واحد باصص من الدور الأول.. مش واخد باله.. فتوازنه اختل.. هوب اتشعلق في البلكونة.. يمين شمال يحاول مافيش.. يرفع رجل ينزل رجل.. مافيش.. وما عندوش حد جوه يناديه..
ستر ربنا كان فيه ناس تحت فوقفوا تحت البلكونة بسرعة.. وواحد منهم طول بعرض كده ناداه قال له: ما تقلقش.. سيب البلكونة..
الراجل بص كده وهو مرعوب.. مش قادر يسيب.. فرد عليه: لأ.. القفني الأول.. فالناس ضحكت.. والراجل استغرب.. قال له: ألقفك ازاي بس من غير ما تسيب البلكونة.. ما تقلقش.. سيب البلكونة.. هلقفك..
الراجل المتشعلق بص يمين وشمال.. فوق وتحت..
عارف إيه اللي حصل بعد كده؟! أيوه عارف.. في الحقيقة أصلا انت عارف وأنا لأ.. لأنها مش حكاية الراجل ده.. دي حكايتك انت.. حكايتك اللي بتتكرر كتير.. وفي كل مرة انت اللي بتقرر نهايتها تكون ازاي..
و_________________________و
لما بتقع في مشكلة أو بتحاول توصل لهدف.. طبيعي انك بتفكر في حلول.. وتدعي ربنا.. وتمشي في الحلول.. وممكن تستعين بحد.. وساعات الأمور بتمشي.. وساعات لأ.. وبتمر بأوقات صعبة وإحباطات وشكوك..
في وسط كل ده.. في وسط الفرك والمعافرة والمحاولة.. قلبك بيكون مرتبط بإيه؟! وعقلك بيكون فاهم ايه؟!
لو عقلك بيكون مشغول بالتفكير في الموضوع وما بيفصلش.. وبيحرق ع الفاضي.. لو قلبك بيكون متعلق باحتمالات نجاح الخطوات اللي انت ماشي فيها وهتمشي فيها.. يبقى انت مش هتسيب البلكونة..
هتفضل مستني حد ينقذك وانت ماسك البلكونة.. لأنك مش واثق في اللي هينقذك انه هينقذك.. عايزه ينقذك من غير ما تاخد قفزة الثقة.. من غير ما توري له انك متأكد انه هينقذك.. واثق انه هينقذك.. عندك يقين انه هينقذك..
و_________________________و
ولله المثل الأعلى..
و_________________________و
لما بتحصل لك هزة في شغلك فتمشي من الشركة.. أو تكون بتدور وما تلاقيش.. وبتبذل مجهود وتوصي الناس وتخش على لينكد ان و و و و.. بيكون عقلك بيحرق ع الفاضي واللا مقتنع ان ربنا هيوفقك؟ بيكون قلبك متعلق بالخطوات والآمال والوسايط والناس واللا بربنا؟
عارف وعد ربنا إيه؟ سيدنا محمد صلى الله عليه وسلم قال “إن الرزق ليطلب العبد أكثر مما يطلبه أجله”.. تخيل؟ وقال “لو أنكم تتوكلون على الله حق توكله لرزقكم كما يرزق الطير تغدو خماصا وتعود بطانا”..
و_________________________و
لما بتفكر في الجواز وتبدأ تشوف الترتيبات وتحط خطط.. بتفضل ماسك في البلكونة واللا بتكون مقتنع ان ربنا هيوسع عليك؟ بيكون قلبك متعلق بالخطوات والآمال والناس والفلوس والشغل واللا بربنا؟
عارف وعد ربنا ايه؟ الحديث بيقول: “ثلاثة حق على الله عونهم”.. ومنهم “الناكح يريد العفاف”..
و_________________________و
لما بيكون عليك دين ومش عارف تنام من الهم وبدأ نمط حياتك يختلف.. بتكون ماسك في البلكونة ودماغك مش بتفصل واللا مقتنع ان ربنا هيسد عنك بما انك صادق في نية السداد؟ بيكون عقلك متعلق بالناس والأسباب واللا بربنا؟
عارف وعد ربنا ايه؟ “من أخذ أموال الناس يريد أداءها أدى الله عنه”.. وأحاديث تانية جميلة هسيبها في أول تعليق..
و_________________________و
ده غير الأمور العامة اللي بتنفع في كل الحالات زي الصلاة على الرسول صلى الله عليه وسلم والاستغفار والصدقة وقيام الليل والتفريج عن كرب الناس.. واللي كثرة تكرارها بتؤدي إلى تعلق القلب بالله مش بالأسباب..
و_________________________و
الصورة وضحت؟! وانت في عز ما انت محتاج مساعدة ما ينفعش تكون شاكك في اللي هيساعدك.. وكل ما كان قادر وكريم وعظيم كل ما كنت لازم تكون واثق فيه.. ما ينفعش تكون متعلق بحاجة.. بتفكر في سيناريوهات دنيوية خارج إطار تحكمك.. معلق قلبك بالأسباب ومؤمن انها هي اللي هتساعدك..
و_________________________و
اسعى سعيك المطلوب وزود يقينك بالله وسيب البلكونة.. لحظة الطيران دي هي إثبات اعتمادك الكامل على الله وتعلقك به.. هي لحظة حدوث الكرامات وتفريج الكربات وتحقيق الدعوات..
و_________________________و
من هنا ورابح ركز في قصتك كل ما تتكرر من جديد..
واتعرض لقدرة ربنا.. استخدمها..