محدش كبير على الفتنة
قوم فرعون آمنوا وعرضوا نفسهم للخطر وهربوا وغامروا في نص البحر ولما طلعوا منه عبدوا العجل
الكفر اصلا بدأ في الدنيا ظنا انه تقرب الى الله عن طريق التقرب الى تماثيل الصالحين
احنا شخصيا عاصرنا عصر بنشوف ناس قدام عنينا شايفين الظلم بعنيهم ومازالوا بيفضلوه وبيختاروه
كنت بظن ان فكره المسيح الدجال عشان عنده عين واحده هقفشه، واكتشفت انه مش محتاج ينزل وعامل شغل حلو ووركنج فروم هوم من ناس شغلاله كويس عامله فتنه وناس متبعاها
كل ما بظن اني قريب من ربنا بتفتن، واقع واخسر الاخره بالدنيا، كل ما احس اني مستقوى واني جامد اقع وقعه وحشه
الادعيه الي كان بيدعوها الرسول زي اللهم يا مقلب القلوب ثبت قلبي على دينك، مكانتش دعوة كده تواضع ولا عشان هو رسول الله
ده عشان هو مدرك تماما ان الهدايه من عند الله مش شطاره ولا قوامه ولا عضلان بيعملها الانسان، وان مجرد سبب في الارض والامر كله لله
ولما الانسان تغره الحياه ويفتكر انه هو الي جامد ولا هو الي بيشتغل فعشان كده بيجيب فلوس ولا هو الي واخد باله من عياله فعشان كده هما كويسين او محمين
بيقع على طول
كل ما الواحد بيدرك حجمه وحقيقة قدرته في الحياه بيدرك ان كلمه الاسلام مش الشريعه الي نزلت على الرسول
الاسلام في الاصل هو الاستسلام التام لله
انك انت متعرفش اي حاجه ولا ف ايدك اي حاجه غير انك تتحرك وتعمل الي عليك وتدعي الله وهو يسوق القدر للحته الي هو يختارها
لو استسلمت هترضى لو مستسلمتش هتشقى
بس تدرك ان انت فعلا مفيش في ايدك حاحه وانك عمرك ما تبقى كبير على الفتنه
ربنا يكملها على خير ويحسن ختامنا