هل الطب تجارة ؟!
الإجابة البسيطة . أيوه
فين الغلط ؟!
الغلط هو التجارة بالطب . وليس التجارة في الطب
إيه الفرق ؟!
التجارة في الطب يعني أنا مستثمر . طبيب . عندي البيزنس بتاعي . اللي هوا العيادة . بمارس فيها البيزنس باحترافية . وبكل قواعد البيزنس العامة . العرض والطلب إلخ . عندي تسعير وتسويق وخدمة عملاء . زي أي بيزنس
بينما
التجارة بالطب . هي استغلال الطب للحصول على مكاسب غير مشروعة
كأمثلة
أرشح للمريض مركز تحاليل معين بيعطيني عمولة . أو دواء معين عشان شركته بتدفع لي
دي خيانة للأمانة . المريض طالما دفع لك فلوس . أصبحت انتا ملزم تنصحه بالأفضل ليه . مش الأنفع ليك
أنا مثلا ما ينفعش أعمل لك دراسة . وانتا دافع لي فلوس عشان أرشح لك الأفضل . أقوم أرشح لك حد عشان هيعطيني عمولة !!
التجارة بالطب . إني أقول لك عندك مرض معين عشان ألففك ورايا واسحب منك تكاليف كشوفات متتالية . بينما انتا مش محتاج ده
التجارة بالطب . إن طبيب نساء مثلا يولد حامل قيصري . بينما هوا عارف إنها تقدر تولد طبيعي . عشان تكلفة الولادة القيصرية أغلى من الطبيعية . وعشان ما حدش يصحيه نص الليل يقول له الأم لازم تولد حالا
من منظور أوسع . إحنا ما قلناش حاجة جديدة
عشان الطب حاجة راقية يعني ؟!
ما كل الأشغال راقية
الترزي ما هي شغلانة راقية . يبقى يتحرج ياخد فلوس ؟!
نقول له إنتا شغلتك تستر الناس . عاوز تاخد فلوس مقابل ستر الناس ؟!
عامل البناء ما هي شغلانة راقية . مش دا بيوفر للناس المسكن . نقول له خلي عندك دم انتا بتؤدي رسالة
وعد أمثلة للصبح . كل الشغلانات ليها جانب معنوي راقي . يبقى نشتغل لبعض ببلاش بقى
نقول للفلاح يشتغل ببلاش . ولا عاوز الناس تموت من الجوع يا فاجر
الخلاف مش انتا بتاخد فلوس ولا لأ
ولكن . انتا بتاخد فلوس بطريقة صحيحة ولا لأ
إعمل شغلك صح ك دكتور . وحط التسعير المحسوب طبقا للبيزنس . وما تستسلمش لإرهاب كلمة الطب رسالة
كل الشغلانات هي مهن . مش رسائل ولا حاجة . وكلها الغلط فيها إنك تؤديها بشكل خاطيء . مش بشكل غالي ولا رخيص
يعني الفلاح لو غش . يبقى بيتاجر بالزراعة . مش في الزراعة
المدرس لو ما شرحش في الفصل عشان الطلبة تروح له درس . يبقى بيتاجر بالتعليم . لكن لو بيقبض فلوس مقابل التعليم . ف كده هو بيتاجر في التعليم . ما فيش لوم عليه
المحامي لو دافع عنك بالأدلة الصحيحة . يبقى بيتاجر في القانون . حلال وصح
لكن لو اشتغل بالمغالطات ولبس الحق بالباطل والباطل بالحق . يبقى بيتاجر بالقانون . دا اللي غلط
وزي ما قلت لك . ما فيش لوم على إنتا هتتاجر في الطب ازاي
يعني . لو عاوز تستهدف شريحة معينة . حقك
عاوز تغلي تمن الكشف لو البنزين غلي . حقك
طالما بتعمل شغلك نفسه مظبوط
لكن ترخص الكشف . وتهمل في تعقيم أدواتك مثلا . عشان توفر التكاليف . كده انتا مجرم . مش بطل قومي ولا طبيب الغلابة ولا حاجة
مش هنمشي ورا عقول السفهاء ونحكم بأفهامهم الساذجة
أخيرا
تقليل أسعار الكشف هتضر المريض . بس الناس عندها قصر نظر
كتبت ده في بوست تفصيلي قبل كده . مختصره إن تقليل أسعار الكشف هتخلي كل العيانين يكشفوا عند أحسن دكتور فقط . ف طبعا مستوى كشفه هيقل بسبب الضغط
وباقي الدكاترة هتقفل . تبقى انتا قضيت على الطب أصلا . وأكتر حد أذيته هو المريض . بس عقلك القاصر متخيل إنك كده بتنكذ المريد
كتبت بردو قبل كده إن الاقتصاد ما بيتعاندش
ما حدش يقدر يعاند حاجة زي قانون العرض والطلب مثلا
أو غيره من قوانين الاقتصاد
عاند براحتك . هتأذي نفسك من حيث تظن إنك بتعمل الصح
تاني
تاجر في الطب . حلال . وفي أي حاجة
لكن . ما تتاجرش بالطب . ولا بالهندسة . ولا بالخياطة . ولا بأي حاجة
وأنا مش دكتور بالمناسبة . مش باكتب ده من باب الدفاع عن مهنتي ولا حاجة