يقول د أحمد خالد توفيق رحمه الله :
في رحلة ريفية رأيت مجموعة من أصدقائي يلعبون لعبة سخيفة:
علقوا زجاجة مياه غازيه فارغه بحبل على غصن شجرة وجعلوها تتأرجح كبندول الساعة، ثم راحوا يصوبون عليها بالبندقيه من مسافة بعيدة نسبياً..
دنوت منهم وقررت أن اجرب
ما هذه؟ بندقية؟ كيف تطلقون بها؟ ما المطلوب بالضبط ؟ إصابة هذه الزجاجة؟ دعوني أجرب..
وضغطت الزناد بلا تفكير لتتناثر شظايا الزجاجة في كل أتجاه ويشهق اصدقائي ذهولاً..
عرفت فيما بعد أنهم يحاولون منذ ساعة وأن ثلاثة منهم حاصلين علي جوائز في الرماية لكنهم فشلوا !
لو كنت أعرف هذا كله مسبقا لفشلت حتماً..
شجاعة الجهل..
لولاها لما فعلنا أي شئ، لأننا نتوقع الفشل من البداية..
لهذا لم أندهش عندما قرأت عن ذلك الشاب الأمريكي الذي دخل قاعة المحاضرات متأخراً فوجد علي لوح الكتابة معادلة غير محلولة.
نسخها وافترض ان هذه هي واجبه المنزلي..
وهكذا عاد لداره وسهر حتي أتم حل هذه المعادلة وقدمها لاستاذه في اليوم التالي
أصيب الأستاذ بالذهول، وطلب الفتى ليخبره بالحقيقة: هذه المعادلة لاحل لها أو هكذا اعتبر أساتذة الرياضيات عبر التاريخ ، وقد كتبها الأستاذ علي لوح الكتابة كنموذج للمعادلات مستحيلة الحل.. الطالب الذي لم يعرف هذه الحقيقة حلها في ليلة واحدة !
هنا .. يجب أن نتحلي بشجاعة الجهل ولا نفكر في مدى صعوبة ما نحن بصدده، ولا بعدد من فشلوا قبلنا..
هذه هي الطريقة الوحيدة الممكنة للنجاح، أما لو حاصرتنا أشباح المخاوف قبل أن نبدأ فلسوف تخرج تلك الكلاب السوداء المفترسة لتمزقنا قبل ان نخطو خطوة واحدة !
#لماذا_ينجح_بعض_المبتدئين_رغم_جهلهم ؟!
في استشارة لإحدى الشركات – كانوا مجموعة من الشباب – عملوا مشروع – لو كانوا سألوني عنّه قبل ما يعملوه – كنت قلت لهم ما يعملوهوش
لكنّهم عملوه من نفسهم كده – ومشي معاهم لمدّة سنة مثلا – وطلبوني بعد السنة دي في استشارة
لمّا شفت المشروع – لقيتهم ما شاء الله معدّيين مرحلة جيّدة جدّا منّه – لو هنرسم كيرف للّي انا كنت متوقّعه بالقياس على المشاريع اللي شفتها – وللّي همّا وصلوا له – ف همّا وصلوا ل أعلى بكتير ممّا كان هيقول النمط الطبيعيّ لتطوّر المشاريع
قلت لهم مثال
إنتوا عاملين زيّ اللي واقفين على شاطيء نهر – والنجاح في البرّ التاني
والنهر اللي بين الشطّين دول مليان تماسيح
لكن انتوا ما تعرفوش موضوع التماسيح ده
ف عدّيتوا النهر – في غفلة من التماسيح – اللي ما كانتش متوقّعة حدّ يعدّي
عدّيتوا – ووصلتوا لشاطيء النجاح
وهنا يبان معانا نمط مهمّ جدّا
النمط اللي بيتقال عنّه ((( حظوظ المبتدئين )))
لكن – النمط ده له تفسير حقيقيّ – يعني هوّا مش مجرّد حظّ
سبب نجاح المبتدئين – رغم جهلهم – مش هقول لك أحيانا – ولكن – دائما
أمّال يعني إيه مبتدئين – ما هو مبتدئين يعني جهلة بالشغلانة
ولّا همّا واخدين كلمة مبتدئين دي منحة من أفندينا يعني
ف – منين جهلة ( باعتبارهم مبتدئين ) – ومنين بينجحوا في بعض الأحيان
السبب وراء الظاهرة دي – هو أصلا #جهلهم !!
إزّاي ؟!
أقول لك
#بسبب_جهلهم /
بيكون قلبهم جامد – ف بيحاولوا في حاجات ناس كتير ما بتحاولش فيها – لإنّ الناس دول قدام وعارفين إنّ منطقة الصيد دي ما فيهاش سمك
ف يروح المبتدء يحاول فيها – ف يلاقي السمك كان مستخبّي فيها من الصيّادين !!
#بسبب_جهلهم /
بيعملوا خطوات خطيرة
بسبب المخاطرة دي – بييجي نجاح – وبييجي مكسب كبير – على قدر المخاطرة يكون المكسب
كلمة ( ريسك ) أصلا من أصول تسميتها الكلمة العربيّة ( رزق )
يعني الأجانب لمّا جم يسمّوا المخاطرة – سمّوها الرزق – عشان يبقى راسخ عندهم إنّك لو عاوز رزق – خد ريسك
ف المبتدئين بياخدوا المخاطرة بدون مبالغة في الحسابات
بينما – القدام ما بيعملوش المخاطرات دي لإنّهم ياما شافوا ناس حاولوا فيها ودمّرتهم
#بسبب_جهلهم /
بياخدوا خطوات كتير بسرعة – ف بيوصلوا بسرعة – بينما الناس القديمة الخبيرة – بتعطي الخطوات دي حقّها الكامل ووقتها الكافي – ف الموضوع بيطوّل معاهم – وممكن يتعثّر أو يتوقّف تماما قبل الافتتاح أصلا
ف عندك ثلاثيّة – الابتكار – المخاطرة – السرعة – دي اللي بتساعد المبتدئين في بعض الأحيان – ف يحصل لهم ما نسمّيه نحن ( حظوظ المبتدئين )
والتلاتة دول كان سببهم أصلا هو #الجهل – وسبب جهلهم هو إنّهم مبتدئين
أيوه يعني عاوز تقول إيه ؟!
