ع الأقل ماتبقاش مسخ ١٠٠٪

أكتر حاجة ملبسانا في الحيطة هي إحتياجنا للقبول، إحتياجك لأنه يتم تقبلك وتفهمك ،بالتالي لإنك تكون محبوب!
واللي بدوره متوقف عليه تكوينك لصداقات ولعلاقات إجتماعية وعاطفية وعملية وبلا بلا بلا …

محتاج لصاحب، محتاج لشريكة لحياتك، محتاج لشغل، محتاج للمجتمع، محتاج يتم تقبلك، عشان دة يحصل، هتتشقلب

هتتشقلب عشان يتم تقبلك بالحد الأدني علي الأقل من مجتمعك، عشان متبقاش منبوذ
هتمشي ع الحيطة عشان يتم تقبلك من رئيسك، مديرك، رب عملك ….
هتتجمل، هتكذب كذبة بيضة، هتحور عشان صاحبتك تتقبلك، عشان أهلها يقبلوك ويدوك شرف الجواز من بنتهم

هيطلع عين أمك، هتفضل تلهث ورا تقبل الأخر ليك، من أول ما يبقي عندك سنتين تلاتة بتسعي لأن أهلك يتقبلوك ويحبوك، لحد ما تفضل تعدي السنين وإنت بتتشقلب وتفحت في كل الإتجاهات عشان يتم تقبلك، مع الوقت هتبقي مسخ، هتبقي ولا حاجة، هتبقي ماسخ، عبارة عن شوية رغبات من دة علي من دة علي شوية تانيين لدة

كل ما عرفت تستغني، كل ما بقيت حر أكتر، كل ما بقيت أصلي أكتر وبقيت نفسك وحقيقي
بس محتاج الأول تتفهم رحلتك وطبيعتها، المشوار اللي إنت جاي منه وتفاصيله، وإطلع من دور الضحية وإتعامل علي إنك ناجي من حرب، وإقبل إنت نفسك البشرية بكل ضعفها وقوتها، إقبل نفسك تمامًا الأول، وبعدين إستغني

محدش فينا أصلي ١٠٠٪، بس ع الأقل ماتبقاش مسخ ١٠٠٪

https://www.facebook.com/YahiaKordy0/posts/418262458599584