كيف تأمركت أمريكا – كريم سماره

بينما أمريكا هي في الحقيقة أحد أعظم منجزات البشر في التاريخ

الأوّل خلّينا نشوف #كيف_تأمركت_أمريكا ؟!

يعني

إيه الأسباب اللي خلّت أمريكا فعلا دولة عظيمة

وبعدين نشوف كيف ظلّت و #تظلّ أمريكا عظيمة

موضوع ( ستظلّ ) دا مش في علمنا

لكنّها بالفعل كانت وما زالت عظيمة

عشان كده باستغرب من ترامب لمّا بيقول ( لنجعل أمريكا عظيمة ثانية )

هيّا يا ابني كانت نزلت من العظمة وانتا اللي جاي ترجّعها ؟!

ما تتكلّم على قدّك

بسّ طبعا الدعاية الانتخابيّة مالهاش علاقة بالمنطق

الجزء الأوّل من البوست وهو كيف تأمركت أمريكا ؟!

وهنا فيه أسباب منها

#السبب_الأوّل /

#أمريكا_هي_البيت_الثاني_للأوروبّيّين

حضرتك بتتولد في بيت ممكن ما يكونش أحسن حاجة في خيالك

لكن لو جات لك فرصة تبني بيتك الخاصّ بقى بعيدا عن بيت أبوك ف بتعمل في البيت التاني كلّ التعديلات على الأخطاء اللي كنت شايفها في بيت أبوك

ودا اللي عمله الأوروبّيّين في أمريكا طرق واسعة بيوت كبيرة عربيّات كبيرة انتقاما من حواري وزقق أوروبّا اللي كانت في ذاكرتهم

#السبب_الثاني /

#أمريكا_هي_النظام_الثاني_للأوروبّيّين

حضرتك ورثت من أبوك شركة كانت خربانة إداريّا ف كنت بتعاني في إدارتها

لكن لو عملت بعدها شركتك الخاصّة هتعمل لها نظام إداريّ من أوّل يوم

لإنّك شفت الخراب اللي كان في شركة أبوك وعارف تصلّحه ازّاي لكن مش عارف تصلّحه جوّا الشركة اللي كبرت وتكلّست على الخراب ده

وده اللي عمله الأوروبّيّين في أمريكا تجنّبوا الأخطاء الإداريّة والتنظيميّة اللي كانت في أوروبّا بممالكها وصراعات العروش بتاعتها معظم اللي راح ألمانيا مثلا يحكي لك عن بيروقراطيّة قاتلة

#السبب_الثالث /

#ثقافة_الأوروبّيّين_قبل_ما_يروحوا_أمريكا

الأوروبّيّين ما راحوش أمريكا بثقافة مهزومة أصلا ولكنّهم قبل ما يروحوا أمريكا كانوا أصلا عندهم فهم لنظم الحكم

الحكم الديموقراطيّ كان بدأ في انجلترا في سنوات 1600 و 1700 قبل تأسيس أمريكا

ولو رجعت خطوة ممكن تقول الديموقراطيّة بدأت في أوروبّا في بدايات الألفيّة الثانية يعني من ألف سنة مع ظهور البرلمان البريطانيّ

ولو رجعت أكتر هتلاقي تجارب حكم ناضجة عند الرومان ومن قبلهم الإغريق يعني من آلاف السنين

ف الأوروبّيّين ما كانوش رايحين أمريكا يجرّبوا

بدليل إنّهم رفضوا يدفعوا الضرايب لبريطانيا ما لم يكن لهم تمثيل نيابيّ في البرلمان البريطانيّ

شعار انفصال أمريكا عن بريطانيا أصلا كان ( لا ضريبة بدون تمثيل )

ما كانش عيش حرّيّة عدالة اجتماعيّة كرامة إنسانيّة زيّ عندنا يعني

ولا الحرّيّة الإخاء المساواة بتاع فرنسا

دي شعارات عاطفيّة أكثر منها عملانيّة

ف دي كانت ناس فاهمة قبل ما تنشأ الدولة أصلا

#السبب_الرابع /

#طبيعة_الناس_اللي_راحت_أمريكا_أصلا_من_الأوروبّيّين

الأوروبّيّين كلّهم كانوا يتميّزوا بالصفة اللي في السبب السابق إنّهم مثقّفين وفاهمين سياسة وعارفين حقوقهم مقابل الدولة

لكن

اللي راح أمريكا منهم بقى همّا إمّا المغامرين أو المجرمين ودول الفئتين المؤهّلين للانتصار دائما

اللي راح أمريكا ما كانش موظّف في السجلّ المدنيّ في مانشستر دا عاش ومات في مانشستر عمره ما كان هيركب مركب ويخوض بحر الظلمات ( المحيط الأطلنطيّ )

اللي راح أمريكا همّا الناس اللي احنا بنسمّيهم بلغة النهارده ( روّاد أعمال )

دي ناس كانت رايحة تعمل عظمة في أمريكا يا إمّا تهلك هناك

ف ما تستغربش من إنّهم عملوا عظمة

#السبب_الخامس /

#طبيعة_القتال_في_الشخصيّة_الأوروبّيّة

الشخصيّة الأوروبّيّة عندها شراسة لم تنجّسها مفاهيم الخذلان ( اللي بيسمّوها تسامح )

الشخصيّة الأوروبّيّة عندها ( لو ظلمتني هاقتلك )

عشان كده من أهمّ القوانين اللي حافظت وتحافظ على استقرار أمريكا قانون إتاحة السلاح للجميع

ليه ؟

عشان لو الحكومة افترت على الناس تطلع الناس تقاتل الحكومة ف تظلّ أمريكا عظيمة

دي كانت رؤية الآباء المؤسّسين في بداية تأسيس أمريكا مش هيحافظ على التوازن في البلد دي إلّا إنّ الشعب يكون قويّ مقابل الحكومة

