عندي تعليق جانبي كده بخصوص برنامج قطايف والممثل اللي بيقدمه..
وهو إن احتفاء الناس بالممثل هو استمرار لظاهرة غريبة لا أفهمها عند معظم الناس..
خصوصا في المجالات الترفيهية والتافهة!
هو إيه اللي عجب الناس في البرنامج؟ .. الكلام والموعظة والأفكار؟ .. طب ده مش كلام الممثل أصلاً.. الحلقات دي ليه كاتب بيظهر إسمه على الحلقات.. الممثل اللي بيقدمها مجرد ممثل بيقدمها! .. مش هو صاحب الكلام ولا صاحب الموعظة! .. وفي الواقع لو عندك أقل خبرة في التصوير هتلاحظ عين الممثل وهو بيتكلم بتقرأ من شاشة أمامه!
ممكن يكون الممثل شارك ببعض الأفكار.. وربنا يجازيه خير على إنتاجه البرنامج من ماله الخاص. ربنا يرزقه الأجر ونتمنى ما يستغلش الشهرة دي في عمل فيلم كوميدي بعد كام شهر!
بس في النهاية الكاتب يستحق نفس الاحتفاء بالممثل إن لم يكن أكثر!
الظاهرة اللي بتكلم عنها هي احتفاء الناس بصاحب الجزء الظاهر من العمل وتجاهل أصحاب الدور الأهم طالما إنهم مش ظاهرين حتى مع علم الناس بوجودهم..
خلينا نعرض بعض الأمثلة..
في الكورة.. الناس بتحتفل بصاحب اللمسة الأخيرة في الهدف .. مع إن زملائه ممكن يكونوا بذلوا مجهود أصعب منه بمراحل في إحراز الهدف..
كمان الجمهور بيحتفل باللاعبين أكتر من المدرب عادة.. مع إن دور المدرب وخطة اللعب أهم من الدور المنفرد لأي لاعب.. لكن اللاعبين بيتقاضوا أجور أكثر من المدربين عادة وبفرق كبير جدا احياناً.. وده بسبب مكانتهم عند الجمهور وما يترتب عليه.
في الأغاني.. الناس بتحتفي بالمغني أكتر بكتير من المؤلف والملحن مع إن دورهم أهم.. والأغنية عادة بتنجح مع الناس بسبب لحنها وكلماتها أكتر من الصوت.
في الأفلام والمسلسلات.. أجور الممثلين وشعبيتهم أعلى بكتير من أجور المؤلفين والمخرجين.. مع إن نجاح الفيلم أو المسلسل متوقف بشكل أساسي على القصة وطريقة إخراجها!
لو ملاحظ من الأمثلة إن الظاهرة دي موجودة بشكل أكبر في المجالات الترفيهية والتافهة.. ويمكن ده يوضحلك الحاجات دي بتعمل إيه في عقول الجمهور اللي بيتابعها واللي بتفقدهم القدرة على الحكم على الأمور بعقلانية!
أكيد الظاهرة موجودة في بعض مجالات العمل.. بس مش بنفس القدر والفجاجة!
عارف الظاهرة دي مش موجودة فين؟
في الأعمال التي يرجو بها صاحبها وجه الله.. لأن صاحب الحكم هنا ومانح الأجر هو الحكم العدل الذي لا يظلم مثقال ذرة.
مش مهم تكون ظاهر.. بس أجرك كله محسوب.. حتى لو غيرك خد عملك ونشره بشكل أكبر بين الناس والناس عرفته هو أكتر منك.. أنت مازال أجرك محسوب عن كل واحد انتفع بالعمل.
فالحمدلله الحكم العدل الكريم الرحيم.