التصنيفات
المدونة

عالم موازى .. النكته فيه اهم من الحقيقه

ينفع نضحك بس مينفعش يتصدق

هى نكت لطيفه و كوميكس تضحك ..
بس للأسف التريندات اتصدقت و فى ناس ساذجه افتكرت انها ممكن تطبقه فى حياتها

مش حاجه لطيفه انك طرى و مش بتعرف تشيل المسئوليه ..
ضحكنا اه لما قولت “طيب ينفع ادحرجها”
و هخيويوهو لما قولت “مش عاوز اعودها ع الشيل” ..
بس فى النهايه لو مشلتهاش هتبقى بنى ادم تافه

تأخيرك عن مواعيدك دليل على عدم احترامك للشخص اللى قدامك و أنك معندكش اداره لوقتك ..
حلوه الكوميكس بتاعت “هو انا عمرى جيت ف معادى .. طيب مستغرب ليه” .. او “انتو اللى جيتو بدرى”
بس برضه هتفضل انسان مستهتر و الضحك مش هيغير ده

صحابك بيشيروا كوميكس تهلك من الضحك عن ازاى هم مبيذاكروش و هيعوضوا ف الفاينال و بيلموا المنهج ليلة الامتحان ..
و انت تعجبك الفكره و تتمرقع طول السنه .. بس هم كلهم بيذاكروا و مفيش حاجه اصلا اسمها ماده تتلم ليلة الامتحان ..
و هتكتشف ده لما تتأخر عنهم بدفعه ..
تريند الفيسبوك مش هينفعك وقتها ولا هيعوضلك سنين عمرك

الردود البجحه بتضحك اوى و المواقف اللى بتقراها فى بوستات الفيسبوك دمها خفيف ..
بس الحقيقه مفيهاش كده ..
و اللى بيشيروا الكلام ده مبيقدروش يقولوا نصه فى حياتهم ..

جرب كده تقول لحد “انا ساكت عشان مبحبكش مش عشان هادى” و شوف هيحصل ايه ..
لو عايز تعيش بجح فأنت حر ..
بس متفتكرش الموضوع ظريف خالص
و متتضايقش لما تحتاج حد و تتكسف تكلمه لأنك كنت جلمف معاه و انت بتقلد التريند

الفيسبوك عالم موازى الناس بتهرى فيه و بيحب المبالغه ..
النكته فيه اهم من الحقيقه ..
ينفع نضحك بس مينفعش يتصدق .. و مغيرش حاجه فى المبادىء ولا قوانين الكون ..
هو بس حسسك ان التفاهه و الفشل حاجه لطيفه ..
بس هم مش كده

المصدر