لكن في الدول المتخلّفة بيغذّوا ثقافة إنّ الحكومة لو ضربتك ف هيّا أبوك وبيربّيك

ولو انتا اعترضت تبقى إبن عاقّ

من سنتين تقريبا حصل إنّ أحد أفراد الشرطة الأمريكيّة ضرب مواطن ظلم

ف طلع المواطنين بالسلاح بهدلوا الشرطة لحدّ ما خلّوها ركعت حرفيّا

الشرطة الأمريكيّة بالزيّ الرسميّ نزلت على ركبة ونصّ في الشارع ودا وضع ركوع اعتذارا للشعب الأمريكيّ

وإلّا كان هيفضل الشعب يقتل فيهم لحدّ ما يركّعهم يا إمّا نجيب أمريكا دي من دلفها ونقفلها خالص عادي

عندنا طبعا كان هيقول لك هوّا العسكريّ الغلبان اللي جاي يضربك بالنار دا يبقى مين مش دا أخويا وأخوك أبويا وأبوك أمّي وأمّك وقوم نادي ع الصعيدي وابن اخوك البورسعيديّ قوم اتلحلح

في الدول المتخلّفة بيعلوا من شعار ( سيادة الدولة )

يعني إيه سيادة الدولة ؟!

سيادتها على مين يعني ؟!

على مستعمراتها في الخارج يعني ؟ ولّا على مين ؟!

ما هو لو فيه مستعمرات في الخارج كنّا قلنا إنّكوا بتتسيّدوا عليهم

هتقول لي أمريكا مين اللي بترفض الظلم دول ظالمين الكوكب كلّه

ما هو حضرتك مش واخد بالك إنّه في أمريكا فيه فرق بين ( المواطن و الإنسان )

كلّ الجوايز للشطّار والهدايا للشطّار دي في أمريكا للمواطن حضرتك مش للإنسان

ف اللي مش هيتظلم هوّا المواطن

الإنسان بقى يجتهد كده ويتشطّر ويشدّ حيله ويتجدعن ويلعب رياضة ويشرب اللبن عشان صحّته ويخلّي دولته عظيمة زيّ أمريكا كدهوّت وهوّا ما عادش يتظلم إن شاء الله

ف من أعظم أسباب عظمة أمريكا و #استمرار عظمة أمريكا إنّ أمريكا دولة محاربة شعب محارب

أمريكا من بعد الحرب العالميّة التانية لغاية دلوقتي دخلت حوالي 50 حرب متخيّل ؟!

يعني تقريبا كلّ سنة حرب لكن مش كلّها في نواحينا فما نعرفش عنها حاجة

بالمناسبة الرسول صلّى الله عليه وسلّم كان بيدخل حرب كلّ شهر تقريبا إنتا طبعا حكوا لك عن الغزوات فقط !!

مجموع غزوات و #سرايا الرسول صلّى الله عليه وسلّم حوالي 100 معركة

في 10 سنوات هجريّة تقريبا

يعني 10 معارك في السنة

يعني معركة كلّ شهر تقريبا !! متخيّل ؟!

إنتا طبعا بيوهموك إنّ الرسول صلّى الله عليه وسلّم دخل مكّة وخلاص كده وقال للناس ( إذهبوا فأنتم الطلقاء )

وركّز لي الله يكرمك على ( اليوم يوم المرحمة وليس يوم الملحمة )

وركّز لي الله يكرمك على إنّ الرسول صلّى الله عليه وسلّم خلّى الأسرى من قريش فداؤهم إنّهم يعلّموا المسلمين الكتابة شوف أهمّيّة الكتابة يا ولا

دا انتا اوّل آية في القرآن إيه إقرأ طبعا أمّال وتمصمص شفايفك جامد في أومّال دي

واردم لي بقى على 100 غزوة وسريّة !!

إستمرار الحروب هو من أهمّ أسباب تحقيق العظمة والحفاظ عليها ما ترك قوم الجهاد إلا ذلّوا

أمريكا بشكلها الحالي الصناعيّ تشكّلت أساسا بعد حرب أهليّة بين ولايات الشمال والجنوب

ولايات الشمال كانت عاوزة تاخد البلد لاتّجاه الصناعة ف محتاجين نحرّر العبيد عشان ما فيش عبد هيكون عامل ماهر مستحيل

وولايات الجنوب كانت عاوزة تحتفظ بالعبيد عشان دول أرخص بكتير للأغراض الزراعيّة والزراعة مش محتاجة الإبداع في العبد يعني زيّ الصناعة ما هي محتاجة مهارة العامل

طيّب نحلّ الخلاف دا ازّاي ؟

سهلة يلّا بينا نتحارب واللي يموّت من التاني أكتر يمشّي كلامه على البلد كلّها

ف الشخصيّة الأوروبّيّة فيها نظريّة الشراسة دي

بالمناسبة

تفسير آية ( ولا تلقوا بأيديكم إلى التهلكة ) هو ( لا تتركوا القتال )

الصحابة لمّا انتصروا في المعارك والإسلام بدأ يستقرّ قالوا نشوف شغلنا بقى

اللي كان بيزرع يرجع لأرضه واللي كان بيتاجر يرجع لتجارته

ف ربّنا سبحانه وتعالى حذّرهم إنّهم لو تركوا القتال هتكون دي هلكتهم

ف طبيعة القتال اللي الأوروبّيّين احتفظوا بيها وانتقلت معاهم لأمريكا هي سرّ عظيم من أسرار عظمة أمريكا

#السبب_السادس /

#الموارد_الطبيعيّة_المهولة

طول عمرنا نسمع إنّ مصر خدت موارد العالم كلّها خبّتها ف سرداب تحت دوران خلوصي في شبرا وسايبة العالم كوللو يا عيني من غير موارد

ياكش بسّ احنا مشكلتنا إنّنا مش عارفين ندير الموارد دي

بينما الحقيقة إنّ مصر دولة معدومة الموارد

عندنا فوسفات حضرتك

وحجر جيريّ اعتبرناه رخام وهوّا مش رخام ولا حاجة هوّا نوع من الحجر الجيريّ بسّ العيلة اعتبرته رخام

