التصنيفات
مقالات الضيوف

ليه الحياة صعبة وكلها اختبارات؟

هتستحق الجايزة ازاي!

– لو قولتلك عاوزين نعمل مسابقة جايزتها 100 جنية, نعملها ازاي؟

جايزتها 100 جنيه بس؟ ممكن سؤال رياضي ولا حاجة واللي يجاوب ياخدها

– طيب لو الجايزة 10000 جنيه؟

لا ده مبلغ كبير فخلينا نصعبها حبتين, ممكن تبقي اساله كتير تاريخي علي رياضي علي علمي وديني

– طيب لو الجايزة مليون جنية؟

لا احنا كده بقي هنعمل حاجه كبيره يعني نحجز مكان مثلا ونعمل فيه مسابقات مختلفه لمدة اسبوع مثلا وكل يوم مسابقه شكل واللي يفوز فيهم كلهم هو اللي ياخد المليون جنية

– طيب لو الجايزة 500 مليون دولار؟

ممم, ده رقم كبير جدا جدا, لا احنا كده ممكن نخليها مسابقة دولية يعني يقدر ناس كتير تشارك فيها من كذا دولة وتكون مدتها 3 شهور من التحديات بس تحديات من نوع مختلف ويكون داخل فيها اختبارات نفسية وبدنية ومحاولات توقيع بين المتسابقين ونكون معينين ناس وظيفتهم انهم يحبطو المتسابق وميخلوهوش يكمل المسابقة وناس تانية وظيفتها تشجعه عشان يكمل بحيث يبقي الموضوع فيه عدل برده, الجايزة كبيرة جدا فلازم تكون التحديات كبيرة جدا.

كل ما تلتزم بالشروط هتاخد نقط إيجابية ولو أخليت بالشروط هتاخد نقط سلبية واللي هيفوز في المسابقة هو اللي نقطه الإيجابية اكتر.

وعشان العدل احنا هنضيف تحديات مخصصه لكل شخص اصل مش عدل اننا نعمل نفس التحديات للناس كلها باختلاف اعمارهم واوزانهم وصحتهم وثقافتهم ونفسيتهم لاننا كده هنبقي متعمدين نخسرهم, لا احنا عندنا عدل, فهنعمل تحديات عامة اللي هي اي حد يقدر يدخلها عادي لكن التركيز كله هيبقي علي التحديات الخاصة بكل شخص.

يعني لو انت بتحب الأكل فيكون ليك تحديات خاصه انك متاكلش مثلا غير حاجه معينه ومتقربش من اي حاجه غيرها, ولو انت بتاع بنات يبقي شرطنا انك متقربش من اي بنت طول المسابقة لا وايه هنخليك كل يوم تشوف بنات حلوين عشان متبقاش قادر تمسك نفسك ولو قدرت تمسك نفسك هتكمل وتاخد ال 500 مليون دولار مقدرتش هتخسر.

ونطلب منهم حاجات يومية لازم يحافظو عليها فوسط المدعكه بتاعة المسابقة, اه دول 500 مليون دولار!

– جميل جميل, طب ولو الجايزة هي الجنة؟

ممم…

– فهمت يا صاحبي المغزي؟ فهمت ليه الحياة صعبة وكلها اختبارات؟ فهمت ليه انت بيحصلك اختبارات شايفها صعبه ومطوله وبتحصلك انت مبتحصلش لفلان؟ فهمت ليه احنا اسباب في حياة بعض فتلاقي فلان اللي متعرفوش بيساعدك بينما فلان القريب منك مبتشوفش منه غير الأذي؟ فهمت ليه في اختبار بيكون صعب جدا عليك وانت مش فاهمه وعمال تقول فييييين اللي مصمم المسابقة (ولله المثل الأعلي) مبيتدخلش ليه يحللي الاختبار الصعب ده؟ طب وهل من العدل انه مصمم المسابقة يتدخل ويحللك التحدي؟ يبقي هتستحق الجايزة ازاي!

{فلا تعلم نفس ما أخفي لهم من قرة أعين جزاء بما كانوا يعملون}

المصدر