عزيزي المواطن البسيط،
زمان لما كان سامح جاركوا هو الي بيطلع مارينا، كان ده تقريبا السبب الوحيد الي بيولد عندك شعور ال Missing out
حتى كان زعلك على العجمي مكانش قوي اوي، لانك حاسس انك ممكن تطلعها
حاليا انت بتشعر بالـ Missing out لاسباب عدة، انت بتشوف ناس كتير اوي طالعه في حتت وبتتفسح حتى وانت متعرفهاش، التايم لاين عندك شغال على فكره انه يغذيك بهذا النيوز فيد
مش هقولك الكليشيه بتاع ان مفيش حد غلبان هيصحى الصبح يصورلك ستوري على حنفية بيته الملازمه لحوض الكبانيه وهو مش عارف يغسل وشه الصبح
او واحد حاطط ستوري لتلاجه فاضيه مش لاقي ياكل
ده كلام اصبح كليشيهي، مع التذكير طبعا اننا بنألف النعم ولازم نحافظ عليها واحنا اتعودنا انها موجوده وكده
انما انا اكتب هذه السطور عزيزي المواطن، لتعلم انك مش missing out ولا حاجه، انت بس معرض للناس الي خرجت لانها بتفصح، لو بصيت من شباكك على الاكوام الاسمنتيه التي بأمامك، فأعلم ان تقريبا معظمها يسكنها ناس حزانى مخرجوش ولا راحوا في حته،
قاعدين حزانى بيتفرجوا على نيوز فيد لناس سافرت وبيحزنوا انهم مسافروش وان اجازتهم بتضيع على تلك الجلسه
انت مش لوحدك، لو اتجمع كل الي بيشاركوك نفس الشعور هتعملوا سابورت جروب كبير جدا
ولكن كل واحد في هذا الجروب بيخشى يفصح بشكل كبير انه حزين انه missing out
هذه الكلمات طبطبه من صديقك وزميلك مشاركك القوالب الاسمنتيه المحيطه، سابورت جروب عابر للحوائط محمل بدعم نفسي انك لست وحيدا
لكنه فقط اختبئ تحت المجهول لحفظ ماء الوجه، اصمد في هذه الحياة صديقي المواطن