بينما الحقيقة إنّ أكبر دول العالم من حيث الموارد الطبيعيّة هيّا الصين وأمريكا وروسيا إلخّ

طيّب كويّس كده نبقى احنا رقم 4

4 مين يا فندم إيدك مربّعة

إحنا قول ال 40 ال 140 حاجة كده

حتّى في الزراعة اللي هيّا مش نشاط اقتصاديّ فخم يعني أمريكا عندها أرض زراعيّة قدّ مصر 50 مرّة

50 مرّة دا رقم حقيقيّ مش 50 يعني كتير يعني

دا غير المياه طبعا

أمريكا هي مخزن عملاق من مخازن الموارد الطبيعيّة

عندها كلّ حاجة حتّى الصحراء عندهم بردو

إنتا بسّ لإنّك بتشوف أمريكا طول الوقت في الأفلام بتشوف شوارع مانهاتن والأبراج اللي بواجهات قزاز ف ما تعرفش إنّ وراء الشوارع دي فيه 10 مليون كيلو متر مربّع من مستودعات الخيرات في الأرض

حلو بردو يعني إحنا كمصر نعتبر 10 % من أمريكا

ما همّا 10 مليون كيلو متر مربّع واحنا مليون كلّه بالآلة الحاسبة اهو

لا حضرتك

إنتا مليون ع الورق لكن في الحقيقة إنتا عندك 5 % من المليون ده فقط هو الحيّ

لكن أمريكا ال 10 مليون بتوعها عندها منهم حوالي 80 % حيّ

متخيّل فرق كواكب من بعضها مش فرق دول

الأنكت من كده بقى إنّها رغم ذلك إلّا إنّها مستعمرة معظم العالم وبتاخد موارده في كرشها بتراب الفلوس فلوس يا دوب مقابل تشغيل العبيد في الدول المستعمرة الحرّة المستقلّة دي

#السبب_السابع /

#الموانع_الطبيعيّة

أمريكا حواليها من اليمين والشمال محيطين حضرتك أكبر محيطين في الكوكب

وفوقيها كندا دولة هزيلة سكّانيّا

كندا تقريبا نفس مساحة أمريكا لكن عدد سكّان أمريكا حوالي 10 أضعاف سكّان كندا

يعني ما فيش خوف منها

ومن الجنوب المكسيك وأمريكا اللاتينيّة

ودول خابوا زمان وكمّلوا في الزراعة ف ما فيش خوف منهم

بل إنّ أمريكا في بداياتها أصلا طلّعت مبدأ إسمه مبدأ مونرو بيقول إنّ أمريكا الجنوبيّة دي تبعنا أصلا ومش مسموح لأيّ دولة مستعمرة تستعمر دولة من دول أمريكا الجنوبيّة

طيّب الموانع دي عملت إيه ؟!

يا خبر !!

عملت إيه !!

دولة قعدت 300 سنة حضرتك تشتغل وتكنّز وتصنّع وتعمّر وتبني وتطوّر و و و و

بينما بالتوازي الي كان بيقول للتاني في أوروبّا صباح الخير كانت بتقوم بين بلدينهم حرب

أوروبّا الحالية اللي بناها أمريكا !

بعد الحرب العالميّة التانية ما كانش فيه في أوروبّا طوبتين فوق بعض

ف أمريكا عملت خطّة إسمها خطّة مارشال دي خطّة بناء أوروبّا بعد الحرب

طيّب ليه أمريكا نفسها ما اتهدّش فيها كشك سجاير حتّى

ما قلت لحضرتك الموانع الطبيعيّة ما حدّش كان فيه حيل يوصل لبرّ أمريكا أصلا

حتّى اليابان لمّا ضربت أمريكا في بيرل هاربر بيرل هابر دي جزيرة في المحيط يعني ما وصلوش لساحل أمريكا دي مسافات يابا

المسافة بين بيرل هابر وأمريكا زيّ المسافة بين السعوديّة والجزائر كده !!

المسافة بين بيرل هاربر وأمريكا تقريبا قدّ المسافة بين اليابان وبيرل هاربر هههههههههه

ف إحنا ك أمريكان في هدنة داخل بلدنا بقالنا 300 سنة

حبّينا نطلع بنطلع نروح نحارب في بلد تانية ونرجع لبلدنا وهيّا ما فيهاش خربوش

لكن ما حدّش يقدر ييجي يحاربنا في أرضنا

عشان كده أمريكا عندها قاعدة بتقول ( القوّة البحريّة هي القوّة )

ودي عقيدة أيّ دولة استعماريّة بالمناسبة

كلّ الدول الاستعماريّة زمان كان أ ب كده يكون عندك أسطول

الدولة العثمانيّة أيّام مجدها كان أسطولها مسيطر على البحر المتوسّط

جات بعد كده أيّام مجد أسبانيا ف بقى عندها أسطول جبّار الأرمادا

وتحت علمهم إكتشف أميرجو فيزبوتشي إنّ الأرض الجديدة اللي اكتشفها كولومبوس قبل كده هي أرض جديدة مش الهند يعني زيّ ما كان متخيّل كولومبوس

عشان كده اتسمّت الأرض دي على إسمه أميرجو بقت أميريكا

جات بعد كده بريطانيا عاوزة تاخد الراية من أسبانيا تعمل إيه عملت أسطول

حتّى محمّد عليّ لإنّه كان عنده رؤية توسّعيّة بنى أسطول

في المقابل بريطانيا لمّا حبّت تكسّحه عملت إيه ضربت له الأسطول مش القلعة يعني

ف أمريكا غير الموارد الطبيعيّة اللي اتكلّمنا عنها قبل كده فهي موهوبة بالمحيطين اللي حواليها دول موانع طبيعيّة جبّارة

الموانع دي عطت فرصة عظيمة لأمريكا تكبر وتتضخّم وتتعملق وانتا مش قادر تروح تحاربها

