سؤال: واحد باع 100 وحدة – كسب 100 جنيه
لو باع 200 وحدة يكسب كام ؟
السؤال ده كان إرهاصة من بودكاست د حسين بكريّ في برنامج مجلس إدارة التسويق
وهو سؤال شاغلني من فترة كبيرة – أو مجموعة نقاط عمّالة تتجمّع جنب بعضها من فترة كبيرة
مجموعة نقاط بتشير لحاجة خطيرة جدّا – لكنّها لا تبدو على نفس القدر من الخطورة اللي هيّا عليه – وصعب حدّ يحسّها إلّا لو اتعرّض لها في شغله وكان #فايق لحساباته
يعني حتّى ممكن ناس تتعرّض لها في شغلها ولا تنتبه لخطورتها بردو
ف خلّيني أستعرض مجموعة النقاط دي في البوست ده إن شاء الله
وممكن حضرتك ما تحسّش ارتباطها ببعضها – لكنّها مرتبطة جدّا ببعضها – وكلّها ذات منشأ واحد – وكلّها صغيّرة جدّا ف تبقى مش منتبه ليه – لكنّها في منتهى الخطورة
وقبل ما اشرح حابب أرجع لنقطة كنت قلتها قبل كده – ألا وهي ( ليس كلّ ما يبدو منطقيّا يكون صحيحا )
يعني منطقيّ واحد باع 100 وحدة كسب 100 جنيه – يبقى لو باع 200 وحدة هيكسب 200 جنيه – تحسّها منطقيّة – لكنّها في منتهى البعد عن الصحّة
نيجي بقى للنقاط اللي بقول لحضرتك عمّالة تتجمّع من فترة زيّ عشّ النحل كده لحدّ ما اضطرّتني اكتب البوست ده
#النقطة_الأولى /
#التكاليف_الثابتة_ونقطة_التعادل
مش معنى إنّك بعت 100 وحدة ف كسبت 100 جنيه – يبقى كلّ وحدة كسبت جنيه
الكلام يبدو منطقيّا – بعت 100 وحدة وكسبت 100 جنيه – مش محتاجة فلسفة – تبقى الوحدة كسبت جنيه
لكن – قلت لك – ليس كلّ ما يبدو منطقيّا يكون صحيحا
فيه جزء من بدايات بيعك بيكون مسؤول عن تعويض التكاليف الثابتة – لحدّ ما توصل لنقطة التعادل
يعني إيه الكلام ده ؟!
يعني
أنا اشتريت 100 وحدة – كلّ وحدة اشتريتها مثلا ب 8 جنيه – وببيعها ب 10 جنيه – وصرفت خلال اليوم نقل مثلا ب 100 جنيه
أنا هافترض إنّ تكاليفي الثابتة هي النقل فقط للتسهيل
ف كده أنا اشتريت بضاعة ب 800 جنيه – وصرفت 100 جنيه نقل – يعني صرفت 900 جنيه
وبعت البضاعة ب 1000 جنيه
يبقى دا معنى إنّي بعت 100 وحدة وكسبت 100 جنيه
ف هل دا معناه إنّي كسبت من كلّ وحدة جنيه ؟!
لأ طبعا
أنا كسبت من آخر 10 وحدات فقط بعتهم – كسبت من كلّ وحدة 10 جنيه
ال 90 وحدة الأوّلانيّين – اللي كسبت منهم 900 جنيه – دول عوّضوا ال 800 جنيه تمن البضاعة – و ال 100 جنيه تمن النقل
ف أنا لحدّ ما بعت 89 وحدة – كنت مش كسبان ولا حاجة – كنت صارف 900 جنيه ولامم 890 جنيه
لمّا بعت الوحدة ال 90 – هنا التجّار بيقولوا أنا ( كيّتت ) – يعني جبت قيمة الفلوس اللي صرفتها – من بعد دي يبتدي يكسب بقى
ال 90 وحدة دول همّا كمّيّة التعادل بتاعة التاجر ده النهارده
بالحسبة دي
التاجر ده لو كان اشترى النهارده 200 وحدة وباعهم – كان هيبقى مكسبه كام ؟!
كان هيبقى دفع 1600 جنيه تمن البضاعة – و 100 جنيه نقل – أو 150
خلّينا نقول 100 للتسهيل – هيّا العربيّة اللي هتشيل 100 كيلو هتشيل 200 بنفس الأجرة غالبا
يعني التاجر ده صرف 1700 جنيه
وباع بضاعة ب 2000 جنيه
يعني كسب 300 جنيه – مش 200 !!
