ساعات بتخيل شخصية مدير قاعد لوحده في البيت وبيعامل الاجهزة المنزلية معاملة الموظفين في الشركة:
يدخل البيت بعد يوم عمل شاق، واول حاجة يعملها انه يفضل واقف قدام التكييف لمدة ربع ساعة ساكت وباصصله بنظرة حادة وبعدين يقول: فين ال ownership يا تكييف، انا ملطوع كل ده بغرق في عرقي مستنيك تشتغل، ماتستنانيش اني اشغلك، انت عارف ان البيت محتاج جو ساقع فاشتغل من نفسك مش لازم اعمل كل حاجة بايدي!
هاتبقى مبسوط بال micro management يعني؟؟
فلما مايشتغلش برضه يتوجه للمروحة ويشغلها وبعدين يقولها: انا عايز هوا اكتر لو سمحتي this is not enough
فترد: ديه مشكلة الحر مش من عندي وانا مش قادرة اجيبلكم هوا اكتر من كدة ، فيرد عليها: ديه مش problem ده challenge ، انتي تقدري تلفي احسن من كدة وتحرقي مجهود اكتر فتجيبيلنا هوا اكتر، انتي جواكي حاجات حلوة كتير بس انتي اللي حاطة barrier لطموحك، صدقي انتي بس في نفسك.
وبعدين يتوجه للمطبخ ويقول للبوتاجاز: انا عارف انك اكتر حد في البيت مركز في شغلك عشان كدة هديك التاسكاية البسيطة ديه: سويلي صينية البطاطس ديه في دقيقتين، فلما يقولك: بس ديه يافندم مش هاتاخد اقل من ربع ساعة!
يرد: you have to meet the deadline
اومال ورشة ال time management اللي خليتك تحضرها مستفدتش منها حاجة؟؟ .. ولما يصر انه ينفذ ال order ويعدي ع البوتاجاز بعد دقيقة ونص، يقوله:: ها any updates ؟ فيرد البوتاجاز: unfortunately الانبوبة خلصت فيرد بنرفزة: كمان مفيش resources management ! هات الصينية انا هاوريك ازاي تخلص في دقيقتين.
ويروح فاتح باب التلاجة وحاطط فيها الصينية ويقولها: سخنيلي ديه، طبعا هاترد وتقوله: بس انا مبعرفش غير اني ابرد الاكل يا فندم!
فيرد: اتعلمي skills جديدة ايه المشكلة؟! لو هاتفضلي طول عمرك مش بتعملي غير حاجة واحدة بس اومال هاتتطوري امتى وهاتترقي امتى؟ ..
وفي النهاية يقف في نص الصالة: ده مش منظر تيم واحد يا جماعة سيبوا اللي في ايديكم وعندنا ريفيو ميتنيج في الحمام.
ويا ريت كل جهاز فيكم يعملي بلان هيحقق التارجت ازاي في ميعاده.