إنتا هتزهق أساسا وانتا في الطريق أقول لك مش محارب

#السبب_الثامن /

#الفردانيّة

أمريكا هي مجموعة من الشركات أنشات دولة

ودي مش نكتة هيّا فعلا كده

اللي راحوا أمريكا راحوا ك أفراد كلّ واحد منهم عمل لنفسه عزبته الخاصّة طالما بتدفع الضرايب للملكة في بريطانيا خلاص

ومع الوقت الناس دي جمّعت بعضها وعملت التكتّل الكبير اللي اسمه أمريكا

ف أمريكا فيها النزعة الفرديّة دي إنّ كلّ واحد عاوز يعمل عزبته الخاصّة

ودا سبب كبير جدّا لتضخّم الاقتصاد

غير لمّا الحركة تكون جايّه من الدولة في اتّجاه المواطن

يعني إحنا كدولة هنعمل مشروع المليون فدّان

طيّب مين هيزرعهم ؟!

هنجيب ناس تزرعهم

ف طبيعيّ ما تلاقيش حدّ من الناس دي قلبه ع الموضوع

دا الطبيعيّ بالمناسبة مش عشان احنا وحشين ولا حاجة

فيه قاعدة بتقول ( الولاء ينتج من التملّك )

ف إذا كما كانتش الأرض بتاعة أبونا تتحرق هيّا كانت أرض أبونا ؟!

هنعمل مصانع مش عارف غزل ونسيج هتروح تلاقي العمّال قاعدين يسقّعوا قلل ما هي ما كانتش مصانع أبونا

لكن في أمريكا هيّا مصانع أبونا فعلا وأرض أبونا فعلا

ما قلت لك كلّ واحد كان مغامر أو مجرم راح أمريكا خدله خماشر طماشر ألف فدّان هناك بتوع أبوه ف كان بيفرك عشان يعمل بيهم أسطورة اقتصاديّة

واحد تاني دخل في حرب النحاس فرم المنافسين بتوعه وبقى كينج النحاس قلت لك ثقافة الشراسة

واحد تالت عمل شركة عربيّات فورد

واحد عمل شركة طيّارات بوينج

واحد عمل شركة تكييفات كاريير

وهكذا ما تعدّش

ف العقليّة الفردانيّة دي هيّا اللي بتعمل الإنجاز مش عقليّة الدولة أبدا مستحيل

أنا اتعاملت مع جهة من جهات الدولة في دراسة لمصنع جات لي عروض الأسعار في حدود المليون دولار للخطّ بقول لهم قالوا لي عادي !!

عادي ؟!

دا حجم الإنتاج ما يغطّيش 1 % من تكلفة الخطّ

عادي

ما هي مش فلوس أبونا

ولا حدّ هييجي آخر السنة يحاسبنا دا احنا هنقول المنحة يا ريّس كمان بمنتهى البجاحة

مليون مليون

عادي

ولو هتزوّد عن مليون دولار كمان تكون مصلحة أصلا وانتا فاهم بقى يا مون بيه

عشان كده خلعت من الشغلانة دي

ييجوا بعد كده يقولوا محمود هوّا اللي ضحك علينا يا بيه واحنا غلابة ما نعرفش حاجة ف المكن يا بيه

بينما لمّا بكون باعمل دراسة لمستثمر عادي بيقول لي ما تعرفش تنزّل لنا السعر من المورّد 1000 دولار !!

طاب 500 طاب هات لنا قطع غيار ببلاش طاب أيّ حاجة طيّب

طاب شاشتوتش بومبورجر وشحطب عليه

وبعد الهري دا كلّه يقول لي ما تشوف لنا مكنة مستعملة

لكن عند الحكومة أعطه خمسة وسيّارة

ف الفردانيّة دي في أمريكا صنعت العظمة

هيقول لك بسّ الاتّحاد قوّة

وانتا إمتى كنت شفت أمريكا مش متّحدة !!

بقول لك عملوا حرب ضدّ ولايات الجنوب عشان ما تنفصلش

الاتّحاد قوّة ده في الشكل السياسيّ في الإطار العامّ

لكن على مستوى الشغل والبيزنس الفردانيّة تصنع العظمة

التدافع أحد أهمّ سنن الحياة

قال تعالى

ولولا دفع الله الناس بعضهم ببعض لهدّمت صوامع وبيع وصلوات ومساجد يذكر فيها اسم الله كثيرا

وقال تعالى

ولولا دفع الله الناس بعضهم ببعض لفسدت الأرض

لكن عندنا هيقول لك إيه

هيقول لك عاوزين نبقى كوّة واحته كته

نيجي بقى للأسباب اللي مخلّيّة أمريكا #مستمرّة في عظمتها

#السبب_الأوّل /

#الازدواجيّة_في_الحكم

و #التشتّت_في_الأقاليم

أمريكا فيها دايما تيّارين كبار الجمهوريّين ( المحافظين ) والديموقراطيّين ( الحداثيّين )

لو لاحظت جدول رؤساء أمريكا هتلاقيهم طول الوقت بييجوا بالتناوب

8 سنين بتوع جمهوريّين دول اللي بنلطّش فيهم في العالم نطلع نحارب نلمّ غنائم واحد يجيب لنا غنائم من غير حرب ترامب يعني

و 8 سنين ديموقراطيّين دول الطبطبة بقى وتنظيم البيت الأمريكيّ من الداخل ونهضم الهلايب اللي جابهالنا الجمهوريّين بقى

لاحظت الملاحظة دي زمااااان

أنا فتّحت عيني على الدنيا في عهد كلينتون وما زال فرق شعري في اليمين ( وهو الأقلّ انتشارا بين الناس ) تأثّرا بفرق شعر كلينتون !!

