ليس كلّ من يؤسّس يطوّر

في استشارة لإحدى الشركات المحترمة – كان المسؤول عن الشركة أخّين محترمين جدّا – الأخّ الأكبر هو من أسّس الشركة

الأخّ الأكبر مهندس – والأخّ الأصغر دارس بيزنس

كالعادة سمعت مقدّمة عن الشركة وعن الموضوع محلّ الاستشارة قبل ما اتكلّم

وبعدين قلت لهم ( أنا هارمي حجر في البركة – وبعدين نبقى نلمّ الطرطشة براحتنا )

قلت لهم ( أنا شايف الأخّ الأكبر يتراجع لإدارة قسم البحوث والتطوير – بينما يتقدّم الأخّ الأصغر لإدارة الشركة في هذه المرحلة !! )

ليه قلت كده !

قلت كده لإنّ مرحلة تأسيس الشركة – تختلف عن مرحلة تطوير الشركة

ولذلك – تختلف الصفات المطلوبة لقائد الشركة في كلّ مرحلة

والصفات الموجودة في كلّ شخص بنقسّمها ل 3 حاجات – بنختصرهم في كلمة ASK

السلوك – Attitude

المهارات – Skills

المعرفة ( العلم والخبرة ) – Knowledge

وبالترتيب كده من الأسفل للأعلى

المعرفة يمكن اكتسابها بسهولة

المهارات يمكن اكتسابها مع شيء من الجهد

والسلوكيّات يمكن تغييرها بصعوبة

ف كلّ موقع في الشركة هنحطّ فيه شخص بناءا على ال ASK بتاعه

وقائد الشركة ده بردو موقع – محتاج نتخيّر ليه ال ASK المناسب

موقع قائد الشركة دا نفسه بقى – بيختلف من حيث كون الشركة في مرحلة التأسيس ولّا التطوير – ودا محور البوست الحالي

قائد الشركة في مرحلة التأسيس محتاج يكون

#المؤسّس_من_حيث_السلوك /

يكون شخص صبور – لا ييأس رغم الإحباطات الكتيرة اللي هتقابله في البداية

يكون شخص معاند – مع مرونة تغيير الوسيلة رغم العند في الهدف

يكون شخص ذو جلد – عشان مطلوب منّه مجهود بدنيّ كبير

يكون شخص مخاطر – ممكن اقول لك كمان متهوّر ومغامر ومقامر

#المؤسّس_من_حيث_المهارات /

مطلوب منّه يكون متعدّد المهارات – لإنّه تقريبا هيعمل كلّ حاجة في الشركة قبل ما يجيب حدّ يعملها – هيشتغل بنّا ومناول ومدرّس فرنساويّ لغاية ما يجيبوا مدرّس فرنساويّ

مطلوب منّه مهارة الإقناع – عشان يقنع أوّل وتاني عميل بشركته التي ليس لها سابقة

مهارة الإقناع دي تستلزم مهارة ( العرض ) – ومهارة العرض تشمل ( اللباقة )

عشان كده ما فيش حاجة اسمها دا عمل لي بلوكّ عشان ما عرفتش اعبّر عن سؤالي – ما هو ما عرفتش تعبّر عن سؤالك دي معناها بلوكّ – مالهاش معنى تاني

مطلوب منّه مهارة سرعة التعلّم – عشان هيظهر له حاجات كتير محتاج يتعلّمها في بداية مشوار الشركة – وبسرعة

مطلوب منّه مهارة التكيّف – هوّا اللي يتكيّف على أوضاع السوق اللي عمّال يتصدم بيها

#المؤسّس_من_حيث_المعرفة /

مطلوب منّه يكون عنده علم بالمجال بتاعه من الناحية الفنّيّة – يكون عارف مواصفات المنتجات مثلا

ومطلوب يكون عنده خبرة في المجال بتاعه من الناحية الإداريّة – يكون اشتغل في مكان مشابه وشاف طريقة إدارة الشركة اللي زيّ كده بتكون ازّاي

ده ال ASK بتاعة الشخص اللي هيأسّس

لكن !!

الشخص اللي هيطوّر بقى – يختلف

اللي هيأسّس مطلوب منّه إخراج الشركة من تحت الأرض – وعمل قواعد ليها تشيل الدور الأوّل

لكن – اللي هيطوّر – مطلوب منّه يبني على القواعد دي برج كبير – ويسكّنه بسكّان ومحلّات وشركات و و و

عشان كده هتختلف ال ASK بتاعته كالتالي

#المطوّر_من_حيث_السلوك /

مطلوب منّه يكون شخص مرن – يقبل أيّ حاجة بشرط حاجة تانية من الطرف التاني

يقبل تخفيض السعر مثلا مقابل بيع كمّيّات أكبر

في الوقت اللي المؤسّس كان مطلوب منّه يكون مخاطر – ف المطوّر مطلوب منّه يكون عقلانيّ – الحسابات عنده تغلب المخاطرة والطموح

المؤسّس كان مطلوب منّه مهارة ( الإقناع ) – لكن المطوّر مطلوب منّه مهارة ( التفاوض )

المؤسّس ما عندوش حاجة يتفاوض عليها – أنا عاوز ابيع لك ده وخلاص – ف محتاج اقنعك بالده ده

لكن المطوّر عنده اللي يسيبه عشان ياخد حاجة تانية – ممكن ما عرفتش ابيع لك ده – لكن ممكن اشتري منّك ده – أو أشاركك على ده – أو تسيب لي ده واسيب لك ده

مطلوب منّه يكون شخص ( غير شخصيّ )

يعني ما بيتعصّبش للوجو والبراند وإسم الشركة – ممكن عادي جدّا يحطّ إسم شركته رقم 2 في شراكة – عادي جدّا

