التصنيفات
مقالات الضيوف

متلازمة التأقلم مع الكاكا -مقصدش الفاكهة-

وعلى الأقل لو مقدرتش أبعد خالص عن الكاكا مكنش عايم فيها.

من الموضوعات اللي خدت مني وقت علشان أفهمها واقدر أوصل لأسبابها وأحاول أتعامل معاها وكمان أقدر أصيغها بشكل مفهوم هي متلازمة التأقلم مع الكاكا.

لو فكرت معايا في أي موضوع في الدنيا؛
خد من حياتك أي مثال، أي موقف بتقابله في يومك، سواء في مصلحة حكومية، الشغل، المواصلات، المدرسة أو الكلية.
أي مثال من الأمثلة دي هتلاقيه بينقسم لشقين.
الشق الأول هو الصح واللي مفروض يتعمل،
أما الشق التاني هو الكاكا.
يعني مثلا لو خدنا المصالح الحكومية مثال،
هنلاقي إن الشق الأول وهو الصح واللي مفروض يتعمل إن لو ورقك سليم مصلحتك تخلص، الموضوع بسيط وسهل.
أما الشق التاني وهو إنت ورقك سليم وكل حاجة مظبوطة بس مصلحتك مش هتخلص، شخلل علشان تعدي يا بلدينا، وبالتالي علشان الواحد يخلص هيضطر يدوس في الكاكا ويدفع، أو اقف بقى في الصف مع اخواتك بالساعات.

ولو بصينا على الشغل، هنلاقي إن الموضوع أبسط مما نتصور،
أنا بعمل حاجة وباخد مقابل للحاجة دي، خلصت القصة، وده شقها الأول.
أما شقها التاني، هتلاقي فيه الأسفنة والتطبيل -مشيها تطبيل- وإنت ابن الشركة، و Cost of greatness وحاجة يعني منتهى الكاكا، فلو وقعت في شركة من الشركات اللي واخدة الكاكا مبدأ مش هيبقى قدامك غير حل من اتنين،
يا تدوس معاهم وتلغوص أو تورينا عرض اكتافك.

لو خدنا الموضوع لمستوى أكبر شوية واتكلمنا عن المجتمع ككل وعلاقة المجتمع بالفرد والعكس، هنلاقي بردو إن في شقين،
أنا كفرد ليا حقوق وفي المقابل عليا واجبات تجاه المجتمع.
أما الشق الثاني، وهو عبارة عن حتت كاكا كبيرة بأسماء مختلفة زي العادات والتقاليد، قيم الأسرة،
العُرف -هو مين اللي عرفه طيب؟- لو حد يعرف يكتبلي تحت في التعليقات.

علشان تقدر تعيش وسط المجتمع لازم تتأقلم وتلغوص معاهم ولو عملت غير كده هتبقى منبوذ.

مع الوقت الكاكا هو اللي بيسود وبيكون هو العادي وبيتم اعتباره إن هو ده الصح،
ومع تمادي الواحد فيه مبيقدرش يفرق بينه وبين الصح واللي مفروض يتعمل وبيبدأ يتأقلم.

أدركت إني كده كده هتعاص، ما هو الكاكا في كل حتة فطبيعي في حاجة تيجي عليا،
ولكن بردو توصلت لإني ممكن أقلل من تأثيره عليا بقدر الإمكان،
وده عن طريق التحكم في اختياراتي في الحياة، اختياراتي تكون واعية ومحسوبة،
وكمان محاولتي للتعامل مع العالم الخارجي تكون بحدود وبحذر، و مروحش مع التيار لمجرد إن الغالبية من القطيع ماشيه معاه، الموضوع مش سهل بالنسبالي ولكنه هو ده الحل الأمثل ليا من وجهة نظري لحد دلوقتي.
وعلى الأقل لو مقدرتش أبعد خالص عن الكاكا مكنش عايم فيها.

المصدر