ما كنتش اعرف المفروض الناس بتفرق شعرها من اليمين ولّا الشمال ومن كتر ما كنت بشوف كلينتون دا في نشرات الأخبار فرقت شعري ع اليمين زيّه واكتشفت بعد كده إنّ معظم الناس بتفرق شعرها من على الشمال

المهمّ

كلينتون دا كان قمّور السنين تحسّه جاي يهزّر مش جاي يحكم فهمت انا بعد كده ليه

جه بعده بوش الإبن وهوب عينك ما تشوف الّا النور حرب العراق وحرب أفغانستان ومشاكل مع القرموطيّ وكوفي عنان ومرعى بتاع الكلمة وليلة جامدة قوي سعاتّك

جه بعديه أوباما

أوباما ده كنت تحسّه ممرّضة في مستشفى أطفال ملاك رحمة يا اخواتي

وقال إيه جه جامعة القاهرة وقال ( السلام عليكم ) بالعربيّ كان ناقص يتحجّب

لأ وقلع الجزمة قبل ما يدخل الأزهر

أيوه حضرتك هوّا المفروض كان يدخل ازّاي !!

جه بعديه ترامب في فترته الأولى دا جاب غنائم من غير حروب دا جمهوريّ

جه بعديه بايدن جدّو ديموقراطيّ

إيه الملاحظة ؟!

الملاحظة إنّ أمريكا عندها #إزدواجيّة في الحكم

فترة جمهوريّ وفترة ديموقراطيّ

واللي قبل كلينتون كان بوش الأبّ جمهوريّ دا اللي عمل حرب العراق الأولى ( الخليج الثانية أو عاصفة الصحراء )

عشان كده بقول لك كلينتون كان إيه ؟!

قمّور

ديموقراطيّ

جاي يلمّ بعد بوش الأبّ

وييجي بعديه بوش الإبن يطلع يهلّب تاني

الازدواجيّة دي ما بين الجمهوريّين والديموقراطيّين بتخلّي الرئيس طول الوقت مش قادر يستبدّ بالحكم

وبتخلّيهم همّا الاتنين بيلعبوا على نغمتين مختلفتين الاتنين بيفيدوا أمريكا

نظريّة الطيّب والشرّير يعني دا خارج أمريكا

داخل أمريكا بقى الازدواجيّة دي بتحافظ على إنّ كلّ واحد يكون ماشي على الصراط المستقيم

ما هو في الفترة اللي فيها الرئيس ديموقراطيّ الجمهوريّين ما بيروحوش مزارعهم في تكساس يطاردوا الأبقار بيفضلوا ينخربوا ورا الرئيس الديموقراطيّ ده ويهزّؤوا فيه

بعدها ييجي رئيس جمهوريّ يمسكوه الديموقراطيّين يقلّعوه الكلوتّ في الكونجرس

ترامب فضل فترته الأولى كلّها الديموقراطيّين ممهمزينه بإنّه جاسوس لروسيا تخيّل !!

ييجي بايدن يطلع ترامب يتمسخر عليه كان ناقص يركّب له ديل ويجرّي العيال وراه ف البيت الابيض

ف ما فيش أبدا رئيس أمريكيّ يقدر ياخد أمريكا كده أنكجيه ويمطوحها وراه مكان ما هوّا شايف إنّ دا الصحّ ولا أريكم إلّا ما أرى ولا أهديكم إلّا سبيل الرشاد

طاب ما حلوة الازدواجيّة دي ما نزوّدها

بدل ما يبقوا حزبين يبقوا 10

همّا فعلا في أمريكا عشرات الأحزاب لكن الاتنين الكبار الحمار والفيل كبار جدّا لدرجة إنّ ما فيش حدّ ظاهر جنبهم

ودي بردو ميزة عظيمة

ليه ؟!

تخيّل إنّنا 10 أحزاب ضعيفة كنّا هنعمل إيه

يا نتخانق

يا نعمل تحالفات

القرود إذا تشاجرت أتلفت الحديقة وإذا اتّفقت سرقت الحديقة !!

التحالفات دي كارثة على السياسية

لإنّنا عشان نعمل تحالفات كلّ واحد فينا هيميّل للتاني في مصلحته اللي هيّا على حساب مصلحة الشعب

لكن

لو احنا الاتنين أقوياء جدّا ف ما فيش حدّ فينا هيتنازل للتاني

ولا حدّ فينا محتاج حزب صغيّر حقير يساعده ف يعطيه تنازلات عشان يدعمه بتحالف

ف بيفضل الحزبين القويّين الكبار يتنافسوا منافسة مباشرة

مش عشان مصلحة الشعب ولكن عشان الشعب ينتخبهم عشان مصلحتهم همّا يعني

واللي يتلفّت حواليه يلاقي الحزب التاني فاضحه على طول ف تبقى بردو في النهاية المصحلة للشعب

عشان كده باستبعد موضوع إنّ ترامب يكون بيتلاعب بالبورصات لصالحه ولصالح شركاته لإنّه ببساطة الديموقراطيّين هيقلعوا له ملط في الكونجرس

وما عندهمش حدّ أقوى من التاني ف هيتجبّر عليه يعني لو هتبلطج ك ترامب هنبلطج قصادك عادي ف كلّه بيرجع في النهاية لصوت العقل

عبد الرزّاق السنهوريّ أبو الدساتير العربيّة قال ( لا يسيطر القانون إلّا بين قويّين أو بين ضعيفين فإن تفاوتت القوى فالقوّة هي القانون )

الحزبين الكبار في أمريكا قويّين ف غصب عنّها أمريكا بقت دولة قانون مش عشان همّا قمامير يعني

لكن !

لو واحد فيهم أقوى من التاني هيفرمه

ودا طبعا مش تمعا في الحوكم ولكن حفاظا على الشعب الأمريكيّ الذي لم يجد من يحنو عليه

وفشقة بيه من إنّه يقع فريسة للدكروماطيّين الأشرار اللي كانوا عاوزين يغتصبوهم

هوّا احنا يعني بنقتل الأشرار ليه مش عشان أمريكا ؟!

