . ومش هتعرف تنزل القزاز . لإن دورة الكهربا كلها في العربية هتتأثر بالميه
آلاف الناس ما تعرفش أصلا فائدة مسند الراس نفسه في العربية
يعني
عمرك شفت حد سايق عربية وساند راسه على مسند الراس !! لأ طبعا
أمال احنا عاملينه ليه . ديكور يعني !!
لأ . مش ديكور
مسند الراس معمول عشان لو عربية خبطتك من ورا وانتا واقف . لو ما فيش مسند راس . رقبتك هترجع لورا بسرعة جدا وممكن تتكسر . ف مسند الراس معمول عشان اللحظة دي فقط
ف . ما تتخيلش إنه ملايين الناس اللي عندها عربيات عارفة عن العربيات
ولا تتخيل إنه ملايين الناس اللي عندها بيزنس عارفة عن البيزنس
آهي البزانس ماشية زي العربيات كده
ما بالك باللي ما عندهمش بيزنس بقى . ومتخيلين إن المعلومات في كل حتة . إديني انتا بس فلوس واتفرج . هههههههه . تبا لثقة الجاهل
طاب تعرف إنه لو عربية خبطتك من ورا . رقبتك مش هترجع لورا !
جسمك هوا اللي هيطلع لقدام بسرعة . ورقبتك مش هتطلع معاه
طاب تعرف إنك لو عملت حادثة مع جسم ثابت وانتا على سرعة أكبر من ١٢٠ كيلو في الساعة . جسمك هيقف . وقلبك هيفضل مكمل لقدام . ف هيتخلع من مكانه
ومخك هيعمل حادثة مع عضم جمجمتك من جوا
ف . ما تمشيش على أكتر من ١٢٠ . حتى لو راكب أكبر عربية فيها وسائل أمان في العالم
الوسائل دي هتحافظ على جسمك من برا . مش من جوا
المعلومات مش في كل حتة والمهم التطبيق
المعلومات نفسها إنتا محتاج تبحث عنها
للأسف . المعلومة دي نفسها بتكون سبب إن آلاف من يمتهنون البيزنس لا يتعلمون
ما هو نتعلم ليه . ما هي المعلومات في كل حتة
يا جدددع . يا جدددددع
السبب التاني لإن الناس ما بتطبقش نظرية الكاش كاو . إن بعض هذه البزانس بتحتاج #استقرار في نوع من البيزنس لفترات طويلة . عادة بتقتضي إنك تكون من #عائلة تمتهن هذا البيزنس على مدار #أجيال
ودا سبب إنك تشوف ناس لا تعرف كوعها من بوعها . وتلاقيهم بيحققوا مكاسب بالملايين سنويا
طبعا معظم الناس بتظن إن العيلة دي شغالة في الممنوعات . وبتغسل أموال وكده
ودي بردو من المعلومات الشائعة ( الخاطئة ) عند العوام عن البيزنس
ما هو معظم العوام ما يعرفوش كوعهم أصلا . بالمناسبة يعني
وحضرتك غالبا ما تعرفش كوعك فين بردو . اللي حضرتك بتشاور عليه دلوقتي ده هوا مرفقك . مش كوعك
وكعبك . هوا عقبك . إنتا غالبا ما تعرفش كعبك فين بردو
وتقول لي المعلومات في كل حتة
يا راجل . قوم اتوضى وانتا تعرف مرفقك وكعبك
قلت لك الدنيا ماشية بفضل ربنا سبحانه وتعالى . مش بشطارتنا . سبحان الرزاق
ف سيبك من موضوع إن المعلومات في كل مكان ده . قال في كل مكان قال !!
فز قوم اتعلم بلاش مرقعة
ف . السبب التاني لعدم قدرة الجميع على دخول بزانس الكاش كاو . إنها أحيانا بتحتاج #تجذر في المجال
ف تلاقي عيلة مثلا عندهم مطحن دقيق
دا مشروع كاش كاو
لا فيه تطوير . ولا نمو . ولا اختراعات
لكنه فيه دخل ثابت
وهما ناجحين فيه لإنهم أبا عن جد شغالين فيه
تلاقي عيلة عندها مثلا مزارع موالح . عشرات ومئات الأفدنة
عيلة عندها عربيات نقل
كل دي مشاريع كاش كاو
تلاقي واحدة أبوها سايب لها عمارة بتأجرها للغير . دا مشروع كاش كاو
ولا تطوير ولا نمو . لكن . عائد ثابت . ومجهود لا يذكر طبعا
السبب الثالث
إن بعض هذه المشاريع يحتاج ل #راس_مال_كبير للبداية
مثال . محطة بنزين . دا مشروع كاش كاو مكتمل الأركان يعني
لكن . هل معاك راس مال كافي ليه
هتقول لي . تراخيصه صعبة
سيبك من التراخيص . مهما كانت صعبة . ف إنتا هتتعب فيها مرة واحدة . لكن . المهم . هل معاك راس مال كافي لبدء مشروع بنزينة
لو معاك . وعاوز مشروع ما فيش فيه لا مجهود ولا تطوير . وربحه ثابت . ف دا مثال جيد على مشاريع الكاش كاو
شالوا الحمام حطوا الحمام
تطوير إيه اللي هتعمله في البنزين يعني . هتعمل بنزين بطعم الفانيليا يعني مثلا
طيب . هل ممكن تخسر في البنزين !!
