مفهوم الأمان المالي

من المفاهيم اللي اتردّدت عليّا كتير في بداية قراءتي لأدبيّات البيزنس

مفهوم الأمان_المالي

–

الأمان الماليّ معناه إنّك تعمل بيزنس – وتعمل له سيستم – بحيث توصّله لإنّه يشتغل من غير ما يكون محتاج ليك

–

وبناءا عليه تطمئنّ لإنّك خلاص عندك دخل سلبيّ ( غير مرتبط بوجودك ) – دخل مستمرّ – وكافي لكلّ أغراضك – ولباقي حياتك

–

حدّ حسب مرّة لو نجيب ساويرس قعد يحرق في فلوسه هيخلّصهم إمتى

هوّا عنده تقريبا حوالي 130 مليار جنيه

لو الألف جنيه فيه 5 ورقات ب 200

يبقى نجيب ساويرس عنده 26 مليون ورقة من أمّ 200 جنيه

–

لو الورقة هتاخد 10 ثواني عشان تتحرق

يعني نجيب ساويرس محتاج 260 مليون ثانية عشان يحرق كلّ ثروته

–

يعني نجيب ساويرس محتاج تقريبا 8 سنين تقريبا ( بدون نوم ) يفضل قاعد ماسك ولّاعة وعمّال يحرق في ورق من أبو 200

–

شفت المثال ده

هل دا يعتبر أمان مالي ؟!

–

دا اللي أنا بناقشه في البوست ده

ألا وهو #ما_فيش_أمان_ماليّ

–

قال الله سبحانه وتعالى عن نفسه

كُلَّ يَوْمٍ هُوَ فِي شَأْنٍ

–

سأل الصحابة رضوان الله عليهم رسول الله صلّى الله عليه وسلّم عن تفسير هذه الآية

فقال عليه الصلاة والسلام

أن يغفر ذنبا ، ويفرج كربا ، ويرفع قوما ، ويضع آخرين

–

لاحظ كلمة ( ويضع آخرين )

–

حضرتك لازم تكفر بفكرة ( الأمان الماليّ )

لازم تعيش طول عمرك وانتا واضع نصب عينيك فكرة أنّ الله سبحانه وتعالى ممكن يفقرك في لحظة

–

وهل حضرتك محتاج إنّي أضرب لك أمثلة على ذلك ؟!

ألم تر أنت بنفسك عشرات الأمثلة على ذلك ؟!!

ثمّ أنت بعد ذلك تبحث عن ( كيفيّة تحقيق الأمان الماليّ )

–

الأنكت من كده – إنّك تلاقي ناس عاوزة ( تأمّن مستقبل أولادها )

يا حلاوة يا ولاد

–

هوّا انتا تقدر تأمّن حاضرك ؟!

لمّا هتأمّن مستقبلك ؟!!

لمّا هتأمّن مستقبل أولادك ؟!!!

هوّا انتا الشيطان وصل بيك لحدّ هناك كده ازّاي ؟!!!

–

عاوز تأمّن مستقبل أولادك

قال تعالى

وَلْيَخْشَ الَّذِينَ لَوْ تَرَكُواْ مِنْ خَلْفِهِمْ ذُرِّيَّةً ضِعَافًا خَافُواْ عَلَيْهِمْ فَلْيَتَّقُوا اللَّهَ وَلْيَقُولُواْ قَوْلاً سَدِيدًا

–

الأخطر من كده بقى – إنّك تشعربـ ( الأمان الدينيّ )

إنّك تتجرّأ مثلا إنّك تكون طبيب نساء مثلا – وتقول ( أنا راجل متّقي وعمري ما هاعمل حاجة غلط )

أو تكون عندك 60 سنة – فما تخافش تعيّن سكرتيرة بدلا من سكرتير

–

دا اللي بسمّيه ( الأمان الدينيّ )

إنّك تكون حاسس إنّي لأ مستحيل أعمل الغلط الفلانيّ

لأ تعمله عادي

–

عشان كده فيه ذنوب ربّنا سبحانه وتعالى نهانا عنها

وذنوب أخرى ربّنا سبحانه وتعالى نهانا ( أن نقربها )

–

مش مجرّد ما تعملهاش – ولكن ما تقرّبش منها ولا من أماكن عملها ولا من مداخل عملها

–

حضرتك عيش كلّ يوم وقلبك معلّق بالله سبحانه وتعالى

واعلم أنّه هو الذي يرزقك سبحانه وتعالى – وهو الذي يعصمك من المعاصي

واوعى تصدّق نفسك إنّك وصلت للأمان الماليّ – أو ممكن توصل له

ولا إنّك في أمان من الوقوع في المعاصي

المصدر