وقامت الدمعة نازلة من عينه يا خال

ناس طيّبين قوي يا خال

قوي يا ابني قوي

الحزبين في أمريكا بيرجعوا للقانون لإنّهم عارفين إنّنا احنا الاتنين أقوياء لو خبّطنا في بعض هنوصل إحنا الاتنين لإنّنا نبقى احنا الاتنين ضعفاء !! ف تعالى نتفاهم

لكن لو أنا قوي وانتا ضعيف هاتفاوض معاك ليه

فيه قاعدة بتقول ( لا يمكنك التفاوض مع الأسد بينما رأسك بين أنيابه ) !

لو أنا قوي وانتا ضعيف أنا هافضل تنّي أحطّ عليك لحدّ ما الحطّاطة بتاعتي تبوظ

وانتا ما تقدرش تقول لي طبعا غير سانك يو فندمي وابن فندمي

القانون ما يتوجدش إلّا بين اتنين أقوياء

كذلك الضعيفين ما حدّش فيهم قادر ياخد حقّه من التاني ف بيلجؤوا للقانون

عبد الرزّاق السنهوريّ ما كانش بيهزّر يعني

ودا أبو القانون حضرتك مش واحد كان قاعد ع القهوة يعني وطرقع كلمتين وهوّا بيكركر في الشيشة

ف تداول السلطة بين الحزبين القويّين في أمريكا هو ضمانة لاستمرارها بقوّتها

الدولة الإسلاميّة ظلّت قويّة طول ما كانت السلطة فيها بتتناقل بين أسر قويّة

أسرة بتضعف ف تطلع لها أسرة أقوى منها تبيدها وتنتزع السلطة منها

لكن السلطة كانت بتظلّ في نفس بيت العائلة الواحد الدولة الإسلاميّة

كإنّ العموديّة اتنقلت من عمّ لعمّ داخل نفس العائلة

يعني

لو كانت طلعت دولة أقوى من الدولة العثمانيّة من داخل نفس البيت الإسلامي وكانت هذه الدولة أبادت العثمانيّين كان زمان الإسلام لسّه دولة عظمى لغاية دلوقتي

ف التداول دا في أمريكا طول ما هو موجود طول ما انتا هتفضل شايفها بجبروتها ده

في نفس السياق الحاجة التانية اللي تضمن بقاء واستمرار العظمة هي ( التشتّت في الأقاليم )

يعني ما يقدرش واحد يروح يحتلّ مبنى الإذاعة والتليفزيون في أمريكا مثلا ويلقي على الشعب بيان الثورة زيّ ما حصل عندنا في 52

الظبّاط الأحرار دخلوا القصر الملكيّ ودخلوا مبنى الإذاعة والتليفزيون بسّ حضرتك كان عندك حكم ملكيّ وراح

في السعوديّة آل سعود دخلوا بيت آل رشيد ف خلاص خدوا السعوديّة كلّها

في فرنسا الثوّار دخلوا قصر فرساي شكرا لويس السادس عشر روّح لامّك

لكن أمريكا مش كده والدول المتقدّمة كلّها مش كده

الدول المتقدّمة عندها الأقاليم قويّة

ومن مجموع قوى الأقاليم بتنشأ قوّة الدولة

كنت باستغرب جدّا لمّا أشوف مصنع في دولة متقدّمة ف ألاقي المزارع حواليه من كلّ ناحية

مش المفروض دي منطقة صناعيّة وتلاقي المصانع مرصوصة جنب بعضها وكده

لحدّ ما أردكت إنّه في أوروبا والدول المتقدّمة فيه مصانع كتير متناثرة في الأقاليم كده !!

دا من مفهوم #قوّة_التشتّت

لكن الدول المتخلّفة دايما تلاقي كتلة الدولة كلّها متركّزة في العاصمة

الله يرحمه جمال حمدان كان بيقول على مصر ( الرأس الكاسح والجسم الكسيح ) !!

الرأس الكاسح يعني القاهرة والجسم الكسيح باقي الدولة

تشتّت القوى في الدولة ده بيحافظ على استقرارها لإنّ ما فيش كفّة قادرة تطغى على التانية

كلّنا أقوياء وهنظلّ متّحدين مع بعض عشان نبقى أقوياء أكتر لإنّنا لو تفرّقنا هنبقى أضعف

طبعا الكلمتين دول إزدواجيّة الحكم والتشتّت عندنا بيترزع في عقول الناس إنّهم كوارث !!

إزدواجيّة الحكم دي هي منازعة للملك فيما آتاه الله من ملك وشقّ عصا الطاعة

عصا الطاعة دي هيّا اللي لمّا تبقى في إيد شخص واحد بسّ هيجري ورا الشعب يلسوعه بيها على مؤخّرته ف طبعا عمره ما هيقول لك ما تيجي نعمل ازدواجيّة

ازدواجيّة آه وشّك ف الحيط وقفاك ليّا

والتشتّت دا طبعا زندقة

إحنا لازم نكون متّحتين نبقى كته

ونقوم عاملين سور حوالين الحتّة اللي هنتّحد فيها دي عشان اللي يرفع راسه بعد كده نقوم قافلين السور وهاتك يا دعك في اللي جوّا الدائريّ واللي برّا السور مالوش دعوة كلّ واهت في هالو يا موهي مالناشي داعواة

ف الوحدة اللي هيّا عكس الازدواجيّة معناها عندنا وحدة الحكم في إيد سلطة واحدة تستطيع قهر باقي الشعب

والاتّحاد عكس التشتّت معناه عندنا إنّك تخلّي كلّ الموارد في حتّة واحدة في كبتت يتي

طاب افرض لمّيت كلّ القوّة في حتّة ف ثارت ضدّي

لاااه ههههههه هوّا انا تلميذ

ما انا هروح احكم من حتّة تاني خالص بعيدة في الصحرا يبقوا ياكلوا بعض بقى هيفرهدوا على ما يوصلوا لي أصلا أكون انا ضربتهم بالطيران قبل ما يوصلوا لي

الوحدة والاتّحاد دول موجودين في الدول المتخلّفة

أمريكا بقى فيها إزدواجيّة وتشتّت

وطبعا انتا على ما اتعلّمت في المدارس هتشوف إنّ الاتنين اللي في الأوّل صحّ

والاتنين التانيين غلط !!

