عايز تعرف ١٠٠ يورو بيشتروا ايه في فرنسا
الحياة في العالم الاول رخيصة علشان إحنا بندفع ثمنها..
المواطن الاوروبي والامريكي بيشتري المنتجات بسعر أقل من تكلفتها في أحيان كتير والسبب إن دول العالم الثالث هي اللي بتدفع فرق السعر ده، من أول ساعات عمل غير آدامية ورواتب متدنية جدا وظروف وبيئة شغل مذلة وعدم وجود ضمان اجتماعي او صحي… الخ.
اكبر برندات الملابس في العالم بتصنع منتجاتها في فيتنام وبنجلاديش وتايلاند ده مش علشان الجودة ولكن علشان كل الأسباب الغير آدمية اللي ذكرتها وبالتالي المنتج رخيص جدًا لإن تكلفة انتاجه ارخص بكتير من انه يتصنع في بلدة في ظل قوانين انسانية صارمة..
أفضل انتاج زراعي بيتصدر من دول خصبة زي مصر والسودان وسيرلانكا ، فانت بتستمتع بجودة اصحاب البلاد دي نفسها مش لاقينها، احنا بنشتري بواقي التصدير باعلي سعر نتيجة نقص المعروض بعد التصدير، علشان عملتك بتتحكم فينا، فاحنا بنشقي ونتعب بالف جنية وانت بتاخدها ب ٢٥ دولار بس، شوفت الفرق بين حياتنا هيبقي عامل ازاي ؟
والامثلة كتير جدًا فالحياة في العالم الاول مش رخيصة ، العالم الثالث هو اللي رخيص وبيدفع ثمن الحياة العادلة اللي هما عايشنها، –
– عايز تعرف ال ١٠٠ يورو يشتروا ايه في فرنسا؟
– بيشتروا ثروات من غرب افريقيا.
النظام العالمي بيضمن تفوق العالم الأول علي حساب العالم الثالث.