يا عم ده حسن خاتمة هو حد يطول اكيد هم مبسوطين دلوقتي ؟
الرسول لما صحابي إحتاج للغسل وهو في برد شديد وكان عايز يصلي وبعض الناس أفتوه إنه ملوش رخصة ولازم يغتسل واغتسل ومات قال قتلوه قتلهم الله مقالش دي حسن خاتمة ولا حاجة لأن حياة البشر ليها أهمية عظيمة وحفظ النفس هي أول وأعلى الضروريات أو المقاصد الخمس اللي جاءت بها الشريعة وربنا قال ولا تلقوا بأيديكم إلى التهلكة حضرتك دلوقتي بتقولهم إلقوها في التهلكة عادي
ما طول عمر الناس قديما وحديثا بتجد مشقة في الحج ايه الجديد ؟
برده الموضوع متوقف على الاستطاعة سواء قديماً او حديثاً حضرتك مجبتش جديد يعني أي حد زمان ولو من ألف عام لا يستطيع بدنيا القيام بالمناسك داخل في الحكم والزحمة الحالية في الحج مكانتش غير موجودة زمان محصلتش بالشكل ده غير مع سهولة التنقل والسفر ووسائل المواصلات العادية في العصر الحديث والانسان المعاصر بيجد مشقة في حاجات كتير الناس زمان كانت متعودة عليها غير ان الحاج زمان كان بيقدر ياخد أكله وحاجاته معاه بأريحية ويستريح في أي مكان ( زي الحج النظامي كدة دلوقتي) لكن دلوقتي الحج الغير نظامي بيضطروا يمشوا من طرق معينة طويلة ( في الشمس والحر ) ومش بيعرف ياخد معاه اكل ومية بنفس اريحية الحج النظامي فبيتعرض لمشقة كبيرة والناس زمان اغلبها مكانش بيأخر الحج لآخر العمر زي دلوقتي
اصل الناس بتموت في الحج النظامي برده … عادي ده ميمنعش انه الحج الغير نظامي أشق بمراحل كتيرة جدا وانه مهلك للنفس اكتر بكتير وده كلام الناس اللي حجت غير نظامي نفسهم او اللي شافوهم السنادي يعني استدلال في غير محله عامل زي اللي بيسافروا بسيارة متهالكة وخربانة ويعملوا حادث وتيجي تقولهم مصلحتوش السيارة ليه قبل ما تسافروا يقولك ما السيارات السليمة بتعمل حوادث برده والناس بتموت فيها ..وده طبعا يوضح ان الناس اللي بتردد ده لا تصلح للفتوى وروح البني آدم عندهم ملهاش تمن
ما جو عرفات بيبقى حر صيف وشتا ملوش دعوة ؟
اكيد حضرتك عمرك ما حجيت او حتى اعتمرت في الصيف والشتا عشان تعرف الفرق وإلا مكنتش قولت كدة وده معناه ان حضرتك بتفتي من غير علم يعني لا تصلح للفتوى والنقطة دي حتى لو صح اصلا ملهاش لازمة خالص انها تتقال في الموضوع مش دليل على حاجة اصلا انت شكلك عايز تلم عدد من الحجج وخلاص عشان يبان ان عندك حجج كتير
اصل دي اعمار مكتوبة اصلا ولو فضلوا في بلادهم كانوا هيموتوا برده ؟
لو الكلام ده حجة يبقى اي حد هيموت في اي حادث كان فيه تقصير في اجراءات السلامة هنقول نفس الكلام ومش هنحاسب المقصرين ولا هناخد بالاسباب اللي تمنع تكرار حدوث نفس الحوادث تاني وده معناه انها هتفضل تتكرر كل شوية وناس جديدة تموت
وايه يعني ما السنة اللي فاتت مات ٢٠٠ واحد مصري ومحصلش ضجة ؟
المفروض برده كان يحصل ضجة كلامك مش حجة لكن الزيادة في عدد الوفيات السنادي كبيرة انت ليه مش معتبر وفاة ٤٠٠ شخص اضافي شيء ميستاهلش يتعمل عليه ضجة هي روح البني ادم عندك ملهاش قيمة ؟!
اصل الناس ميعرفوش انه حج الزيارة ممنوع وهم سمحولهم ليه بالزيارة من الاول طالما هيمنعوهم من الحج ؟
والله دي نقطة تانية اصلا غير اللي احنا بنتكلم فيها لكن برده اللي بيعمل زيارة بيبقى مكتوب على الموقع ( زي الصورة كدة ) اقرار انه غير مرخص ليه بالحج ومش معنى انهم سامحين بالزيارة لاهالي المقيمين الموجودين في المملكة انك تخالف العهد وتروح تحج بما يخالف النظام اللي اتفقت معاهم عليه والمفروض ان المسلمين عند شروطهم يعني وده شرط انت اتفقت عليه من الأول
انتوا كدة هتخلوا الحج للاغنياء بس ..
ميكون للاغنياء بس ايه المشكلة ما الاغنياء بيستأثروا بحاجات كتير الفقراء ميقدروش يعملوها هو فريضة مربوطة بالاستطاعة أصلا واللي عايز يروح بيت الله ممكن يعمل عمرة في أي وقت في السنة عادي والحج الغير نظامي برده مكلف وفي ناس برده مش هتقدر عليه فكل اللي انت عملته انك خليت طبقة تحج وخلاص لكن لا يزال في ناس فقيرة مش هتقدر على تمن لا الحج النظامي ولا غير النظامي