#السبب_الثاني /

#جذب_المهاجرين

مستر إكس الحقيقيّ اللي هوّا كيسنجر مستشار الأمن القوميّ الأمريكيّ قال أمريكا دولة عظيمة لأنّنا نبحث عن الخونة عندنا ونقتلهم ونبحث عن الخونة في البلاد الأخرى ونوظّفهم )

ممكن تضيف للجملة دي أنّنا نبحث عن #النابغين في البلاد الأخرى ونستقطبهم بالهجرة

أمريكا اتبنت على أكتاف المهاجرين ف بقت عظيمة في الماضي

لكن اللي مخلّيها #مكمّلة عظيمة في الحاضر إنّها بتبحث عن النوابغ في كلّ دول العالم وتستقطبهم ف ييجوا يطلّعوا عبقريّاتهم دي من عقولهم ويصبّوها في بوتقة كبيرة إسمها بتوقة العظمة الأمريكيّة

ف طول ما برنامج الهجرة السنوّيّ لأمريكا شغّال طول ما ستظلّ أمريكا عظيمة

هتقول لي دا ترامب بيحارب المهاجرين

هههههههه

ترامب بيحارب الهجرة بتاعة العالم اللكع اللي بيهربوا من حدود المكسيك دول بالنسبة له عالم كتّع كسّح كسّل

لكن العباقرة من المكسيك أهلين تلاتة وخمس سهلانات بيهم في مراكز البحوث الأمريكيّة

ترامب ما عندوش مشكلة مع المهاجرين بالعكس

ترامب عنده مشكلة مع المهاجرين السكلّيّة مش أكتر

موضوع الهجرة دا كمان بيعطي قوّة كبيرة جدّا من خلال تنوّع الموارد الثقافيّة في أمريكا

تنوّع الأفكار

يعني مثلا عندنا في غزوة الخندق فكرة الخندق دي كانت من مين ؟!

من سيّدنا سلمان الفارسيّ رضي الله عنه

جابها منين ؟

من إنّهم كانوا في بلاد فارس بيعملوا خنادق في الحروب أثناء الحصار دي فكرة ما كانتش موجودة عند العرب

قيس على دا بقى دولة عندها تنوّع من كام ثقافة من أوروبّا لوحدها عشرات الثقافات

غير أمريكا اللاتينيّة مثلا خدت من أسبانيا والبرتغال فقط

فيه نقطة تانية دقيقة جدّا

ألا وهي إنّ الهجرة دي بتعمل ( تحصينات ) لأجسام الأمريكان !!

يعني كلّ جنسيّة دخلت أمريكا دخلت بأمراضها !

ف تجمّعهم مع بعض عمل انتقال للأمراض دي ما بينهم ف أجسامهم بدأت تفرز أجسام مضادّة للأمراض دي

من أكبر أسباب فناء السكّان الأصليّين لأمريكا إنّهم كانوا عايشين طول عمرهم في مكان منعزلين فلمّا دخل عليهم الأوروبّيّين أجسام السكّان الأصليّين لم تتحمّل الأمراض اللي وصلت لهم وأجسامهم لسّه مش قادرة تتعامل معاها

دا بخلاف إنّ الأوروبّيّين نفسهم عملوا دا على سبيل التعمّد أحيانا بغرض الإبادة حرب بيولوجيّة يعني

عشان كده بشوف إنّ دا من فوائد فريضة الحجّ !!

كلّ دولة مسلمة بتبعت وفدها ( بأمراضه )

تنتقل الأمراض دي خلال الحجّ لوفود الدول الأخرى

ترجع وفود الدول الأخرى لبلادها محمّلة بالأمراض دي

ف أجسام كلّ شعوب الأمّة الإسلاميّة تبتدي تفرز مضادّات للأمراض دي

ف تصبح أمّة قويّة جدّا ضدّ الأمراض

ودي فكرة اللقاح بالمناسبة إنّي باعطيك المرض في صورة ضعيفة ف جسمك يفرز مضادّات ليه يعني جسمك بيعالج نفسه وبيقوّي مناعته بنفسه

عشان كده بننصح الأمّهات إنّهم ما يكونوش نضاف قوي مع أطفالهم سيبي الولد ياكل حاجة من الأرض بسيطة ف جسمه يبتدي يفرز مضادّات ليها

ف أمريكا حتّى من جانب التنوّع السكّانيّ بتاعها بتقوى ك عقل للأمّة و ك جسم للامّة !!

بعد الكلام دا كلّه هل حضرتك متخيّل إنّ أمريكا دي كيان عادي ؟!

هل متخيّل إنّ أمريكا يقدر يقودها #شخص بناءا على وجهة نظره في الحياة

وجهة نظرك دي عند امّك لكن احنا أمّة عظيمة

الفرق بين الدول المتخلّفة والدول المتقدّمة هو الفرق بين الموكروباص والقطر

الموكروباص يقدر سوّاقه يروح بيه مكان ما هوّا عاوز ولو حدّ من الركّاب اعترض هيجعّر في وشّه

لكن سوّاق القطر ما بيوجّهش القطر سوّاق القطر فقط بيزمّر في المحطّات

سوّاق القطر ماشي على طريق مرسوم شريط السكّة الحديد مرسوم له من سنين

سوّاق القطر ما بيوجّهش القطر توجيه القطر بييجي من عمّال التحويلة

سوّاق القطر حضرتك لو مات القطر هيقف لوحده تكنولوجيا بقى

فيه دراع في القطر لازم يفضل سوّاق القطر ضاغط عليه طول ما هو سايق

لو سوّاق القطر مات ووقع من على الكرسي الدراع ده هيرجع يفرمل القطر

سوّاق القطر ما بيسوقش القطر !!

