ليه ربنا زرع حبه في قلبي إلا لو هو نصيبي؟

ليه يعلقني بيه لو مش عايزني أمشي في الطريق ده؟

ليه فتح لي الطريق ده لو هو مش مناسب ليا؟

أنا سمعت الجمل دي كتير..

من حد عايز يفضل مع حد مش مناسب خالص بس بيحبه..

من حد عايز يسيب مجال دراسته ويدرس مجال تاني مش مناسب له بس بيحبه..

من حد عايز يسيب شغله ويفتح مشروع مع انه مش مؤهل للبزنس بس بيحبه..

من حد عايز يكمل بمشروع خسران/فاشل بس بيحبه..

من حد بيعاني من نتائج قرار خاطئ ومش عايز يتحمل مسؤولية انه هو اللي أخد القرار الخاطئ ده..

وفي كل الحالات ما كانش التصور ده صحيح.. ربنا ما زرعش حب شيء من ده في قلبك.. انت حبيت الحاجة.. بس كده.. انت ليك حرية الاختيار وحرية العمل.. وانت اخترت وانت مشيت في الطريق..

الجمل اللي فوق دي اللي ألّفها حد كان قاعد ع الفيس بوك وبيدور على تفاعل وريتش.. جمل شكلها جميل وبتحضن وتطبطب لكن معناها عبيط وغلط.. لأننا لو مشينا ورا الحاجة عشان بنحبها من غير ما نشغل مخنا وندرس الموضوع كويس ونسأل أهل الخبرة يبقى هنلبس.. وش كده..

بتحب حد يبقى تشوف الأول هو مناسب واللا لأ ولو مناسب تاخد الخطوات السليمة.. لو مش مناسب تنساه.. ما تضيعش وقتك وعمرك ع الفاضي..

بتحب مجال معين غير مجال دراستك شوف له شغل في السوق واللا لأ وشوف هتعرف تسلك في دراسته أصلا واللا لأ وشوف انت باقي لك في الدراسة الحالية قد ايه لو مش كتير يبقى كمل زي ما انت..

بتحب البزنس فمش عايز أفاجئك بس كل الناس بيحبوا البزنس عادي ومعظمهم ما يعرفوش يمشوا فيه.. زي ما كل الناس بيحبوا الكورة ومتخيلين انهم لو خدوا الفرصة هيقطعوا النجيلة لعب بس ده ما بيحصلش.. فيه فرق بين اني أحب وبين اني أقدر.. ما تسيبش شغلك وتتبطر عليه بسبب انك بتحب البزنس ونفسك يكون عندك مشروع..

مشروعك مش ماشي يبقى استشير متخصص وشوف الصح تقفل وتشوف حاجة تانية تعملها في حياتك واللا ينفع تكمل بنظام معين.. بس كده.. مش هتقعد مع حاجة بتستنزفك وبتعطلك في حياتك وبتأخرك لمجرد انك بتحبها..

خدت قرار وطلعت نتايجه غلط في غلط؟ عادي مين فينا مش بيغلط.. اعترف بغلطك واتعلم منه وشوف فيه طريقة تغير اللي انت فيه واللا لأ ولو مافيش شوف الترتيبات المناسبة اللي تخليك عايش كويس في الوضع الجديد (تــــــــأقــــــــلــــــــم)..

بس كده.. ربنا خلقك تحس وتفكر وتختار وتتحرك في الحياة.. ما تقفش عند “تحس” وتلغي باقي الإمكانيات وتنسى المطلوب منك..

المصدر