أحد الجهات الداعية للنباتية عملت إعلان على لوحة كبيرة في الشارع..
الإعلان عبارة عن صف من الحيوانات.. قطة .. كلب.. أرنب.. فرخة.. معزة.. حصان.. بقرة..
ومع الصورة كان السؤال التالي: أين ترسم الخط الفاصل؟
بمعنى: على أي أساس تحدد الحيوانات اللي تدبحها وتأكلها والحيوانات اللي تربيها وتصاحبها؟
أنا شايف السؤال ده منطقي جداً ومبرر لأي حد شايف إن الإنسان زي الحيوان ومالوش أفضلية أو قدسية.. وإن الحيوانات شركاء للإنسان في الأرض.
صحيح.. ليه الكلب أو القطة تنام في حضنك على السرير.. بينما الفرخة المسكينة تنام مقلية أو مشوية في معدتك؟؟! .. على أي أساس اخترت وحددت؟
بالنسبالنا كمسلمين إجابة السؤال ده سهلة جداً جداً.. إحنا مؤمنين بخالق للكون.. هذا الخالق أنزل شريعة .. الشريعة أخبرتنا إن الحيوانات دي عبارة عن أنعام مسخرة لخدمة الإنسان.. بعضها مسخر كطعام.. وبعضها لمساعدة الإنسان في حياته.. وبعضها للترويح عن الإنسان والتأمل في بديع خلق الله.. وهكذا..
الشريعة الإسلامية حددت إيه اللي ينفع ناكله وإيه اللي مينفعش.. وأي حد مؤمن بهذه الشريعة الأمر بالنسباله واضح وسهل.
لكن بالنسبة للناس اللي مش معترفة بالدين أو ببساطة شايفه إن الدين ده مكانه الجامع فقط ومينفعش يتحكم في حياة الإنسان.. اللي رافضين الاعتراف بإن الإنسان له قدسية وأفضلية على الحيوان.. اللي شايفين الإنسان مجرد حيوان متطور.. ردهم إيه على السؤال؟ على أي أساس هيرسموا الخط الفاصل؟
الحياة بدون شريعة إلهية تحكمها هي فوضى..
فوضى مهما تقدمت التكنولوجيا وانتظمت البنيان وحركات السفن والطائرات والأقمار الصناعية.. لأن الإنسان سيستخدم كل هذا التطور المادي لينشر به أحقر وأقذر الأفكار التي تدمر المجتمعات..
هذا “التقدم” سيخرج لك ضابط مرور يوقف حركة السير حتى تستطيع البطة أن تعبر الشارع هي وأولادها الصغار!.. بينما ظابط الجيش في نفس البلد يقتل الأطفال والنساء في قارة أخرى!
عندما يصل بنا هذا “التقدم” في النهاية لنقول أن الإنسان لا فرق بينه وبين الكلب أو الخنزير! فأي تقدم هذا؟!
من التعليقات:
#تعليق ١: Aisha Youssef
الإنسان أفضليته و قدسيته بالعقل و حمله للأمانة فقط و ليس بأي شيء آخر..
في النهاية تظل الروح روح، و الإنسان مهما بلغ فهو مش المخلوق الوحيد على الأرض و أيوة يا باشمهندس هو شريك للمخلوقات الأخرى على الكوكب و مش كل حاجة بتاعتنا لوحدنا!
و مش فاهمة الحقيقة أيه اللي ربط بين كون الإنسان شريك للمخلوقات الأخرى على الأرض بالفوضى و القتل؟!
الإنسان السوي اللي بيرفق بالحيوانات أكيد عمره ما هيوافق على قتل إنسان.
النموذج اللي ذكرته غير سوي أصلا عشان يكون مثال للإستشهاد بيه و دعم وجهة نظرك!
رد علي تعليق من Mohammed Sami
المسلم يأكل من لحوم الحيوانات بالطريقة التي أمره الله بها..
مثلما نصلي لله..
مثلما لا نشرب الخمور
مثل ما نبيع ونشتري ..
نتبع ولا نبتدع..
هي نسك وشعائر وطريقة للحياة لابد لك من اتباعها طالما أنك مسلم
(قُلۡ إِنَّ صَلَاتِی وَنُسُكِی وَمَحۡیَایَ وَمَمَاتِی لِلَّهِ رَبِّ ٱلۡعَـٰلَمِینَ لَا شَرِیكَ لَهُۥۖ وَبِذَ ٰلِكَ أُمِرۡتُ وَأَنَا۠ أَوَّلُ ٱلۡمُسۡلِمِینَ)
[سورة الأنعام 162 – 163]
رد التعليق من علي محمد علي
حضرتك بتقولي الفرق بين الإنسان والحيوان هو حمل الأمانة فقط وكأن حمل الأمانة ده شيء ثانوي مش مهم.. حمل الأمانة ده هو اللي بسببه في يوم قيامة هتنفطر فيه السموات والأرض!!
كل الرسل والأنبياء أرسلوا بسبب حمل الأمانة.. كل الكتب السماوية .. كل شيء بسبب حمل الأمانة!
فانا مستغرب إنه ده وحده مش كفاية إننا ننهي النقاش!!
حضرتك مفهمتيش أصلاً إن البوست بيتكلم عن شيء أخر غير العطف على الحيوان.. البوست بيتكلم على إن الناس بتحكم بالصح والغلط حسب مزاجها وهواها.. اللي بيحب الكلاب مش شايف ومش مهتم بالأذي اللي بتسببه لغيره .. فبيحكم على الموضوع بمزاجه.
النباتيين بيحكموا على أكل الحيوانات بمزاجهم وما تهواه أنفسهم ..
فاحنا بنقول إن الفرق بيننا وبين باقي الناس إننا عندنا شريعة هي اللي بتحكم.. مش بنحكم بمزاجنا.. ديننا بيسمحلنا بقتل بعض الحيوانات للطعام.. وبيطالبنا بالعطف أثناء تعاملنا مع باقي الحيوان بقواعد معينة .. منها إنه لا ضرر ولا ضرار.. وهو برضو اللي بيقولنا إن الإنسان أولى وأهم..
بنوضح إن العطف الغربي على الحيوانات مش تقدم ومش دليل على سمو أخلاقهم إذا كانوا في نفس الوقت بيقتلوا البشر في مكان آخر..
البوست من الأخر عن الناس اللي دينها الإسلام.. والناس اللي دينهم مزاجهم وهواهم!
أَرَأَيْتَ مَنِ اتَّخَذَ إِلَٰهَهُ هَوَاهُ أَفَأَنتَ تَكُونُ عَلَيْهِ وَكِيلًا – الفرقان:43