خلينا نقول ان القاعدة في التعامل مع اي دايره أذى هي الهروب ..
اه الهروب !
طاقة الانسان و عمره اغلي من اي هري يأكل من كيانه و سلامه النفسي
نظرته لنفسه كل يوم بليل و هو بيشفق علي ذاته و كرامته كفيلة انها تخليه يرمي اي حاجة تحت جزمته!
طب لو مش عارف يهرب؟!
لو مش قادر يكسر دايره الأذى اللي عايش فيها لاي ظروف قهرية سواء عائلية ، إجتماعية ، ماديه … إلخ .. يعمل ايه ؟؟
مبدأيا الانسان لازم يستوعب نقطة مهمة جدا و هي احنا مش بنصلح حد
عارف تتعامل مع فلان كويس ، مش عارف .. ملكش انك تربيه من اول و جديد .. ديه مش بتاعتك
فاول حدود لازم يدركها الانسان ، هي حدوده نفسها
احنا ملناش سلطة برا جسمنا و افكارنا و سلوكنا
فمينفعش نحمل نفسنا فوق طاقتها و خصوصا لما تكون حاجة مش مسؤوليتها
او زي ما بيتقال
You can’t control how they treat you, but you can control if you accept it
انت مش حتقدر تتحكم في طريقة تعاملهم معاك ، بس تقدر تتحكم في قبولك للطريقة ديه!
فلو فيه شخص متخيل ان وجوده في دايره الأذي عشان يغيرها او يعدل من سلوك افرادها يبقي شخص طفولي و بيكابر في الوهم .. فلو انت مش قادر تهرب اعترف بحقيقة الوضع و متدخلش نفسك في متاهات مش بتاعتك .. عشان متكونش صدمة الوهم اللي انت عيشت نفسك فيها اصعب من الأذى نفسه
تاني حاجة
خليك جدع و بلاش تلوش في اللي ملهومش ذنب
بلاش تتشطر علي ناس بتحبك و متستحقش القسوة اللي انت مصدرها لهم، فقوتك في اللحظات ديه اساسها حب الناس الجميلة ده ليك
بس فكرة انك مضغوط و مش طايق نفسك فتكون انت مصدر ضيق او ألم لحد تاني ، ديه قمة الفشل و العجز !!
اللقطة كلها بقي في الهدوء
في الاتزان
في التًقل
فبالرغم من القرف اللي بيحصل حوالينا ، بس الحياة بتعلمنا ، ان كله بيعدي، و اللي شايفه كبير دلوقتي كمان ايام حتلاقيه فِس، و اللي شايفه مستحيل دلوقتي كمان ايام حتلاقيه عادي و طبيعي
فمتحرقش في الفاضي!
والله ما كلام فلسفة افلاطونية او جو تنمية بشرية ، بس ساعات بتكون مشاعر الالم هدفها انها توصل لنا حاجة فينا .. عيب محتاج يتصلح او رسالة اعمق و اهم من مجرد الألم اللي حاسين بيه
فبدايه اي حل هو ان الانسان يبقي رايق ، ميتسحلش في دوشة الألم … عشان يعرف يبص لابعد من تحت رجله
في النهاية في جملة رايقة جدا بتقول
you are not for everyone and that’s ok
انت مش لكل الناس و ده حاجة طبيعية
فبلاش تتأثر اوي و حياتك تتشل لو حسيت نفسك مش مناسب مع شخص ما او حسيت انك لازم تبعد عنه حتي و لو الشخص ده قريب منك اوي، عادي ، تعامل مع الواقع ده بهدوء و حكمة و شوف حتاخد خطوات ايه عشان تكمل حياتك من غير انفعالات صبيانية او غلط في حد