طبعا الحسابات للتسهيل – مش غرضي منها أوصل لرقم محدّد – قدّ ما غرضي منها أوضّح لك إنّ الموضوع مش حسبة منطقيّة وخلاص – أو علاقة خطّيّة يعني – يعني بعت 100 وحدة كسبت 100 جنيه يبقى الوحدة مكسبها جنيه – هيّا مش كده
#النقطة_الثانية /
#الصبر_جميل
من المثال ده – تفهم إنّك لو قاعد في السوق النهارده – ومعاك 100 وحدة – وبعت منهم 90 – كده حضرتك لازم تتربط في الدكان لحدّ ما تبيع آخر 10 وحدات
ما يعدّيش عليك حدّ يقول لك برافو عليك إنتا بعت 90 % من مستهدفك النهارده – قوم روّح بقى
لا يا فندم – أنا لحدّ دلوقتي ما بعتش ولا حاجة – أنا فقط جبت 900 جنيه آخر النهار أنا صارفهم الصبح أساسا – أنا مكسبي كلّه من آخر 10 وحدات هبيعهم
يبقى الصبر جميل – لازم تصبر لحدّ ما تبيع آخر 10 وحدات من ال 100
بنفس القياس – لو تلف منّك 10 وحدات من 100 – هل نقول كده أنا تلف منّي 10 % من شغلي وهبيع ال 90 % الباقيين
لا يا فندم – كده حضرتك إحسب إنّك تلف منّك شغلك كلّه
طيّب لو اتسرق منّك 10 % من شغلك
طيّب لو انتا معيّن موظّف مش محتاجه بياخد 100 جنيه في اليوم – يبقى كده الموظّف ده بياخد كككككوووووللللل ربحك – إنتا بتشتغل عشان تعطيه ربحك كلّه – بتشتغل لحسابه يعني – يبقى بردو تفكّر 10 مرّات قبل ما تعيّن موظّف مش محتاجه – أو تستأجر محلّ مش محتاجه – أو تصرف أيّ مصروف – لإنّ الموضوع مش دالّة في المبيعات – هو دالّة في صافي الربح – أنا بعت ب 1000 – ما ببصّش للرقم ده واقول الموظّف مرتّبه 100 – ولكن بقول – أنا كسبت 100 – والموظّف الزيادة ده خدهم كلّهم !!
طيّب لو حدّ قال لك اعطيني ال 100 وحدة بسعر 90
كده هوّا بيقول لك اعطيني كلّ شغلك النهارده ببلاش !!
من يومين شركة بعتت لي رسالة بتقول – إحجز عندنا على موقعنا لتجارة الجملة – وهناخد منّك 5 % فقط من قيمة مبيعاتك
كنت هاشكر لهم ع الواتس
يعني أنا اشتري 100 وحدة – أبيع 90 يعوّضوا مصاريفي – وآخر 10 وحدات أكسب منهم 10 جنيه – أقوم عاطيكم خمسة منهم – ياخي أحمس
هنا – هل لو انا عطيت الناس دول 5 % من مبيعاتي – أبقى عطيتهم 5 % من إيه ؟!
أبقى عطيتهم 50 % من أرباحي – متخيّل الجنان
وكان لسّه فيه قصاقيص تانية عاوزين ياخدوها بعد ال 5 % من المبيعات
ولاحظ – 5 % من المبيعات – مش من الأرباح
عشان كده لمّا بنقول لمندوب المبيعات ليك 2 % من المبيعات – إحنا كده بنغرّقه فلوس – ما هو ال 2 % من المبيعات دول ممكن يطلعوا ربع مكسبنا مثلا
من أسبوع بردو شفت ريل من برنامج الشاركس – أحد الشاركس بيقول للمتقدّم للبرنامج – آخد منّك رويالتي 10 % لمدّة 5 سنين
لقيت شارك تاني قام ملفوت للأوّلاني وكان عاوز يشكر له بردو
ويصرّخ في المتقدّم ويقول له إوعى تقبل الكلام ده – دا عاوز ياخد منّك 10 % من التوب لاين
من التوب لاين يعني من قيمة المبيعات – مش من الأرباح
يعني اشتريت بضاعة ب 90 جنيه – بعتها ب 100 جنيه – كسبت 10 جنيه
هوّا بقى عاوز ياخد 10 % من ال 100 جنيه البيع – يعني ياخد كلّ الربح – وانتا تقعد تخرّم قلل جنب منّه
يبقى الموضوع مهمّ ولّا لأ – وعدم الانتباه ليه كارثة ولّا لأ
تخفيض 10 % من سعر البضاعة ممكن يعني خسارة كلّ الربح – مش 10 % من الربح
في المقابل بردو – الخبر الجيّد يعني – إنّك لو صبرت على شغلك فترة لحدّ ما تثبت وجودك في السوق – وبعدين قمت رافع قيمة البيع من 100 جنيه ل 105 جنيه مثلا – ف كده انتا مش رفعت مكسبك 5 % – كده انتا رفعت مكسبك 50 % !!
