خد بالك من العلامات …
طول ما انت عايش بتقابلك مواقف وعلامات
واللي تقدر تقول عليها كده انها اشارات كونيه
ودي اكبر حاجه بتتعلم منها وبتطور رؤيتك للامور
وبالبلدي كده بتعلم معاك مهو العلم غير العلام يا صديقي
هتلاقي ان كل مشكله او شخص غلط وقعت فيه كان ليهم علامات واضحه كأشارة تحذير منهم بس انت اغفلتها بمزاجك او بأنك تقول ان فلان مش زي علان …
لأ يا صديقي ارجوك ركز في العلامات والاشارات دي لان وبعد خبرة طويلة في الحياة اكتشفت ان فيه مقدمات معينه بنسبة 99% هتوصلنا لنتائج بعينها مهما كان الشخص
انا مش بركز في الاشخاص انا بركز في المواقف والعلامات دي واللي بعد شوية بتكون خبير في العلامات دي وتقدر تاخد قرار بدري بأنك تنهي علاقه شخصيه او بيزنس في بداية الخازوق لانك بتكون واثق بشكل كبير ان المقدمات دي هتودينا فين
والعلامات كتيره …
وممكن لو البوست ده عجبكم اكتب عنها بوستات تانيه
ومن ضمن العلامات دي واللي هي سبب كتابة البوست ده ان الانسان المحترم لا يطلب شيء ابدا بسيف الحياء يعني مفيش انسان محترم هيحرجك علشان تعمله حاجه
ومن حوالي شهرين لقيت حد بعتلي رساله وبيطلب اني ادعمه في حاجه تخصه وبعيدا اني مش مقتنع باللي بيعمله وشايف ان كلامه مش مرتب خالص وممن يقلب بكارثه
بس انا رفضت الموضوع لدرجة اني عملت بوست وقتها – هتلاقي اللينك في الكومنتات – وعملتله بلوك بعدها تفتكر ليه؟
لان لقيته بيقولي …
“اكيد ابن اصول زيك مش هيبخل علينا بالدعم”
هنا ظهرت علامتين مع بعض واللي مش مجرد طلب بسيف الحياء لأ وكمان بطريقة قليلة الادب ولما كتبت البوست وقتها مش كتير انتبه للي انا بقصده
والنهارده الاقي اكتر من بوست وعشرات الافراد بيقولوا انه نصب عليهم في فلوس على ضوء الحاجه العجيبه اللي كان بيطلب فيها دعم … قولت الحمد لله اني مظلمتش الشخص ده
لان خد بالك ان مهما بلغت خبرتك في المواقف انك مش هتكون موفق 100% واكيد ان مش كل اللي يعمل المقدمات الفلانيه هتوصلنا للنتائج الفلانيه بس انت مش حمل تجربه عرفت من خبرتك ان بنسبة اكتر من 90% هتزعلك
وعلشان كده وانا باخد قرار بالطريقه دي بقول ربنا يسامحنا بقى لانه ممكن يطلع الشخص ده من 10% اللي ظلمناهم
الخلاصه اللي عايز اقولها …
مش مهم انك تغلط ابدا ولكن المهم انك تتعلم وتخرج من المواقف اللي بتقابلك بمعلومات وعلامات تجنبك الوقوع في نفس الغلطه او نفس الموقف تاني
والاهم بقى انك تركز على العلامات مش الشخصيات
العلامات دي تكاد ترقى لتكون قوانين
يعني . من العجيب إن نفس الجملة دي لو اتقالت لي . هاعمل لصاحبها بلوك . جملة ( أكيد ابن أصول زيك مش هيبخل علينا بالدعم )
الجملة فيها ابتزاز صريح
وفيها تهديد واضح بإلحاق تهمة إنك بخيل ومش ابن أصول لو ما دعمتنيش
تخيل لو الجملة دي اتقالت ل ١٠٠ واحد
كام واحد هيقرأها بالقراءة دي
ممكن ٥ مثلا
فتلاقي ال ٩٥ بيتهموا ال ٥ بإنهم معقدين !!
لا هيا الحقيقة إن ال ٩٥ مش شايفين العلامات الواضحة جدا
مثال مشابه لما حد يقول . أكيد رحمة ربنا مش هتحرم أم مطلقة من إبنها لو تزوجت تاني
هوا هنا بيتهم الله سبحانه وتعالى بعدم الرحمة لو أمر بضم الطفل لأبيه لو أمه المطلقة تزوجت
أو تقول لحد . كذا حرام
فيقول لك يا أخي دا الدين يسر
هوا هنا بيتهم الدين بعدم اليسر لو كان فعلا حرم الحاجة دي
الإشارات دي واضحة جدا
لكن للأسف الناس بتفضل سايبة نفسها للسطحية . لحد ما تفقد حاسة رؤية هذه الإشارات
العضلة التي لا تستخدم تضمر
ومهارة رؤية الإشارات تضمر كلما أهملتها