بعد شغل ٦ سنين اخراج وحوالي ١٠ سنين كونتنت كرييشن، ممكن يأهلوني شويه اني اقولك، شكرا انك كرييتف
وجودك شيء نادر جدا، فكرة انك لسه كرييتف هو الي ممكن يكون لسه مخلي في حاجه حلوة في الصناعه،
الناس فاكرة شغلانتك سهلة، وناس كتير نفسها تشتغل شغلتك لمجرد اعتقادهم انك مجرد واحد “بتفكر” وخلاص،
وايه يعني ما سهل اشتغلها، وانا عندي افكار كتير هتكسر الدنيا، وانا لو بس حد يديني فرصه هعمل افكار افشخ بكتير من الي انت بتعملها
وميعرفوش تعاملك مع الكلاينت، ومع الايجنسي، ومع الاكاونت مانجر، وكمية الريجيكشن الي بتاخدها، والتعديلات الي بتقتل فكرتك، وكمية الضغط في الافكار والمحدودية والوقت الي بيزنقوك فيه،
وكمية قتل الاحلام والطموحات الي بتواجهها كل يوم لفكرة هتروح تنجح واحد تاني ويختاروا مكانها حاجه غير اصلا الي جابوك مخصوص عشانها،
انك لسه بتعافر في وجودك ك كرييتف في هذه البلد وسط هذه الصعوبات، ده شيء مش سهل حد يقدره ولا يعرف قيمته غير الي شغالين في الصنعه،
انا لما كتبت كرييتف في زمن ما، كنت بضطر اكتبه عشان اشتغل في الاخراج، لما عملت كونتنت كنت بضطر اعمله عشان اوصل للاخراج، لان فعلا شغلانتك صعبه، انا بعملها بصعوبه جدا، عمري ما اعرف اعملها زيك
لما بيجيلي كرييتف حاليا، بقولهم يا جماعه انا معنديش قوة الكرييتف، معنديش خلقه، معنديش عبقريته ومرونته في التعامل، قوة تحمله في الديبيت الي بيروح بينه وبين الكلاينت، ومهارته في انه يوصل لحاجه ترضيه هو والكلاينت في الاخر، او حتى يوصل لحاجه تقدر تطلع حلوه
عزيزي الكرييتف، مش هتلاقي حد للاسف عامل اعلان او فيلم او حتى بوست بيشكر فيه دورك كـ كريتف، عادة لأدوار فيها تضحية زي الدكتور والظابط والمهندس وحتى لو محاسب،
عادة مش هيحسوا بدورك بشكل عام في المجتمع، وهيحسوا ان انت بتعمل ايه يعني..، انا لو هعمل فيلم هعمل فيلم عن قصة اختفاء الكرييتفتي من الحياة او الجانب الابداعي، وابين فيه كأن الدنيا كلها اتاخد منها الالوان وبقت ابيض واسود
وجودك للكريتف، هو الي بيخلي الدكتور والظابط والمهندس والمحاسب لما يفصلوا من يومهم ممكن يترسم على وشه ضحكه تخليه يكمل في المجتمع، او يتبسط ان في حاجه فصلته غير بقيت حياته الروتينية الي انت خلقتله فيها حاله مختلفه
وبردو محدش هيشوف ان انت ممكن تسهر عشان فكره، ومتنامش عشان ديدلاين، وبريف، وطريقة شغلك الي انت بسببها اصلا بقيت كرييتف والي هي قد تتنافى تماما مع اي قواعد من الصحة والسلامة النفسية والبدنية
وانك عشان ت سيرفايف حتى كمعيشة محتاج دماغك تبقى شغاله اربعه وعشرين ساعه، كل لقطه قدامك كل شخصية بتشوفها، كل موقف بيحصلك بتفكر ازاي تحولة لشغل عشان تفضل عايش
الناس تقريبا كلها ممكن تفصل من شغلها، بس انت حياتك كلها شغل حتى لو طريقة نومك ممكن تحول منها فكره تحولها لشغل
تهديد الحياة ليك بانك بتكبر وان في حد فريش هيجي ياخد مكانك وسهولة التيرن اوفر الي محتاج على اساسها تتعلم ٢٤ ساعه عشان تواكب الحياة وتفضل عايش
الناس الي كلها بتاخد اجازه ف ايام معينه، وانت الاسم انك بتاخد اجازه من الشغل بس محتاج تفكر طول الاجازه عشان بعد الاجازه هتحتاج تعمل تسليمة معينة
صعب حد بره الشغلانه يقدر ده
عزيزي الكريتف، انت بطل عظيم، مفيش حاجه تقدر توافيك قدر جمال وجودك وسطينا، وانك لسه كرييتف، كان نفسي اعمل حاجة حقيقية توافيك حقك، بس للاسف مفيش
سيبك من المجتمع واي حد يتريق على شغلانتك او عليك، كل الي شغالين في الصنعة عارفين قيمتك كويس
تحياتي وتقديري عزيزي الكرييتف