من الملاحظات اللي بلاحظها في رسائل الشركة الجديدة . الناس اللي بتتناصح في الطلب
كنت بلاحظها في رسائل المكتب بردو . بس مش بنفس كثافة رسائل الشركة التجارية
الناس اللي بتتناصح . يعني بتطلب طلب محكم جدا . ما يخرش الميه . ويحاول يوضح لك إنه فهمان . لتكون فاكر نفسك هتعرف تنصب عليا ولا حاجة
الطريقة دي معظم ردود أفعالها مش هتكون في صالحك
١
ممكن رد فعل يكون إن اللي بيكلمك ياخد الموضوع بتحدي . وما يرضاش يكمل معاك
٢
وممكن ياخد الموضوع بتحدي . ويقرر ينصب عليك فعلا . وانتا مش هتكشفه . لتكون فاكر نفسك أنصح من صاحب شغلانة في شغلانته !!
٣
وممكن يكون نصاب فعلا . ف يبتدي يزود جرعة الانتباه معاك
٤
وممكن يكون مش نصاب . بس يعتبرك هتدق له ع الصغيرة والكبيرة . ف يقرر يريح دماغه من الزبون المتعب ده . ما الزباين غيرك موجودين كتير
٥
وممكن يقرر يتعامل معاك . بس يتشدد هوا كمان عشان يضمن حقه . يطلب الدفع مقدم مثلا
٦
وممكن يقرر يهزأك بالطريقة . من خلال إنه يثبت لك إنك مش فهمان ولا حاجة . وبعدين يضحك عليك ضحكات صفراء مستترة مغلفة بالشماتة
٧
وممكن أسئلتك المحكمة دي . توصل له إنك منافس . مش عميل . منافس بيجمع معلومات عنه لغرض المنافسة . مش عميل غرضه الشراء . ف يتهرب منك
٨
وممكن . يقرر يمشي معاك على الصراط المستقيم عشان خاف منك باعتبارك فهمان
إنتا فوتت كل الاحتمالات من ١ ل ٧
وتوقعت إنك هتدخل على احتمال ٨ على طول !!
بينما
نصيحتي الشخصية
هي الظهور بمظهر المتسائل المتواضع طالب النصيحة
وليس المتعالم
الطريقة دي بتخفف لك دفاعات الطرف الآخر . وبيبتدي يتعامل معاك بود
يعني نبقى محتاجين نسأل ونفهم . وبعدين تقول لنا نسكت ؟!
لأ
أنا ما قلتش كده
ولكن . المهارة الحقيقية هي ترتيب وتصاعد الأسئلة . بحيث نصنع جو من الود . ثم إظهار الجدية من طرفنا
ف يبتدي الطرف الآخر يحس إن الموضوع رايح ناحية تنفيذ البيع فعلا . ودا اللي هوا عاوزه . واللي هيخلينا بردو نطلع منه بأكبر نفع
ولو شاكك في حد إنه يكون نصاب . بدل ما تخوفه بإنك فاهم . إغريه بإظهار إنك ساذج
هتلاقيه هوا فتح دفاعاته فجأة وكشف لك إنه نصاب
إظهار السذاجة هيا حتة الجبنة اللي بتحطها للفار في المصيدة
إنتا بتظهر الجبنة ؟! ولا المصيدة ؟!
أهو اللي بيظهر النصاحة دا بيظهر للفار المصيدة !!
تقول الحكمة
أحكم الحكماء . الفطن المتحامق
وتقول القاعدة
السؤال نصف الإجابة