مش كل النصايح ليك.. الموضوع ده مهم.. مش كل النصايح ليك.. بغض النظر عن اللي بيقولها وبغض النظر عن جمالها وبغض النظر عن صحتها حتى..
مش كلها ليك.. وده يمكن يكون أهم حاجة تعرفها.. انك لازم تدرسها الأول وتعرف هي متوجهة لمين.. ولو مش متأكد اسأل..
هاوضح لك قصدي.. شوف مثلا:
هتلاقي الناس بتقول لك على السوشال ميديا: لازم تخرج من الكمفورت زون.. لازم تعافر وتخرج بره منطقة الراحة بتاعتك.. تمام؟
بس الحقيقة ان لو انت شاب في مقتبل حياتك العملية وبتشتغل في مجال ما بقالكش فيه سنتين على بعض ما ينفعش تسمع النصيحة دي وإلا هتسيب المجال وتشوف حاجة تانية أو تبدأ مشروع وفي الحالتين هتتشتت وتاخد قرارات تقلل فرص نجاحك في الحياة بشكل كبير..
وكمان لو انت موظف بقالك كتير بتشتغل في شركة/شركات وزهقت.. وما عندكش إمكانيات إدارية ولا خبرة في البزنس.. وقررت لما سمعت النصيحة دي انك تستقيل وتعمل مشروع فده ممكن يكون أسوأ قرار في حياتك..
فهمت قصدي؟ فيه حالات ما بتكونش النصيحة ليك.. بتكون لحالات محددة.. زي الحالة دي:
لو حد اشتغل في مجالات متعددة وخد خبراتها وفهم في البزنس وعنده إمكانيات إدارية بس هو عايز يفضل موظف بسبب ان ده أريح.. هو ده اللي النصيحة متوجهة له ومناسبة له وفعلا ممكن تفرق معاه انه يفتح مشروع ويستغل إمكانياته فيه على أمل يحقق عائد أكبر على مجهوده بإذن الله..
شفت الفرق بينهم في ظروف الناس؟ فرق كبير.. من إفشال هناك لإنجاح هنا..
مثال تاني.. هتلاقي الناس بتنشر قول سيدنا عمر رضي الله عنه: اعتزل ما يؤذيك.. صح؟
المشكلة انك لو كنت لسه في مقتبل حياتك العملية وما عندكش خبرات ولا اتعاملت مع الناس كتير قبل كده وسمعت النصيحة فكل مرة تحصل لك مشكلة من حد تقوم منسحب فخليني أقول لك دي الوصفة الأكيدة للفشل في الحياة.. لأن الحياة معظمها تعامل مع الناس.. وخبراتك اللي بتكتسبها في التعاملات هي اللي بتكمل صناعة شخصيتك بما فيها من صبر وتحمل وذكاء اجتماعي الخ.. لو اعتزلتهم هتتعلم ازاي؟!
ولو انت من اللي عندهم ابتلاء من شخص محدد مؤذي سواء قريب أو زوج أو زميل أو صديق والعلاقة دي مهمة أو حتمية بس الأذى على تدريج من واحد لعشرة مش واصل لسبعة أو تمانية فمش المفروض تسمع النصيحة دي.. لأن الانفصال هيكون ضرره أكبر من الأذى ده.. ولأن صبرك مطلوب وله جزاء كبير في الآخرة..
اللي النصيحة دي مفيدة له هو اللي أولا شخصيته ضعيفة فمش بيعرف ياخد قرار بسهولة وثانيا واقع تحت أذى فعلا ممكن يؤثر على سلامته النفسية وصحته يعني على التدريج داخل على تمانية.. ساعتها الضرر اللي هيحصل من الانفصال والبعد أقل من اللي ممكن يحصل له لو استمر..
وقيس على كده كل اللي بتسمعه..
أتمنى أكون عرفت أوصل الملاحظة اللي شايفها من أهم ما يمكن لأن الناس بقت بتاخد كلام السوشال ميديا وكلام المشاهير على انه صح ومسلّم بيه.. وده مش شرط.. في الغالب بيكون مناسب لحالات بعينها..