ولو مات مش هتحصل حادثة

الدولة المتقدّمة زيّ القطر مش الموكروباص

شريط القطر هو القوانين

وأكشاك التحويلات هي البرلمانات

سوّاق القطر حضرتك بيزمّر في المحطّات

يعني رئيس الدولة المحترمة هو فقط #متحدّث_رسميّ بإسم الدولة دي

مش هوّا اللي بيضع قوانينها ( شريط القطر ) ولا يقدر يغيّرها ( أكشاك التحويلات )

ف أرجوكم بلاش السطحيّة بتاعة ( يا ترى ترامب هيودّي أمريكا ويودّي العالم كلّه وراها فين )

ترامب مين !!

فيه سبب مش عاوز اكتبه ك سبب مباشر

لإنّي باعتبره ويكإنّه منحة إلهيّة كده من الله سبحانه وتعالى للدولة اللي اسمها أمريكا دي في بداياتها

ألا وهو #الآباء_المؤسّسين

دول مجموعة الناس الحكيمة والأهمّ من ذلك #المخلصة اللي قعدوا مع بعض في بداية تأسيس أمريكا وحطّوا الخطوط العريضة اللي هتمشي عليها الدولة

الناس دي كانت لو حطّت طريق غلط لإنّهم غير حكماء

أو حطّوا طريق يخدم مصالحهم لإنّهم غير مخلصين

ما كنتش هتشوف العظمة دي

دول اللي مدّوا شريط السكّة الحديد لقطار إسمه أمريكا

طيّب

هل يتعارض كلامك ده مع سنّة الله سبحانه وتعالى في الكون بتداول الدول

لا طبعا

لكن الله سبحانه وتعالى إذا أردا شيئا سبّب له أسبابه

لمّا تلاقي أمريكا بدأت تنحرف عن الحاجات اللي جعلتها وبتبقيها عظيمة وقتها توقّع بداية الانهيار

لكن طول ما همّا ملتزمين بأسباب العظمة ما تتوقّعش إنّهم هينهاروا كده في يوم وليلة عشان سواد عيونك

قال إبن تيميه رضي الله عنه

إنّ الله يقيم الدولة العادلة وإن كانت كافرة

ولا يقيم الدولة الظالمة وإن كانت مسلمة

إنّ الدنيا تدوم مع العدل والكفر ولا تدوم مع الظلم

إنّ العدل أساس الملك

أخيرا

هل كلامك دا انهزاميّة ؟!

لأ طبعا أعوذ بالله سبحانه وتعالى

كلامي هو من منطلق قول الحقّ سبحانه وتعالى

قل للمخلّفين من الأعراب ستدعون إلى قوم أولى بأس شديد

لازم تكون حاطط الطرف الآخر في وضعه الحقيقيّ ما تستهونش بيه

لكن لمّا تيجي تقابله بقى ساعتها ربّنا سبحانه وتعالى هيهوّن عليك لو كنت عملت اللي عليك

قال تعالى

إذ يريكهم الله في منامك قليلا ولو أراكهم كثيرا لفشلتم ولتنازعتم في الأمر ولكنّ الله سلّم

وعزّ من قال

وربّنا الرحمن المستعان على ما تصفون

المصدر

دي فقرة أضفتها على بوست ( كيف تأمركت أمريكا )
شايفها مهمّة
ومش عاوز الناس اللي قرأت البوست من يومين تفوتهم
اللي هيقرؤوه جديد هيلاقوها لكنّها هتفوت اللي قرؤوه من يومين

وطبعا لا عزاء للناس اللي بتنادي ب نقاء العرق
وطرد المهاجرين السوريّين أو السودانيّين إلخّ
دي عالم مش عارفة كوعها من بوعها

موضوع الهجرة دا كمان بيعطي قوّة كبيرة جدّا من خلال تنوّع الموارد الثقافيّة في أمريكا
تنوّع الأفكار

يعني مثلا عندنا في غزوة الخندق فكرة الخندق دي كانت من مين ؟!
من سيّدنا سلمان الفارسيّ رضي الله عنه

جابها منين ؟
من إنّهم كانوا في بلاد فارس بيعملوا خنادق في الحروب أثناء الحصار دي فكرة ما كانتش موجودة عند العرب

قيس على دا بقى دولة عندها تنوّع من كام ثقافة من أوروبّا لوحدها عشرات الثقافات
غير أمريكا اللاتينيّة مثلا خدت من أسبانيا والبرتغال فقط

فيه نقطة تانية دقيقة جدّا
ألا وهي إنّ الهجرة دي بتعمل ( تحصينات ) لأجسام الأمريكان !!

يعني كلّ جنسيّة دخلت أمريكا دخلت بأمراضها !
ف تجمّعهم مع بعض عمل انتقال للأمراض دي ما بينهم ف أجسامهم بدأت تفرز أجسام مضادّة للأمراض دي

دا بخلاف إنّ الأوروبّيّين نفسهم عملوا دا على سبيل التعمّد أحيانا بغرض الإبادة حرب بيولوجيّة يعني

عشان كده بشوف إنّ دا من فوائد فريضة الحجّ !!
كلّ دولة مسلمة بتبعت وفدها ( بأمراضه )
تنتقل الأمراض دي خلال الحجّ لوفود الدول الأخرى
ترجع وفود الدول الأخرى لبلادها محمّلة بالأمراض دي

ف أجسام كلّ شعوب الأمّة الإسلاميّة تبتدي تفرز مضادّات للأمراض دي
ف تصبح أمّة قويّة جدّا ضدّ الأمراض

ودي فكرة المضادّ الحيويّ بالمناسبة إنّي باعطيك المرض في صورة ضعيفة ف جسمك يفرز مضادّات ليه يعني جسمك بيعالج نفسه وبيقوّي مناعته بنفسه

ف أمريكا حتّى من جانب التنوّع السكّانيّ بتاعها بتقوى ك عقل للأمّة و ك جسم للامّة !!

المصدر