ركّز
إنتا كنت بتكسب 10 جنيه – بقوا 15
مع إنّ هيّا شكلها إنّك كنت بتبيع ب 100 بقيت بتبيع ب 105
بنفس الكلام
لو قدرت تشتري البضاعة ب 75 بدلا من 80
وقدرت تكلّف النقل 50 بدلا من 100 – إشتريت عربيّة النقل مثلا وبقيت بتصرف على البنزين وأجر السوّاق فقط
ف كده إنتا بترفع أرباحك ل 200 % – مش 20 %
يعني
البضاعة اللي كنت بتشتريها ب 800 – وتصرف عليها 100 – ف تتكلّف 900
بقيت بتشتريها ب 750 – وتصرف عليها 50 – ف تتكلّف 800
لمّا تكون بتبيع ب 1000
تبقى رفعت أرباحك من 100 جنيه – ل 200 جنيه
يعني كسبت 200 % من مكسبك الأوّل – ما اسمهاش كسبت 200 جنيه من 1000 جنيه تمن البضاعة
دايما احسب حساباتك على صافي الربح – هتعرف انتا بتعمل إيه
لكن لو حسبت على قيمة المبيعات هتلاقي نفسك فرحان في الفاضي
فرحان إنّك بعت بضاعة ب 900 جنيه مثلا – بينما انتا كده خسرت وجع ضهرك طول اليوم وخلاص – ما كسبتش حاجة
#النقطة_الثالثة /
#حسرة_الديون_المعدومة
تخيّل حضرتك البضاعة اللي باشتريها ب 900 جنيه وببيعها ب 1000 جنيه دي
لو بعتها آجل لشخص ما – وبعدين الشخص ده ما جابش ال 1000 جنيه
كدا أنا خسرت كام
كدا أنا ما خسرتش 100 جنيه مكسب البضاعة
كده أنا خسرت 10 دورات بيع ورا بعض !!
يعني أقعد اشتغل 10 أيّام في الفاضي والكلام الفارغ عشان أعوّض غلطة زيّ دي
ولو شغلك بالشهر – تبقى محتاج تشتغل 10 شهور في الفاضي !!
ما هو أخينا اللي كل الفلوس ده – ما كلش الربح – دا كل أصل البضاعة – أصل الفلوس !!
يعني هوّا لمّا كان هيجيب لي ال 1000 جنيه – ما كانش هيكسّبني 1000 جنيه – دا كان هيكسّبني 100 جنيه فقط
ف لو هوّا كل عليّا ال 1000 جنيه كلّهم – يبقى انا محتاج اشتري بضاعة ب 900 – وابيعها ب 1000 – ف ابقى عوّضت 100 واحدة من اللي ضاعوا عليّا في الديون المعدومة – وبعدين اعمل الموضوع ده 10 مرّات بقى !!
تبقى حسرة ولّا لأ
عشان كده بنقول لك عدّ صوابعك 10 مرّات قبل ما تبيع لحدّ آجل
أنا شخصيّا حاطط قاعدة في شغلي إنّي أبيع لك آجل بنسبة 10 % فقط من قيمة مشترياتك السابقة
يعني
أوّل مرّة تشتري منّي كاش ب 1000 جنيه
تاني مرّة لو عاوز تاخد آجل – يبقى تدفع 900 جنيه دلوقتي – وتبقّي 100 جنيه فقط
تالت شهر تدفع 800 جنيه – وتبقّي 200 جنيه فقط
بحيث يوم ما تسرقني – تبقى كلت عليّا الربح فقط – مش أصل الفلوس
لو حسبت الموضوع بالشكل ده – هتلاقي نفسك ماشي تكنس المخزن وتلمّ كناسته عشان تبيعها
مش هتستهتر بأيّ حاجة تافهة بتبوظ عندك – أو تكسّل تبيعها وتقول حلو كده أنا بايع النهارده 90 % من مستهدفي
مش هتستهتر بموظّف متعيّن عندك وانتا مش محتاجه
مش هتستهتر ب محلّ إنتا مستأجره وما بتستفيدش منّه
مش هتستهتر بمشوار رحت تجيب فيه بضاعة ورجعت من غير ما تجيب البضاعة دي وحاسبت العربيّة النقل ع الفاضي
وبردو هتعرف قيمة إنّك تشتري البضاعة بجنيه أرخص
أو تكلّف النقل جنيه أقلّ
أو تكلّف أيّ تكلفة جنيه أقلّ – لإنّ دا الأسهل عليك إنّك تشتغل عليه – أسهل من إنّك ترفع سعر البيع جنيه