حتى الماركت اللي في البنزينة . اللي محتاج دماغ يعني . هتأجره لحد أقل منك . هوا يشيل هم التفكير والتطوير . ويدفع لك إيجار
ف الماركت نفسه أصبح مشروع كاش كاو . من داخل مشروع الكاش كاو الكبير . اللي هوا البنزينة
يعني الماركت بقى العجل ف بطن امه . هههههههه
كنت دايما باضرب مثال على مشاريع الكاش كاو ب ( مخبز العيش )
عمرك شفت صاحب مخبز عيش عنده مشكلة في التسويق . أو بيفكر في ميكانيزمات تطوير المنتجات . أو بيعمل إعلان ممول مثلا
طيب بيكسب كويس ولا لأ ؟!
أهو دا معنى مشاريع الكاش كاو
طيب . بينمو ؟
بيتطور ؟
لأ طبعا
هيا دي بردو مشاريع الكاش كاو
من مشاريع الكاش كاو مثلا
مصنع صلصة
مصنع زيت
مضرب أرز
مصنع شكائر
مصنع نسيج
مصنع أسلاك . حديد أو نحاس
مواسير . حديد أو بلاستيك
قطاعات UPVC
كل صناعات السحب هي صناعات كاش كاو
لكن . هل مصنع الأجهزة المنزلية مثلا كاش كاو ؟!
طاب مصنع خلاطات مياه
طاب مصنع محابس نحاس
طاب مصنع بارات النحاس اللي بيتصنع منها محابس النحاس . دا كاش كاو ؟ ولا المحابس هيا اللي كاش كاو ؟
فكر فيها
هتلاقي الفرق واضح جدددددا بين النوعين من المشاريع . الكاش كاو . واللي مش كاش كاو
لكن . رغم هذا الوضوح الشديد . إلا إنك قد تكون عمرك ما انتبهت ليه
قلت لك طلع من دماغك موضوع إن الأفكار مرمية في كل حتة ده . المهم النفس اللي تاكل . يا ولا . يا حلاوة
طاب ما كان كل الناس عملت مشاريع كاش كاو
قلت لك لأه
للأسباب التلاتة اللي فاتوا
لكن . حتى اللي فاهم . وقادر يعمل مشروع كاش كاو . ممكن يفضل عليه مشروع مش كاش كاو !!
ليه ؟!
عشان ممكن يكون بيفكر في مشروع بيحقق #هامش ربح كبير
مشاريع الكاش كاو ما بتحققش هامش كبير
كنت فى استشارة لمطحن دقيق . قيمته كانت حوالي ٣٠٠ مليون جنيه
لما كلمت أصحاب المطحن عن نسب الربح في المشاريع الأخرى . كان الرد الطبيعي هوا . يعني احنا ممكن نفك المطحن دا ب ٣٠ مشروع . كل واحد منهم ب ١٠ مليون . ف نحقق هوامش ربح أكبر بكتير
دا معنى إني بقول لك إن واحد ممكن . رغم إنه عارف مميزات مشروع الكاش كاو . إلا إنه يعزف عنه ويروح لمشروع من مشاريع المناهدة والتفاصيل
ليه ؟!
عشان هامش الربح طبعا
المطحن ومصنع السحب وتجارة الخامات . إلى آخره من مشاريع الكاش كاو دي . بتكسب ٢ ل ٥ ٪ بالكتير . في السنة كلها
بينما . في استشارة لشركة تانية . مش كاش كاو خالص . سألوني . نحط هامش ربح كام . قلت لهم ١٠٠ ٪ . بمنتهى الأريحية
ما هو دا مشروع على النقيض تماما من الكاش كاو . كله فنيات وتفاصيل
ف . إنتا حدد انتا عاوز إيه
يعني
المشروع التاني ده كان قائم عليه شباب في التلاتينات
بينما
مطحن الدقيق . كان قائم عليه اتنين في الستينات
ف . هل معقول اقول لهم فعلا تعالوا نفك المطحن ب ٣٠ مشروع من ابو ١٠ مليون
ف إنتا حدد موقفك
لكن . أنا هاممني في البوست ده إنك أصلا #تعرررررف المبدأ ده في البيزنس
ولما تعرفه بقى . إبقى احتار واختار
ولما تختار . خد لك سنين في التطبيق
سيبك من فكرة إنك بمجرد ما تعرف الفكرة . هتطبق . يا حلاوة
وطبعا . باشة البشوات . هوا اللي عنده بيزنس بيشغل فيه دماغه . وبيعمل تطوير . واستراتيجيات . وشغل الشعوذة ده . وبيحقق هامش ربح كبير
وعلى جنب . مربي بقرة حلوب حلوة كده كوتي موتي صغنطوتي عاملة له استقرار واطمئنان، مع حبي