بوست ممكن يبقى صادم لناس كتير…
بس عادي ممكن اسمع مصطفى حسني واستفيد من برامجه…
وممكن اسمع عمرو خالد… مع اني بقالي سنين مش متابعه…
وبحب اسمع الشيخ الشعراوي الله يرحمه…
وبحب أسمع د. عمر عبد الكافي…
ونعمان خان – بالانجليزي…
و د. مصطفى محمود الله يرحمه…
و أمير منير… وحازم الصديق… وأحمد عامر
وغيرهم كتير
وبحب أسمع من القراء الشيخ المنشاوي والحصري وعبد الباسط…
وكمان بسمع موسيقى… برة رمضان…
بحب أسمع حمزة نمرة وكايروكي…
وبسمع بودكاستس كتير بالعربي والانجليزي…
وبودكاستس بتاعة مستثمرين ورواد أعمال في سيليكون فالي… معرفش جنسيتهم ايه… والا ملتهم… وممكن يبقوا من البعدا… بس للاسف سابقينا في مجالات التكنولوجيا…
وغيرهم كتير…
عادي…
ممكن اكون بسمع كل دول عادي…
وأخد من كل شخص بسمعه اللي يفيدني واللي أنا محتاجه… واللي مش عاجبني في كلامه اسيبه…
ومفيش حد بالنسبة لي منزه من الخطأ…
كل يأخذ منه ويرد…
مش لازم الواحد يسمع ناس كلهم في اتجاه واحد…
وعادي الواحد يسمع ناس كتير مختلفين حتى في اتجاهاتهم ويشغل دماغه ويستفتي قلبه…
ومحدش يأله حد…
وكل واحد هيتحاسب لوحده…
بس اللي اهم من… انت بتسمع مين…
انت بتعمل ايه باللي بتسمعه وتتعلمه…
ساعدت كام شخص حياته تكون افضل؟
علمت كام شخص؟
ايه أخبار رعيتك… الناس اللي مسؤولين منك؟
ايه أخبار علاقتك بربنا؟
شغل دماغك… واستفت قلبك…
وخليك مفيد لنفسك ومجتمعك وبلدك… وأمتك…
وبلاش الإتباع العمياني لأي بني ادم عايش بيننا
وفي مواضيع أهم بكتير هنتسأل عليها في الآخرة غير المواضيع اللي اكترنا شاغل نفسه بيها…
وربنا يهدينا وينفع بينا جميعا…
ويوفقنا لما يحب ويرضى…
ويستخدمنا ولا يستبدلنا…