شفت ريل لعامل بيشتكي إن المهندس بيخصم له يوم من المرتب ومش عارف إيه
طبعا دا تصرف غير مسؤول والمفروض الشركة تطرد العامل ده في أقرب وقت لإنه استخدم أسلوب الابتزاز
بغض النظر عن هوا مظلوم ولا لأ . لكن المطالبة بالحق ليها مسارها . مش هتمشي لوي دراع يعني . ويا إما اتمرقع يا إما هاعمل لكوا ريلز ع الفيسبوك
ونيجي بكره نلاقى بقية العمال جايبين مراوح وقاعدين يهووا على ودانهم . ويا إما تدونا مرتباتنا كاملة من غير ما نشتغل يا إما نعمل لكوا ريلز ع الفيسبوك
لكن
مش دا موضوعي
موضوعي إني بشوف إن ما يتقاضاه العامل المفروض يتقسم جزئين
جزء محسوب بناءا على ما يحتاجه بيت العامل ده من مصاريف شهرية . بغض النظر عن العامل ده اشتغل كتير اشتغل قليل اشتغل حلو اشتغل وحش . دا رقم لازم العامل يستلمه ( كامل بدون أي خصومات ) كل شهر
وهوا انا وظفتك انتا . ولا وظفت بيتك وعيالك !
لأ انتا اقتطعت وقته كاملا . وحرمته من أي مصدر تاني للصرف على بيته . تبقى مسؤول عن مصاريف بيته
الجزء التاني بقى هوا اللي محسوب على مدى أهمية شغل العامل ده . يعني دا مهندس ودا فني مثلا . يختلفوا في الجزء ده من المرتب . لكن في الجزء الأول ف الرقم محسوب على احتياجات بيت كل منهم
مدى التزامه بقوانين الشركة . من ضمنها الغياب مثلا . لو غاب يوم يتخصم من الجزء التاني . مش الأول
مدى كفاءته
إشتغل كويس ياخد زيادة في الجزء ده
إشتغل وحش يتخصم له من الجزء ده
ف الجزء الأول من المرتب دا اللي هيستلمه آخر الشهر . دا تاخده تعطيه لمراتك . دا مصروف البيت . اللي لا مساس بيه . عيالك مالهمش ذنب يتعاقبوا لو انتا قصرت
الجزء التاني بقى . دا بتاعك انتا . ودا يتم تسليمه في منتصف الشهر
دا اللي هتدخر منه لو عاوز تعمل مشروع
دا اللي هتفسح منه ولادك مثلا
دا اللي هتدخر منه لجواز ولادك مثلا
ف حتى لو أهملت . ف انتا اللي هتتعاقب لوحدك . مش عيلتك ولا ولادك
لو أحسنت . ف إحسانك هيدخل جيبك لوحدك . بعد تأمين مصاريف بيتك
قال رسول الله صلى الله عليه وسلم
الرجل وقدمه . والرجل وبلاؤه .والرجل وعياله . والرجل وحاجته
الرجل وقدمه
ف الأقدمية بترفع المرتب كده كده
لإنه كل سنة هيزيد مرتبه مقارنة باللي لسه متعين السنادي
والرجل وبلاؤه
أي اجتهاده
والرجل وعياله
ف المفروض عيال الموظف دول محسوبين في معادلة المرتب
يعني لو حد جاله مولود جديد المفروض الجزء الثابت من مرتبه يزيد . حتى لو هوا مش هيشتغل أكتر
والرجل وحاجته
يعني واحد احتاج يعمل عملية دلوقتي . نقول له لأ موت . ما فيش عندنا بند نعطيك فلوس زيادة عشان العملية
ف دي حاجة طارئة لازم الشركة تتعاون مع الموظف فيها
ف أنا بشوف التقسيمة دي تضمن حاجتين
تضمن اطمئنان الموظف على مصاريف بيته . واطمئنان زوجته
واطمئنان زوجته ده مهم ليا أنا كصاحب الشركة . لإنها لو مش مطمئنة هتسود عيشة الموظف بتاعي . ف هتأثر على شغلي أنا
في الحديث أن رسول الله صلى الله عليه وسلم لما باع شيئا من ممتلكات أحد الصحابة . إشترى له بنصف المبلغ زي فأس يحتطب بيها . والنصف الأول قال له ترسله لبيتك قبل ما تطلع تشتغل
دي جبهة لازم تأمنها قبل ما تطلع تشتغل
وسياسة تجزيء المرتب دي بردو بتضمن إن الموظف يكون عارف ان ليه مرتبه الخاص المربوط بجهده وتقصيره
وعلى الهامش بتخلي الموظف فيه فلوس بيقبضها طول الوقت . ما بينتظرش الشهر بطوله يعني ويتأزم في نصف الشهر
لكن المرتب رقم واحد كده آخر الشهر هيعمل مشكلتين
إن دخل الموظف المربوط بمصاريف بيته وولاده . هيتأثر بأي ذبذبة أو خصومات
ثانيا . هوا شخصيا مش هيحس إن فيه فلوس بتدخل جيبه هوا . هيحس إنه مربوط في ساقية بيجيب فلوس آخر الشهر يعطيها لمراته وخلاص
وهوا كمثل الحمار يحمل أسفارا . مش مستفيد حاجة لنفسه ولا عارف يدخر حاجة ولا فيه فلوس قادر يركنها على جنب لأي مصلحة
ليه متخيل اني بقول لك اعمل نظام مرتبات عادل عشان تبقى طيب وقمور والعمال يحبوك ؟!
ما يمشيش معاك إن نظام المرتبات العادل . حتى لو هتدفع فلوس أكتر . إلا إن مردوده الإيجابي هيكون في تحسن شغلك . ف بالتبعية تحسن أرباحك.
وليه مش متخيل إن توفير جزء من مرتبات العمال عن طريق الخصومات التعسفية ده هيضرك أصلا . وهيخسرك أكتر ما هيكسبك !!.
مين فهم الناس إن الاحسان دايما مرتبط بالخسارة ؟!
دا العكس هو الصحيح
كتبت بوست عن إن المرتبات لازم تضمن الحد الأدنى من معيشة أسرة العامل
.
بعد كده يكون فيه جزء تاني متغير حسب اجتهاد العامل أو تقصيره
.
ف أكتر من حد قال إن العامل لو ضمن مصروف بيته هيتدلع ومش هيشتغل !!
.
هيا الناس دي محتاجة نقول لها إن الشركة فيها نظام ثواب وعقاب واللي هيتدلع هياخد إنذار في التاني وطرد في التالت !!
.
ولا هنسيبه يتدلع طول عمره !!
.
طريقة التفكير دي اسمها ( التفكير الجدي ) . اتكلمنا عنها قبل كده باستفاضة
ومعناها باختصار إن الإنسان يكون بيفكر في الأمور على أقصى أطرافها فقط . على حدودها
.
يعني انتا بتقول هتعمل نظام مرتبات عادل . تبقى هتعمل نظام ما فيش فيه حساب
.
أو هتعمل نظام فيه حساب . يبقى هتعصر العمال وهتظلمهم لأقصى الحدود
.
ليه مش متخيل إن يبقى فيه نظام متوازن ؟!
.
الناس دي ما تقدرش تفكر في الحاجات اللي في منتصف الخط