اكيد بيمر عليك اسألة من نوعية نكمّل ولا نوقف
نزود budget ولا نقلل نعيّن حد جديد ولا نستحمل
نفتح سوق جديد ولا نقفل الباب
من اهم النظريات في علم الاقتصاد هي الMarginal Cost Analysis
الاقتصاد بيقولك فكر على الحافة مش على المتوسط
فكر في الخطوة اللي جاية بس
تكلفة الزيادة الصغيرة
وقيمة الزيادة الصغيرة
وده اسمه التفكير الهامشي أو marginal thinking
وهو ببساطة شديدة قانون إدارة الموارد
وقت وفلوس وتركيز وسمعة وطاقة
في الكتب الكلاسيكية هتلاقي جملة متداولة بشكل واضح
Rational people think at the margin
المعنى إن القرار الصح بيتاخد لما تقيس الزيادة الجاية
مش لما تحاسب نفسك على اللي فات
مثال أنت عندك تكلفة إجمالية كبيرة
مكاتب
رواتب
تكنولوجيا
تسويق
ده كله بيخلّي متوسط التكلفة يبان عالي أو واطي حسب الفترة
بس السؤال اللي بيحميك من قرارات انتحارية هو
العميل اللي جاي ده بالذات هيكلفني كام زيادة
وهيدخلي كام زيادة
الصفقة اللي جايه دي هتزود الربح ولا هتزود الضغط والخسارة المقنّعة
وهنا ناس كتير بتتلخبط بين متوسط ومارجينال
فييجي واحد يقولك احنا منطقيا مينفعش نبيع أقل من متوسط التكلفة
بينما شركات كتير بتكسب لأنها بتفهم إن في فرق بين رحلة مدفوع ثمنها و الطيارة طالعة بكراسي فاضية.. هتلاقي ساعات ثمن الرحلة قبلها ب٦ ساعات نزل جدا.. لانه احسنله ان يبيع تذاكر للكراسي الفاضية دي باي تمن حتى لو اقل من ثمنها الحقيقي لانه مكسب.. في اوقات تانية بيضرب الرقم في ٥ .. لان الطيارة متباعة مرة و نص و overbooked .. فا لو هoverbook زيادة يبقى كرسي بيزنس مضروب في اتنين
ودا اللي بيفسر ليه نفس الشركة تكسب من عميل وتخسر من عميل تاني بنفس التسعيرة
النقطة دي مش بس في التسعير
دي في الميزانيات كمان
لما تزود ألف جنيه في التسويق
هل الألف جنيه دي هتجيب نفس جودة العملاء ولا هتدخل في مرحلة إنك بتشتري وحشين أكتر لأن القناة تشبعت
لما تزود مندوب مبيعات جديد
هل هو هيجيب إيراد إضافي حقيقي ولا هيزود تعقيد إدارة وهدر وقت واجتماعات وتنازع ليدز
لما تزود feature
هل هي تزود اشتراكات و تحسن وضع المنتج هتزود تكلفة صيانة لا نهائية وتشتت المنتج وتخليه مرقع
ومن أهم الحفر اللي بنقع فيها حفرة اسمها sunk cost
فلوس اتصرفت وانتهت
وقت ضاع وانتهى
قرار اتاخد وخلص
ومع ذلك نفضل نكمّل عشان نثبت إن اللي فات كان صح
وده بالضبط سبب إن شركات بتكمل في مشروع خسران سنتين عشان مش عايزة تعترف
وبتتحول من قرار استثماري إلى قرار كبرياء
و ربنا يرحمنا من الego و التفكير العقيم اللي بيجي بسببه
لو بدأت من الصفر النهاردة هل كنت هتكمل في المسار ده
لو مكنتش دفعت ولا قرش قبل كده هل كنت هتدفع القرش الجاي هنا
لو الإجابة لأ يبقى أنت مش في قرار
أنت في عادة تعلق مرضي بفكرتك و قراراتك
هل أنت بتدفع marginal cost كبير مقابل marginal benefit صغير؟