عاوزنا نقلّد المبتدئين الجهلة ؟!
لأ طبعا
ولكن
بقول لك
بقول لك انتا يا خبير يا قديم – ضيف لخبرتك المعلومة دي
معلومة إنّ التسرّع والتهوّر والمحاولة في مناطق غير مطروقة دول مفيدين
المبتدء بيعملهم وبيخلّوه يتنقل بسرعة
وممكن يدمّروه – لإنّه بيعملهم بجهل
ف !!
هل تقدر انتا – يا خبير – تعمل التسرّع والتهوّر والريادة دول بشكل احترافيّ ؟!
المغنّي الصغيّر – ممكن ينشّز عن اللحن – ف تطلع نتيجة حلوة – أو وحشة
المغنّي المحترف – بيلتزم باللحن – ف تطلع نتيجة حلوة
المطرب القديم بقى – ممكن ياخد نفس اللحن ده – وينشّز جوّاه – ف يطلّع لك تطريب أعلى أساسا ممّا كان الملحّن كاتبه في اللحن بتاعه
وصلت كده ؟!
مطلوب منّك انتا – يا خبير – يا قديم – تعمل الرعونة دي – بمهارة – تقدر ؟!
مطلوب منّك يكون عندك القدرة على المحاولة في المناطق غير المستكشفة – اللي كلّ الناس الخبيرة زمايلك بيقولوا دي خلاص خلصانة ما فيش فيها فرص
بسّ انتا غير المبتديء
ال 10 مبتدئين اللي حاولوا 10 محاولات – 9 مبتدئين منهم ضاعوا في الوبا وما سمعناش عنهم أصلا عشان نعرف إنّهم فشلوا – وواحد منهم فرقعت معاه
إنتا بقى – ك حدّ خبير – مطلوب منّك لمّا تبحث في 10 مناطق – يطلع 3 منهم فرص مستخبّيّة – أو 5
إنتا مش بتبحث بالحظّ زيّ المبتدئين
مطلوب منّك إنّك – مع تقدّمك في السنّ والبيزنس – ما تبردش عندك شفرة المخاطرة
لكن
المتوقّع منّك إنّك تكون دارس مخاطرتك بشكل أفضل من المبتدء
مش يبقى المبتدء بيخاطر – والعجوز ما بيخاطرش
ولكن !!
يبقى المبتدء بيخاطر بعشوائيّة – والعجوز بيخاطر باحترافيّة
مطلوب منّك – ك حدّ كبير في السنّ – وعجوز – وراكز – تكون سريع جدّا في البدء في التنفيذ
ينفع ؟!
ينفع تجتمع الصفتين ؟
الهدوء والركوز – مع السرعة والإقدام ؟!
صعبة
مش كده
هههههههههه
أمّال انتا تعرف عنّي إنّي باتكلّم في تفاهات ؟!
أخيرا
أختم بقناعة شخصيّة مش بشاركها كتير – لإنّها هتفتح عليّا أبواب جدل كتير
وهي
#السرعة_أهمّ_من_الاتّجاه
يعني أنا أفضّل أتحرّك بسرعة في الاتّجاه الخطأ – أفضل من إنّي آخد وقت طويل في تحديد الاتّجاه الصحيح قبل التحرّك
عشان كده بردو من كلماتي الشخصيّة
بقول
#البداية_الخاطئة_قرار_صحيح
ولو سمحت ما تجادلنيش في القناعات دي – قلت لك أنا أصلا ما باتكلّمش عنّهم كتير عشان ما اجيبش لنفسي الجدال
وأعتقد إنّ كتير من رجال الأعمال الناجحين بيؤمنوا بالمباديء دي – لكنهم يكتمون إيمانهم – لإنّهم عارفين إنّهم لو صرّحوا بالقناعات دي هيتمّ اتّهامهم بالجنون
هيتقال لهم ( إنتوا بتشجّعوا الناس تتسرّع وتتهوّر وتتصرّف برعونة ؟! )
ف بيقعدوا ساكتين وبيحتفظوا بقناعاتهم دي لنفسهم
لكن طبعا ما انساش أقول لك إنّ شرط تنفيذ المبدأ ده هو إنّي أكون بخاطر باللي أقدر أخسره
كما تقول الحكمة ( فكّر كبيرا – وابدأ صغير- وابدأ الآن )
الشرط ده موجود في كلمة ( إبدأ صغيرا )
والتسرّع اللي باتكلّم عنّه موجود في كلمة ( إبدأ الآن )
من كلماتي بردو بقول إنّ ( العامل الوحيد المشترك بين جميع الناجحين – هو أنّهم #بدؤوا )
أنا بشوف البداية هي أهمّ حاجة – حتّى لو في اتّجاه غلط – بشرط – تكون بمبلغ تقدر تخسره
اللي يعمل الموضوع ده مرتّين تلاتة
هيوصل بكتييييير قبل اللي قاعد يبحث عن الاتّجاه الصحيح – لكنّه #قاعد