أولا . يعني إيه الفنكوش ؟!
يعني بيزنس لامع وبراق . بيطلع بسرعة . يكسر الدنيا . يحقق مكاسب جبارة . ويختفي فجأة . مخلفا وراءه خاسرون كثر
أقرب مثال على ذاكرتنا كان ( الصبارة الراقصة )
وأكبر مثال في ذاكرتنا كان ( الكمامات في زمن الكورونا )
وفيه أمثلة كتير . لكن هتكون في مجالات خارج مجال الصناعة فصعب أجمعها
طيب
هل الفنكوش حلو ولا وحش ؟!
الفنكوش حلو للي شغال في مجاله الأم
يعني
فنكوش الكمامات كان حلو للي عنده مصنع مستلزمات طبية
فنكوش الصبارة الراقصة كان حلو للي شغال في استيراد وتوزيع لعب الأطفال
يبقى إذن . ما هي إجابة سؤال البوست ( كيف ينجح الفنكوش ؟! )
الإجابة ببساطة هي
حضرتك اشتغل في بيزنس تقليدي . تصنيع مستلزمات طبية مثلا . أو تجارة لعب أطفال . أو أو أو
اشتغل الشغل التقليدي . صنع وبيع واكسب المكسب التقليدي
ولما يظهر فنكوش في مجالك . إدخل بتقلك وخد وش القفص في أيام . بالكتير أسابيع
وبعد كده اخرج بسرعة !!!
ليه ؟!
إرجع لتعريف الفنكوش . هتلاقي فقرة بتقول ( مخلفا وراءه خاسرون كثر )
مين دول ؟!
دول اللي هيدخلوا على الفنكوش من خارج مجاله . طامعين في المكاسب اللحظية !!
قال يعني احنا قاعدين شايلين طين المجال من سنين . ولما يظهر له مكسب لحظي . تيجوا انتوا تاخدوه . هأو
دول ما بيكونوش مستعدين
فعلى ما بتفوت الأسابيع الأولى من الفنكوش . بيكونوا هما بيسابقوا الزمن عشان يدخلوا التراك
على ما يدخلوا . بيكون أهل المجال خدوا خير الفنكوش الجديد
بيدخل أصحابنا الكواحيل دول يلموا قشر البندق
بل إنهم أساسا ممكن يكونوا آخر مرحلة مكسب لأهل المجال !.
يعني آخر بيعة كسب منها تاجر لعب الأطفال في مجال الصبارة الراقصة . كانت لناس داخلين السوق لأول مرة
كانوا داخلين يعملوا بيزنس . فاتعمل عليهم بيزنس . واتباع لهم الفنكوش.
وتاجر لعب الأطفال القديم كسب من الفنكوش مرتين
مرة لما باع للناس العاديين
ومرة لما باع للي داخلين المجال على عماهم وفاكرين نفسهم هيحققوا ثروة في أيام
يا فندم
ما فيش حاجة سهلة
ما فيش مكاسب بتيجي في أيام
المجال اللامع البراق هو مجال مخيف لحد بيفهم
المجال اللامع البراق هوا الكنافة بالمانجة
لكن المجال اللي يأكل عيش طول السنة وفي أي وقت وفي أي مكان هوا البسبوسة والكنافة بالقشطة العاديين بتوعنا
فخليك في الحاجات التقليدية دي . وما تشبطش في الترندات
ولما ييجي رمضان . أكتر واحد هيكسب من الكنافة بالمانجة هوا مين ؟!
بالظبط
هوا اللي طول السنة بيبيع بسبوسة وكنافة بالقشطة
من ثبت نبت . والملتفت لا يصل
النتش ده ما يبنيش صناعة ولا تجارة
الترندات دي ما تبنيش بيزنس راسخ مستقر
لم أجد مضيعة للمال مثل ((((( الطمع )))))
ولم أجد صفة سيئة في الرجال مثل ((((( استثقال العمل )))))
تقول له الطريق الصحيح اهو . هوا الطريق الطويل الممل ده
تلاقيه متذمر منك !!
هوا حضرتك محتاج إيه يعني ؟!
محتاج طريق سهل يحقق لك مكاسب كبيرة بسرعة
أيوه . ما فيه ناس عملت ملايين من الكمامات
أرجع واقول لك . اللي عمل الملايين من الكمامات هما أصحاب مصانع المستلزمات الطبية
هما الناس اللي كانوا بيصنعوا قبل الأزمة
الناس اللي كانوا مستحملين رخامة الصناعة في الأيام العادية
فجات الصناعة كافئهم بمكاسب ضخمة في فترة سريعة
فالأصل هو العمل المرهق الممل ذو الأرباح العادية . والاستثناء هو الطفرات . الفناكيش
والطفرات دي بيكون خيرها فقط للي كان مستحمل العمل المرهق الممل في الأوقات العادية
طيب
كيف تصنع الفنكوش ؟!
لو عندك مصنع أجهزة كهربائية مثلا . سافر أوروبا وأمريكا كل سنة . ولف في المحلات هناك . هتلاقي ١٠ أجهزة جديدة
تعالى هنا اعمل اسطمبات ٣ منهم . وانزل بيهم السوق
اتنين هيفشلوا . وواحد هينجح
هنا ظهر ليك فنكوش
إضرب على الحديد وهوا سخن بقى . وصنع منه كميات . وبيعها خلال سنة . بهامش ربح مبالغ فيه
إحصد الأرباح الضخمة . وتاني سنة هتلاقي كل مصانع الأجهزة المنزلية قلدتك
خلاص . ما تحرقش جاز كتير . ولا تقول فكرتي وسرقوها
سيبهم يحاربوا بعض . وسافر تاني . وشوف ١٠ أفكار جداد تانيين
واعرض اسطمبات المنتج للبيع . هتلاقي ناس كتير عاوزة تشتريها . دول الطامعين في الفنكوش
بيع لهم الاسطمبات بأغلى ما صنعتها . وهما هيشتروها . دا آخر مكسب ليك من الفنكوش ده