اولاً- الفلوس بتتصنع في عقلك الأول قبل جيبك، زي ما الفلوس بتتصرف في عقلك الأول، في افكار غالية وافكار رخيصة وافكار استهلاكية، كل الناس عندها افكار لصرف مليون جنية، لكن معندهمش فكرة ازاي يكسبوهم.
ثانياً- تقييم ثروة حد بيتبني علي حاجتين اجمالي الأصول الفعلية المملوكة للشخص، وقدرته علي توليد أصول مستقبلية، وبالتالي جزء كبير من الثروة قدرات فردية ، لو انت حققت الأولي من غير الثانية زي اللي ورث مثلا يبقي انت عندك تهديد ان الثروة دي تنتهي وتتبخر بسرعة، او تعيش خايف تخسرها طول الوقت.
ثالثاً – تقييم الفقراء للثروة غلط، لانه مبني علي اللي عين شيفاه مش اللي عقلك مدركه، هو بيشوف العربية والفيلا ، لكن مش هتشوف اسهم البورصة مش هتشوف عقود العقارات مش هتشوف سله العملات مش هتشوف حاجات كتير جداً وبالتالي تقيمك غلط، لان اللي معاه ١٠ مليون جنية راكب تيوتا كرولا وكيا سيراتو، ولبسه متوسط ، لان اللي معاه ١٠ مليون أصول غير اللي معاه ١٠ مليون فائض يصرفهم.
رابعاً: لو انت من الجيل الاول اللي هيصنع الفلوس، يعني متولدتش في أسرة غنية فأنت لن ينتطبق عليك الثراء غير بعد ما يتمسح بوشك الاسفلت حرفياً ومش هتعرف تستمتع بالفلوس غير بعد ١٥ ل ٢٠ سنة علي الاقل وطول الفترة دي انت بتبني وتحافظ وتتحوط، ولادك بقي هما اللي هيبقوا اتولدوا أغنياء وبيعيشوا حياة فيها أوبشن، فلازم تبقي عارف حدودك ومتقارنش نفسك بحد أتولد في الجيل الثالت من الثروة، لان دول ممكن يبدء بمرسيدس عادي وبشركة.
خامساً: نصيحة انك لو قعدت مع أغنياء هتتعلم منهم وهتبقي زيهم مع الوقت، بس هما الأغنياء هيقعدوا معاك ليه؟ لا وكمان هيفتحولك قلبهم ويقولولك اسرار شغلهم، ده بيحصل بس لما يبقي في قيمة انت هتضفها لحياتهم، يعني انت هتقطع شوط كبير جداً علشان توصل للمرحلة دي لوحدك.
سادساً: مفيش حد غني فاضي يقعد يعلمك او يعملك فيديو او مقال، خدها مني نصيحة مفيش حد بيساعد أصلا غير الشبعانين، طول ما انت جعان صعب عليك تساعد حد وهنا أنا مش بلومك خالص بالعكس انت اولي باللي في ايدك، لكن اللي شبع هو اللي بيساعد وبيسند ومش مستني منك حاجة، وبعدين اول حاجة بتشتريها الفلوس هي الوقت هو بقي غني علشان يبقي عنده وقت يخرج ويسافر ويقعد مع أصحابه ويلعب بس وقت الشغل هو مش فاضي.
سابعاً: بناء علي النقطة السابقة، الأغنياء بعد تحقيق اساسيات الحياة او قاعدة هرم ماسلو بيبدأ يفكر فيما هو اعلي قيمة وتأثير في الحياة انه يساعد حد يتبني عمل خير او مؤسسة ثقافية، يألف كتب يعمل محاضرات او لقاءات، اللي هي كلها أهداف تتعلق بقيمة في الحياة، يمارس هوايات، يتبع شغفة، يتقاعد بدري ويعمل اللي بيحبه، يتعلم مزيكا كده يعني.