ممكن يبيع جزء من الشركة – يدخل في شراكة مع شركة أكبر ويلغي إسم الشركة من الشراكة الجديدة – عادي – بينما الشخص المؤسّس بيكون متعصّب للإسم اللي دمّه سال عليه

مطلوب منّه يكون شخص ( عامّ ) لا يهتمّ بالتفاصيل اللي بعد مرحلته

بينما المؤسّس كان بيدقّق في كلّ تفصيلة

لكن المطوّر بيجيب اللي يهتمّ بالتفاصيل – ويرسم ليهم الهدف البعيد – وهمّا يمشوا ناحيته

المؤسّس بيشتغل IN business

بينما المطوّر بيشتغل ON business

#المطوّر_من_حيث_المهارات /

مطلوب منّه مهارة التفويض – مش هوّا اللي هيعمل – هوّا هـ يحسن اختيار اللي يعمل – ويرسم له الهدف – ويناقشه في استراتيجيّة الوصول للهدف – وهيتابعه وهوّا بيسوق الشركة تجاه الهدف – وهيقيّم آداؤه

#المطوّر_من_حيث_المعرفة /

بينما المؤسّس كان مطلوب منّه يكون على علم بالمواصفات الفنّيّة لمنتجه

ف المطوّر المفروض يكون على علم ب الماليّات

يكون عنده علم بطرق تطوير الشركات – تطوير منتجات ولّا تطوير أسواق

يكون على علم بالتوسّعات – يعني إيه توسّع رأسيّ ويعني إيه توسّع أفقيّ

يكون على علم بالتكاملات – يعني إيه تكامل أماميّ أو خلفيّ أو جانبيّ

يكون على علم بالقانون

يكون على علم بطرق التشارك – بيع الحصص – الاستحواذات – الاندماجات

يكون على علم بطرق التمويل

لو ركّزت في الكام سطر اللي فاتوا – هتلاقينا ما اتكلّمناش خالص عن #المنتج

إحنا بنتكلّم عن #الشركة

خلاص

الشاكوش يرى جميع الأشياء مسامير

بتبيعوا بزّازات زيّ بتبيعوا ثاني أكسيد نترات الفارمانجسيوم – الشاكوش يرى جميع الأشياء مسامير

عشان كده كان من ضمن النصيحة إنّ إدارة الشركة تخرج خارج المصنع – أنا عاوز المدير الجديد ( في مرحلة التطوير ) ما يبقاش عارف المصنع دا بيصنّع إيه ولا بيبيع إيه – هوّا ممكن يكون بيدرس بيع المصنع دا نفسه أصلا – عادي جدّا – ويفتح مكانه بوتيك – عادي – لو دا هيكسّب الشركة أكتر

لكن مؤسّس المصنع بيتقمّص دور محمود المليجيّ في فيلم الأرض ويقول لك كنّا رجّالة ووقفنا وقفة رجّالة

من حيث الخبرات – المطوّر المفروض يكون عنده خبرات في الشراكات – التمويل – التصدير

من فترة كنت مع صاحب مصنع – قال لي إنّه بياخد كورس حاليا في ( حوكمة الشركات ) – وبيفكّر في موضوع ( المؤسّسيّة ) – وعاوز يعمل مجلس إدراة – و و و

بينما نفس العميل ده لو قابلته من خمس سنين كان هيسألني عن يعني إيه معامل سريان البلاستيك – ويعني إيه زلّاقات جانبيّة في الاسطمبات

طبعا ما فيش إنسان كامل يعني – يعني ما تاخدش ال ASK اللي قلناها للمؤسّس أو المطوّر وتقيس نفسك عليها فتقول أنا بعيد قويّ

أنا بحطّ لك ( مقام ) – لو ( البسط ) بتاعك فوق ال 50 % من المقام ده – إتحرّك – ما قلنا المؤسّس مقامر

أخيرا – وملحوظة مهمّة /

مش معنى كلامي إنّه ( من يؤسّس لا يطوّر )

أنا بقول ( ليس كلّ من يؤسّس يطوّر )

يعني فيه ناس تقدر تأسّس في مرحلة التأسيس – بسّ تتحبس فيها

وفيه ناس تقدر تأسّس في مرحلة التأسيس – وتطوّر في مرحلة التطوير

لكن بشرط !!

إنّه يقلع عباية المؤسّس – ويلبس عباية المطوّر

والنفس البشريّة قادرة تستوعب العبايتين – لكن مطلوب من الشخص نفسه إنّه يفهم الفرق بين المرحلتين – ويلبس لكلّ مرحلة عبايتها

أخيرا /

إفتكر الرسول صلّى الله عليه وسلّم كان بيعمل إيه في المرحلة المكّيّة – وكان بيعمل إيه في المرحلة المدنيّة

أو افتكر الدور اللي قام به سيّدنا أبو بكر الصدّيق رضي الله عنه – مقارنة بالدور اللي قام به سيّدنا عمر رضي الله عنه

سيّدنا عمر رضي الله عنه ما كانش يقدر يعمل اللي عمله – لو ما كانش سيّدنا أبو بكر رضي الله عنه عمل له اللي عمله

كذلك المؤسّس ما يقدرش يعمل شغل التطوير – لإنّه بيكون في حرب التأسيس – ف بيبقى لكلّ حدث حديث ولكلّ مقام مقال

لكن – لو خلاص خلّصنا مرحلة التأسيس – يبقى نفتح في التطوير بقى

المؤسّس الثالث في الأمّة كان سيّدنا معاوية رضي الله عنه – اللي قدر يلمّ الشتات تاني – ويقيم دولة – وبعديه ييجي اللي يطوّر زيّ الوليد بن عبد الملك بن مروان مثلا

ف #لكلّ_دولة_رجال

المصدر